American Mungdan California Mungdaw Sharaw Wan Hkru Hkat Ai Hta Asak Si Hkrum Lai Wa Sai Ni A Matu Wa Sarabyin Akyu Hpyi Ya Lai Wa Ai Shiga

American Mungdan California Mungdaw hta laja lana hkru hkat nga ai sharaw wan a majaw masha marai 77 asak si hkrum lai wa sai hte hkying mi (1,000) jan mung naw mat nga ai, si ai jahpan mung shani shagu naw jat ding yang rai nga ai, nga nna dai Mungdaw kaw nna lit nga ai ni tsun ndau ai lam galaw da nga ma ai.

“Asak si hkrum lai wa sai ni yawng hpe Karai Kasang shi a simsa ai hta hkap la ya rit ga, yawn hkyen hkrum nga ai dum nta masha ni hpe shalan shabran lam jaw ya rit ga, sharaw wan hpe shingdang sat shamit kau lu hkra shakut n gun dat shang lawm nga ai ni, hkye mawoi lam hta garum ya nga ai ni yawng hpe mung karai kasang garum ya nga u ga” nga nna lai wa sai laban shani Wa Sarabyin Francis kaw nna akyu hpyi ya lai wa ai.

Sharaw wan matut nbra wa hkra malawng maga shingdang shamit ai lam ni galaw lu nga sai rai tim, Nov 30 ya shani hkan she tsep kawp shamit kau lu na masa nga ai, ya du hkra hkru hkat mat sai shara gaw Acre wan 19 daram  rai nga sai hte, dum nta 12,000 jan mung hkru hkat lawm mat sai re, nga ai.

“Wan tsin yam grai sawng ai shara hkan na masha ni hpe shara sit nawt yen da shangun ai lam ni galaw da ai, sawng dik ai shara gaw Paradise ngu ai shara hte grup yin ginra ni hta re, dai grup yin na masha maraai 30,000 daram hpe sit nawt da ai lam galaw da nga ma ai” nga nna Sacramento Saradaw Ginwang a lit hkam Saradaw Jaime Soto tsun da nga ai. Lai sai November 18 ya shani hta mung Saradaw Soto kaw nna wan tsin yam hkrum masha ni matu Missa hkungga laksan nawng ya lai wa ai, San Thomas More Jau Ginwang, Nawku Htingnu nga ai shara maga ang ang de wan hkru shani sa wa nga ai majaw, dai shara grup yin na masha ni lawan sit pru wa na matu mung saradaw Soto kaw nna saw shaga dat nga ai. Los Angeles Saradaw Ginwang na Charitas garum ningtum uhpung hte, dai Saradaw Ginwang na, Jau Ginwang garum ningtum uhpung ni, hpaji jawng hte seng ai garung ning tum uhpung ni kaw nna mung wan tsin yam hkrum masha ni hpe garum ning tum lam ni jaw ya nga ma ai, nga nna CNS shiga dap kaw nna shana dat nga ai. 

Source : Catholic News Service