Anglican Saradaw Kaba Kahtawlik Jau Aya Hkam La

Anglican nawku hpung Rochester Saradaw kaba tai lai wa sai Saradaw Michael Nazir-Ali gaw 2021 ning October shata 30 ya shani Kahtawlik jau aya hpe hkam la lai wa sai.

Saradaw Nazir-Ali gaw shawng de Canterbury a Saradaw kaba hku lit shatsam da hkrum lai wa sai rai nna Westmister a Cardinal Vincent Nochols gaw Saradaw Nazil-Ali hpe Lodon kaw na Our Lady of the Assumption nawku jawng hta jau aya hkam la ya sai .

Asak ( 72 ) ning rai sai Saradaw Nazir-Ali gaw lai wa sai shata hta sha Personal Ordinariate of Our Lady of Walsingham de shang wa ai rai nna Kahtawlik nawku hpung masha tai wa ai rai nga ai.

Jau aya hkam ya ai Cardinal kaba gaw Wa Jau Ali a myit jasat, htauli htaula myit hte Chyoipra ai Wenyi a jasu shadum ya ai lam ni yawng gaw Kahtawlik nawku hpung sasana magam a matu grai madi shadaw shingdep shingtau ya lu na hpe myit mada ai lam tsun nna Personal Ordinariate of Our Lady of Walsingham hte rau anhte yawng Wa Jau hpe kabu gara ai hte alum ala hkap tau hkalum la ai lam tsun ai.

Personal Ordinariate of Our Lady of Walsingham hpe ya hkring sa la mat sai Wa Sarabyin Benedict XVI gaw lai wa sai 2011 ning hta hpaw hpang da ai rai nna Anglican kaw na marai langai hkrai dinghkrai nre sha, wuhpung wuhpawng hte nawng rai Kahtawlik nawku hpung de shang wa ai ni matu yaw shada nna hpaw tawn da ai rai nga ai hte Anglican a ji woi lai htung masa mung n hten mat hkra hkang zing da ya ai lam re nga nna tsun ai.

Ndai Ordinariate gaw Kahtawlik nawku hpung ting hte matut mahkai nga lu ai zawn Anglican a lai htung masa hku sharin hka ja ai, akyu hpyi ai lam ni hpe mung matut galaw lu na matu ahkang jaw da ai nga nna Wa Jau Nazil shiga dap de hpaw tsun da nga ai lam thetablet.couk/news website shiga kaw na chye lu ai.