Columban Jau Wuhpung gaw de ai (100) hpring Jubili Poi hte Jau shatai poi ngwi pyaw ai hte galaw la lu sai

Columban jau wuhpung gaw de ai (100) hpring jubili poi hte Jau shatai poi ngwi pyaw ai hte galaw la lu sai shiga!

November 16 ya shani Myitkyina Edin mare San Luka Chyum college jawng wang hta galaw lai wa nna ndai poi hta Wa Saradaw kaba Paul Zinghtung Grawng,Wa Saradaw Francis Daw Tang,Lashio Sasana Sagurem wa,Wa Saradaw Philip ZeHawng, Manmaw Sasana Sagurem wa,Wa Saradaw Raymond Sumlut Gam, Hkang mungdaw Hakha Sasana Sagurem wa, Wa Saradaw Lucias Hre Kung, Columban jau Marai (5), Myitkyina,Manmaw,Lashio hte Myamar mung na jau ni sa du shanglawm lai wa sai re.

Ndai Columban jau Wuhpung gaw de hpang wa ai (100) ning hpring chyeju dum wunli la ai poi hta Sara kaba N Lam Gam Li kaw nna anhte Kachin ni hpe sasana shang makam masham jaw ya sai Columban jau ni tinang a mungdan de bai wa mat ai shaloi kachin ni grai hkrap garu n ja ai hte shakram dat ra ai,Columban jau ni kaw nna nanhte lagaw hte nanhte tsap lu sai hpaji chye ai ni mung lawm sai.Bai singpraw maga de sut su ai Miwa mungdan kaba mung nga ai zawn,Sinna maga de hpaji chye ai India mungdan mung nga  ai nga nna tsun ai raitim ya dai ni du hkra anhte Kachin ni nsimsa nnga pyaw ga ai,Anhte Kachin ni gaw moi nanhte Columban sasana jau ni hpe sat mung sat kau ai lam,Damya  mya sha zingri ai lam ni mung galaw kau saga ai,Dai re majaw anhte hpe mara dat ya marit,hpaji jaw marit rawt jat galu kaba hte simsa lam lu la na matu shaman ya marit nga nna wunli la ga hpe mung tsun lai wa sai.Bai nna Columban jau ni kaw nna mung mara raw ya sai ngwi pyaw simsa rawt jat galu kaba hpaji kung kyang wa na matu Columban jau ni kaw nna mung Kachin ni yawng a matu shaman ya wa sai.Shana maga 2:30pm hta jubili manau nau ai lam galaw lai wa nna shana 7:00pm hta gaw htung hking ka hkrang ni hte shangwi shapyaw lai wa sai re.

Bai November 17 ya shani Myitkyina Sasana Sagurem wa,Wa Saradaw Francis Daw Tang a lata hta htani htana jau aya hkam la sai Wa jau nnan marai (5) a jau shatai poi hta Myitkyina,Manmaw,Lashio, Hahka saradaw ginwang na sagurem Wa Saradaw ni marai (5), Wa jau ni marai (90) hte Wuhpung shagu na Ma Ma ni,Tara hkaw sara/num hte hpung masha ni marai hkying Kru (6000) jan sa du shanglawm lai wa sai.Jau shatai Missa hkungga ngut ai hte Myitkyina Sasana Sagurem wa,Wa Saradaw Francis Daw Tang kaw nna Jau nnan ni magam gun ang ai shara ni hpe mung ndau ya lai wa sai.Wa Saradaw ndau dat ai jau nnan ni magam gun ang ai shara ni gaw Hpakant jau ginwang na Wa Jau Peter Bunghku Naw Lawt gaw Myitkyina,Shatapru jau ginwang na Wa jau Peter Lagai Tu Hkawng gaw Curia rung,Wa Jau John N hpum Mung Mai mung Chancenllery rung,Mohnyin jau ginwang na Wa Jau Francis Jangma Awng Li gaw Hpakant hte Kachyihtu jau ginwang na Wa jau Luka Marawng Zau Tu gaw Danai jau ginwang ni hta magam gun ang ai lam chye lu ai.

Jau nnan ni yawng a malai Wa jau Luka Marawng Zau Tu kaw nna chyeju dum mung ga tsun ai hta Anhte hpe n gring dan ai raitim jau tai wa lu hkra lata la sai Wa Karai Kasang hpe chyeju dum ai,Jau aya hkam ya sai Wa Saradaw hte Wa Jau ni yawng, Akyu hpyi garum ya ai hte madi shadaw ya wa sai hpung masha ni,chyeju madu chyinghkai kanu kawa,kahpu kanau ni yawng hpe grai chyeju dum ai lam, matut nna akyu hpyi shakut ya na matu hte shanhte mung tengman kangka sadi dung ai hte magam gun sa wa na re lam ni tsun lai wa sai.Shana maga 2:30pm hta htunghking manau nau nna,shana 7:00pm hta gaw Kahtawlik Yungwi ninghkring ni a shangwi shapyaw ai lam ni hpe galaw lai wa sai.

Columban Jau Wuhpung gaw 1918 ning hta Miwa mung de sasana shang na matu Ireland mung  Ireland jau ni kaw nna hpaw hpang wa ai rai nna Vatican kaw nna Myanmar mung dan de mung sasana galaw na matu bungli shatsam wa ai majaw 1936 ning hta Myanmar mungdan  Jinghpaw mungdaw de sasana shang ap nawng lai wa sai re.Lai wa ten hta Ireland jau ni sha Columban jau Wuhpung kaw shanglawm ai raitim ya gaw Korea hte Phillippine mungdan hkan na Columban jau,Ma Ma hte yu maya hpung magam gun ni mung shanglawm wa sai lam chye lu ai.

By: Munghkrang