Bai hkrung rawt ai lam ngu ai gaw prat a yaw shada lam hte bandung re, nga nna Wa sarabyin tsun dat nga ai shiga!

Bai hkrung rawt ai lam ngu ai gaw prat a yaw shada lam hte bandung re nga nna wa sarabyin Francis tsun dat nga ai. Nnga mat wa sai Cardinal ni hte saradaw ni a matu November praw 2 ya shani San Peter nawku htingnu kaba hta nawng ya ai si ai ni a Missa hkungga mungga hta lahta na zawn hkaw tsun lai wa ai lam rai nga ai.

“Si na matu anhte shangai chying hkai wa ga ai nrai, hkrung rawt na matu she shangai wa ga ai rai nga ai” nga nna tsun let bai hkrung rawt ai de shang lawm lu na matu anhte galaw ra ai lam hpan 3 hpe mung tsun madi madun lam Wa sarabyin Francis galaw lai wa ai.

Dai hpan (3) gaw, Madu Yesu hpang de sit shani sa ai, shawng de sit nawt hkawm sa ai, kaga masha ni hpang de sit shani sa ai, ngu ai lam ni rai nga ai.

Wa sarabyin tsun ai hta, “Madu Yesu hpang de sit shani sa ai ngu ai lam hte seng nna ta tut magam bungli ni hte hkrang shapraw ra ai, ga shadawn anhte tinang a hkum hpe san dinglik yu mai ai lam ni gaw, shani shagu anhte hkrum kadup ai masha ni hta Madu Yesu hpe anhte mu mada ga ai kun? akyu hpyi ya ai hku nna dai masha ni hpe Madu hpang de woi sa ai lam galaw nga ga ai kun? shanhte hte ganawn mazum lam galaw ai hta tinang a arawng sadang, tinang a mying gum hkawng lam a matu chyu myit yaw shada nna ganawn mazum lam galaw nga ga ai kun? ngu ai lam ni hpe sum ru dinglik yu mai nga ai. Shawng de lahkam htawt sit nawt hkawm sa ra ai ngu ai lam hta gaw, shinggyim prat ngu ai gaw kanu a hkri tung kaw nna hpang let, ndai dinghta ga kaw nna bai pru wa ai aten du hkra shamu shamawt hkawm sa nga ra ai prat rai nga ai. Nnga mat wa sai Cardinal ni hte Saradaw ni a matu akyu hpyi ya nga ga ai aten, masha ni hpe akyu jaw lu na matu tinang a prat kaw nna pru hkawm sa ai ngu ai prat a grai ahkyak ai daw, yak hkak ai daw hpe nmai malap kau ga ai. Ndai gaw Madu hpang de ni htep sa wa lu na matu woi wa ya ai chying hka rai nga ai. Kaga masha ni hpe tsawra matsan dum lama lam madun shapraw ya a lam gaw htani htana asak de shang wa lu na chyinghka hpe grau kaba hkra hpaw la ai lam rai nga ai. Lama ma galaw na matu daw dan ai lam ni garai n galaw shi yang, jahtum shani Madu a man hta anhte du tsap ra na re ngu ai lam hpe galoi mung myit dum nga ra ga ai. Mungkan ga ntsa garu ai nsen ni law law a lapran anhte sak hkrung nga ga ai aten Madu Yesu a nsen hpe mung hkap na la lu hkra shakut ra ga ai, dai zawn galaw nga ga ai rai yang hkrung rawt ai de du shang wa lu na matu anhte a prat hpe lajang da ai lam tai na rai nga ga ai” nga nna Wa sarabyin hkaw tsun lai wa ai lam Vatican shiga dap kaw nna shana dat nga ai.                    

https://www.vaticannews.va/en/pope/news/2019-11/pope-at-requiem-mass-the-resurrection-aim-and-purpose-of-life.html

Add new comment

1 + 0 =

Please wait while the page is loading

Bai hkrung rawt ai lam ngu ai gaw prat a yaw shada lam hte bandung re, nga nna Wa sarabyin tsun dat nga ai shiga! | Radio Veritas Asia

Error

The website encountered an unexpected error. Please try again later.