All Souls' Day Galaw Ai Lam

Kahtawlik Hpung masha ni gaw, si mat wa sai hpu nau ni yawng a matu akyu hpyi ya ai lam hpe ahkyak ai magam lit langai hku masat da ai rai nga ai.

Dai majaw shaning shagu November praw 2 ya shani Mungkan ting na Kahtawlik Hpung masha ni ndai lamang hpe galaw ga ai.

Myitkyia Sasana hte Manmaw, Lashio Sasana Ginwang hta daining na All Souls' Day ngu ai si mat sai ni yawng a matu akyu hpyi ai poi nhtoi hpe Saradaw, Jau Mama, Tara hkaw Sara ni hte hpung masha ni law law shanglawm let hkik hkam ai hku galaw lai wa sai hpe mu lu nga ai.

Nkau shara hkan, “Lup Tsan Poi” ngu tsun lang ma ai.All Souls’ Day ndu shi yang, bat mi bat lahkawng tau hkrau nna, si mat sai ni a lupra ni hpe jasan jaseng galaw ai ya ai lam rai nga ai.

Raitim madung gaw, bai hkrung rawt wa na lam hpe myit mada let, Ngarai mung kaji kaw nga ai si mat sai ni a Wenyi ni yawng sumsing mungdan du lu mu ga matu akyu hpyi garum ya ai lam rai nga ai.

October shata 31 ya shana galaw ai Halloween Day, November praw 1 shani galaw ai All Saints’ Day ngut ai hpang matut manoi galaw ai poi lamang mung rai nga ai.

Chyum laika hta, Ga shaka dingsa Myihtoi Esaia 26:19, Daniela 12:2, Ga shaka ningnan Yawhan 5:24, 6:54 hte Roma 6:3-11 ni kaw mu hti la mai nga ai.