Bulgaria hte Dingdung Macedonia Mungdan Hkrun Lam Hte Seng Nna Shiga Dap Na Masha Ni San Ai Ga San Ni Hpe Wa Sarabyin Htai Ya

Bulgaria The Dingdung Macedonia Mungdan Kaw Nna Roma Mare De Bai Ginhtang Wa Nga Yang, Nbungli Ntsa Hta, Shiga Dap Na Masha Ni San Ai Ga San Ni Hpe Wa Sarabyin Htai Ya Ai Lam Galaw Lai Wa Ai Shiga

Nhtoi masum ya na lai wa ai Bulgaria hte Dingdung Macedonia Mungdan ni de sa du gawan lam galaw ngut nna Roma mare de bai wa nga yang, nbungli ntsa hta shiga dap na shiga la ai masha ni the Wa Sarabyin Francis hkrum shaga nna, shiga dap na masha ni san ai ga san ni hpe mung htai ya ai lam galaw lai wa ai.

Ndai Mungdan lahkawng hte seng nna Wa Sarabyin a lak lai mu mada hkam sha lam hpe san ai ga san hpe htai ya ai hta, “Ndai Mungdan lahkawng gaw langai hte langai tsep kawp nbung ai Mungdan lahkawng rai nga ai. Bulgaria Mungdan gaw shaning tsa lam hte ru nna labau kaba ai labau dingsa nga ai Mungdan rai nga ai. Macedonia dai hte maren raitim, Mungdan gaw de ai nna shi ai, asak ram ai ramma ni law law shanu nga ai Mungdan rai nga ai, Sinna Mungda de Hkristian makam masham kaning rai shang bang wa ai ngu ai mabyin hpe ndai Macedonia Mungdan gaw sakse kumla rai nga ai. Asia dan de rawt sa wa lajang nga ai Kasa Pawlu ndai Macedonia de shaga la hkrum ai rai nga ai. Sinna mung de Hkristian makam masham ndai shanhte a chyinghka kaw nna shang bang wa ai re, ngu ai lam hpe Macedonia mungchying sha ni n hprai ai sha anhte hpe galoi mung shadum nga ai. Bulgaria Mungdan gaw majan tsin yam law law hkrum lai wa ai Mungdan re nga nna Wa sarabyin tsun lai wa ai. 1877 ning laman, Ottoman Empire up hkang ai npu kaw nna lawt lu hkra shakut kasat ai majan hta Russian hpyen hpung ni 200,000 jan si hkrum lai wa ai mabyin hpe sha-ang nna Wa Sarabyin tsun ai lam rai nga ai.

Ya na zawn nsim nsa hkawm sa, magam bungli galaw hkawm na n-gun atsam ni hpe gara kaw nna kaning rai lu la rai kun, nga nna san ai ga san hpe Wa Sarbyin htai ya ai hta gaw, “hpyi lamun hpaji ni hte ban sa, ba shamai la lam galaw la ai nre, ngu ai hpe shawng nnan tsun mayu ai, Karai Kasang a chyeju rai nga ai, du gawan hkawm sa nga ai aten tinang a hkum hpe malap tawn da ai, du nga ai shara hta nga nga ai, hkawm sa nga ai aten pu ba ai lam nnga ai, raitimmung hkawm sa ngut ai hpang chyawm gaw pu ba ai, Madu ngai hpe n-gun atsam jaw ya re ngu mu mada ai, Madu tha sadi dung maju jung nga lu na matu, shi madu hpe daw jau nga lu na matu Madu kaw akyu hpyi ai, ndai hkrun lam gaw majoi mungkan gawoi wam hkawm ai hkrun lam n rai u ga ngu nna akyu hpyi ai. Grai n-gun shadat nna shakut galaw hkra re ai chyawm gaw nnga ai” nga nna Wa Sarabyin htai ya ai.     

Orthodox Nawku hpung the Kahtawlik Nawku hpung lapran na kanawn mazum lam masa hte seng nna mung bai kaga ga san ni law law hpe mung htai ya ai lam Wa Sarabyin galaw lai wa ai.

Ga san ni htai ya ngut ai hpang ndai hkrun lam laman Wa Sarabyin shi a myit hta lak lak lai lai hkam sha mu mada lai wa ai lam mabyin ni hpe mung tsun hti dan lam Wa Sarabyin galaw lai wa ai, Wa Sarabyin tsun ai hta, “Mother Teresa a mying hte matsan mayam masha ni hpe yu lakawn lam galaw nga ai ginra hta magam gun nga ai Mama ni a si mani sumnung shingdi ai shamu shamawt lam ni gaw matsing hpa rai nga ai. Lama ma bai lu la na ngu ai myit mada lam hpa n tawn da ai sha ma kaji ni, matsan mayan masha ni hpe ndai Mama ni yu lakawn lam galaw nga ma ai. Dai ni a anhte a prat hta, shada da marawn hkat, n kaw hkat, roi hkat re ai lam ni galaw nga ma ai, mung masa galaw ai masha ni shada da roi hkat, htingbu shada roi hkat, marawn hkat, anhte a kun dinghku kata hta pyi n kaw hkat, marawn hkat re ai lam ni galaw nga ga ai. Raitim mung, ndai Macedonia Mungdan na matsan masha ni hpe yu lakawn nga ai Mama ni a si mani lam ni hpe mu ai shaloi, Nawku hpung gaw kanu Nawku hpung rai nga ai ngu ai masa hpe hkam sha lu nngai, ndai sut gan ai majaw Macedonia Nawku hpung hpe chyeju dum ai.

“Kaga myit dum nga ai lam langai gaw Bulgaria Mungdan hta shawng nnan chyoi pra hkum hkam la ai ma kaji ni hpe chyoi pra hkum jaw ya ai lamang rai nga ai. Lai wa sai 1944 ning hta ngai chyoi pra ai hkum nnan hkam la ai mabyin hpe bai myit dum wa nna, Bulgaria ma ni hpe chyoi pra ai hkum nnan jaw ya ai aten myit hta grai hkam sha lai wa ai. Nawku hpung hku nna ma kaji ni hpe lakawn ai hpa majaw nga yang shanhte gaw naw kaji nga ma ai hte masha naw nsawn hkrum ai ni rai ma ai. Raitim mung ndai ma ni gaw myit mada shara law law nga nga ai ni rai ma ai hte lam maguphta kung zet galu kaba wa ra ai. Ma ni hpe chyoi pra hkum nnan jaw ya nga ai aten, ndai ma kaji ni marai 245 gaw Bulgaria Nawku hpung a matu myit mada shara rai nga ai, ngu nna nye a myit hta hkam sha lai wa ai” nga nna nbungli ntsa shiga la ai masha ni hpe Wa Sarabyin tsun lai wa ai lam Vatican shiga dap kaw nna shana dat nga ai.         

 Source : Vatican News