Catholic Student Action Myitkyina Woi Awn Ai Youth Leadership Sharin Hpawng Galaw

Catholic Student Action Myitkyina ( CSAM ) kawn woi awn galaw ai ramma ni a ningbaw ningla hte seng ai sharin hpawng dabang hpe ( June 19 - 25, 2022 ) ya du hkra PLN Clay Center kaw galaw la lu sai rai nga ai.

Ramma ni a matu leadership  hte seng ai sharin hpawng hta laning mi hta kalang galaw na hku daw dan da ai raitim 2020 - 2021 ning hta gaw makau grup yin masa lam n hkrak ai majaw n lu galaw kau dat ai. Ya 2022 ning kaw nna matut manoi bai galaw sa na re lam mung chye lu ai. CSAM gaw jawng lung nga ai ramma ni, grau nna dakkasu jawng lung nga ai ramma ni a matu madung  yaw shada let  ramma ni hpe shapan shalat ya taw ai nawku hpung kata na uhpung langai  rai nga ai.

Ya na zawn Myanmar  Mungdan  hta mung masa lam n pyaw ai majaw ramma ni law law wa  jawng atsawm nlu lung mat ai ten ni hta nawku hpung kaw nna ndai zawn re ai sharin hpawng dabang ni hpe hpaw ya lu ai gaw ramma ni a matu grai nan ra kadawn hpang gara taw ai lam rai nga ai. Lai wa sai aten hta Myitkyina Saradaw Ginwang ting hta nga ai jau ginwang shagu na ramma dat kasa ni hpe saw shaga lu ai raitim  ya aten na mung  masa n pyaw ai lam a majaw hkrum lam yak hkak ai jau ginwang na ramma ni n du shang lawm lu ai. 

Ndai Catholic Student Action ( CSAM ) hpe 2018 ning kawn hpaw hpang da sai rai nna ya aten Columban jau rai nga ai Wa Jau Kurt Zion Pala lit la woi awn ai hte ramma ni rawt jat galu kaba lam a matu sharin hpawng ni hpe galaw ya taw ai rai nga ai. Kade nna ai aten hta ramma ni a matu laika dum ni hpe hpaw ninghtan sa wa na re lam lit hkam wa jau Curt tsun ai kaw na chye lu ai.

Ndai sharin hpawng dabang  hta jau ginwang shara shagu na ramma ni marai ( 32 ) sa du sharin hkam la ai lam chye lu ai.

Shiga -  Julia Ja Ing