Catholic Artists Association (CAA) Hpaw Ninghtan Ai Laning Mi Hpring Lamang Galaw

Catholic Artists Association (CAA) ngu ai Myitkyina Sasana Kahtawlik Shingni Hpung hpaw ninghtan ai laning mi hpring chyeju shakawn akyu hpyi hpawng hte hkumra zuhpawng  hpe  dai ni September 10 ya, jahpawt 10:00AM ten hta Myitkyina, Sapra Lawk, St.Gabriel Nawku Jawng wang hta galaw lai wa ma ai.

Hpawng lamang hta Myitkyina Sasana Sagurem Wa Wa Saradaw Francis Daw Tang hte Sumla hkrung Director, Wajau John Galang La Raw, CCA hpaw hpang na matu woi awn zinlum mat wa ai Mama Kaba Alam Ja Htu, Ma Ma Easter Hkawn Bawk ,  Hpung Sara ni, CCA EC malawm ni, laksan saw shaga da ai ni hte shingni shayi shadang sha ni sa du lawm lai wa ma ai.

CAA hpaw ninghtan ai laning mi hpring zuphpawng hta, Hpung a kanu kawa, Wa Saradaw hte Jau Mama ni hku nna, n-gun jaw mungga shaga la ai lam, CCA labau sum tang dang madun ai lam, shaning shajub jahpan tang ai lam hte kaga ra mara bawng ban jahkrup ai lam ni galaw lai wa ma ai.

Bai nna, Wajau John Galang La Raw hpe  laksan hkap tau hkalum shagrau ai lamang hpe mung galaw lai wa ma ai.Wajau hku nna mung, shingni magam bungli hte seng ai lam hpe shi jawng lung wa ai Korea Mungdan na shingni mahkrum madup lam hte hpawn hpaji jaw mungga shaga lai wa ai.

Wajau La Raw Hku nna “ shingni ngu ai gaw grai sung ai, shingni hte anhte a nga sat nga sa lam, galaw lu galaw sha lam ni yawng hpe htawng madun mai ai, dai majaw anhte Jinghpaw Wunpawng myu sha ni a lam Mungkan ting chye lu na matu gaw shingni galaw nga ai ni yawng a lit mung re, bai shingni ngu ai gaw, Nawku Hpung Makam Masham hte Amyu baw sang n ginhka ai sha, hkristan ni yawng kahkyin  rau jawm ta hkin dun let galaw ra ai, tinang galaw ai shingni lam hta professional madang hku galaw lu hkra shakut ra ai “ nga nna

Nawku hpung kata kaw nga ai shingni myit rum manaw manang ni rau jawm kahkyin let,  Karai Kasang a Mungdan a matu sasana magam bungli galaw ai lam hta shingni hpaji hte sakse hkam shakawn shagrau lu na matu ‘ Peace , Unity & Hope with Harmony Music’  ngu ai Simsa lam, Myit hkrum lam, Myit Mada Lam hpe lu la na ngu ai Matto lashum ga  hte  CCA  hpe Nawku hpung a ningbaw ni myit hkrum ai hte maren, lai wa sai 2018 ning September shata praw 1 ya shani hpaw hpang ai re lam chye lu ai.

CAA Ningbaw rai nga ai Sara Sabaw Brang Tawng hku nna tsun ai hta, “ n dai CAA hpe hpaw sa wa ai lam gaw, anhte Nawku Hpung kata na shingni hpe myit lawm ai kashu kasha ni yawng hpe shinggyin ra sai ngu nn mu mada ai, bai nna Wa Saradaw hte Jau ni mung mu mada madi shadaw ai hte yawng myit hkrum nna galaw sa wa ai rai ga ai” nga nna tsun lai wa ai.

Ndai Kahtawlik Shingni Hpung hta, Nawku hpung kata na shingni magam galaw nga ai ni law law shang lawm nna, shingni hpan hte hpan sub-comiti ni mung hpaw ninghtan da ai lam chye lu ai.

Anhte CAA hku nna Sub-comiti ni mung garan da ga ai, wuhpung hte wuhpung hkrang shala maga tsap ai ni nga ai,hkrang pan maga de tsap ai ni nga ai, ka hkrang hte yu ngwi n dai zawn hpan hte hpan law law nga ai, n dai ni hpe kahkyin nna grau masan sa hkra lam madun woi awn mat na lam ni nga ai, bai nna laning mi hta e kalang ndai zawn hkrum zup ai lam ni hpe galaw na, bai nna ya nnan she hpaw hpang ai re majaw ra rawng ai lam ni mung nga ai, hpan tam ai lam ni hpe mung galaw mat na matu myit da ga ai” nga nna Ningbaw lit magam hpe gun hpai ai Sara Sabaw Brang Tawng tsun lai wa ai.

 CAA hpaw hpang ai hpang, laning ni laman hta Nawku hpung hte seng ai poi lamang ni hte Laksan Poi lamang ni law law hta ap nawng daw jau shanglawm lu sai lam, matut nna du na aten ladaw ni hta kaga shingni wuhpung uhpawng ni hte rau ta hkin dun let magam bungli galaw ai lam, ra kadawn nga ai hpu nau ni a matu alu ja gumhpraw tam ya ai lam, shingni hpe myit lawm nga ai ramma ni hpe shalat shapan ya ai lam, Nawku hpung galu kaba rawt jat wa na lam ni hta shingni  hpaji lam yan hku nna shanglawm let CAA ngu ai wuhpung galoi mung ngang grin nna kalu kaba wa na lam ni hpe galaw mat na re ai lam chye lu ga ai.

 

Thomas

 

 

Add new comment

2 + 0 =

Please wait while the page is loading

Catholic Artists Association (CAA) Hpaw Ninghtan Ai Laning Mi Hpring Lamang Galaw | Radio Veritas Asia

Error

The website encountered an unexpected error. Please try again later.