Asia Bibi Hta Tsep Kawp Mara Nnga Ai Lam Pakistan Tara Rung Daju Kaw Nna Madi Shadaw Lam Galaw Dat Ya Sai

Asia Bibi ngu ai Kahtawlik shayi sha hpe Muslim makam masham hpe n gawn nsawn jahpoi asawng ai lam ni galaw ai ngu mara shagun nna si ari jaw je yang ai lam galaw na matu Islam hpung masha ni shawk shawn da ai lam hpe, Pakistan Mungdan Tara rung daju hta January 29 ya shani tara agyi kaba Asif Saeed Khosa kaw nna Asia Bibi  hta tsep kawp mara nnga ai lam  daw dan ya dat nga ai.

Ma marai (4) a kanu rai nga ai Asia Bibi hpe 2009 ning kaw nna htawng bang sharen da hkrum ai rai nna, 2018 ning October shata 17 ya shani hta kalang, Pakistan tara rung daju tara agyi kaba kaw nna mara nnga ai majaw shi hpe dat dat na matu amying jahkrak dat ya lai  wa sai rai nga ai.

Raitim, Muslim ni dai hpe nhkap la ai majaw tara rung a  daw dan ai hpe lai nna ning hkap ai hte  kasu gabrawng ai lam ni galaw wa ma ai. Dai majaw November praw 7 ya shani Asia Bibi hpe htawng kaw na shapraw la nna shim ai shara langai de sit makoi da lai wa ma ai.

Asia Bibi hpe si ari jaw je yang ya na matu Muslim maga na bai shawk shawn ai lam hta n jaw ai sake ni hte mara shagun da ai lam ni mu mada ai majaw  shawk shawn da ai lam hpe ning dang kau ai re  lam chye lu ai.

 “ Mara lu ai ngu nna sak se madun na lam nnga ai masha langai hpe si a ri jaw na matu anhte nmai galaw ai lam, nteng nman ai sake ni hpe madun nna masha langai hpe si ari jaw je yang lam galaw ya na matu hpyi shawn ai masa she rai nga ai “ nga nna Tara agyi kaba Asif Saeed Khosa tsun dat nga ai.

Ya na zawn je yang ai lam hta shut ai lam sakse madi madun lu ai rai yang ,tara rung a daw dan ai hpe bai gram lai na matu jin jin re ai lam tara agyi kaba kaw nna matut tsun dat nga ai.

Asia Bibi hte shi nta masha ni gaw, n dai tara je yang daw dan ngut ai hpang Pakistan Mungdan kaw nna pru let kaga Mungdan ni hta shingbyi nga na  ahkaw hkang lu sai re  lam Vatican shiga dap internet laika man hta ka da ai hte maren chye lu ai.

Source: Vatican News

Add new comment

8 + 2 =

Please wait while the page is loading

Asia Bibi Hta Tsep Kawp Mara Nnga Ai Lam Pakistan Tara Rung Daju Kaw Nna Madi Shadaw Lam Galaw Dat Ya Sai | Radio Veritas Asia

Error

The website encountered an unexpected error. Please try again later.