Alam Wudang Bum hte Njang Yang Jau Ginwang Nnan Hpaw Na Matu Dawdan

12 May 2019, Alam

Tanghpre Jau Ginwang kata na Amu Gun Hpung ni a hkrum zup bawngban hpawng hpe Alam Mare, St.Mary Nawku Jawng Wang hta dai ni May shata 12 ya jahpawt galaw lai wa ma ai.

 Zuphpawng hta, Myitkyina Sasana Sagu Rem wa, Wa Saradaw Francis Daw Tang, Chancellor rung kaw na Wajau Paul Wanghte Lum Dau hte Tanghpre Ginwang up Wajau Stephen Supma Sut Awng, Alam kaw nga ai Wajau James Gawlu La Doi, Njang Yang Buga de hpung masha ni hpe yu nga ai Wajau Patrick U-law Naw Awng hte Alam Bum Komiti ni, Ginwang kata na Ma Ma ni, Tara hkaw Sara/ Sarama ni , La Hpung, Numhpung hte Ramma ni sa du shang lawm ma ai.

Jahkrum bawng ban ai hta Tanghpre Jau Ginwang kaw nna, N Jang Yang hte Alam Jau Ginwang lahkawng garan masat na lam hpe  bawngban jahkrup ma ai.Bai nna, Alam, U-byit hte Dumgan Mare na hpung masha ni hpe woi awn yu nga ai, Wajau James Gawlu La Doi  hkawm sa hkawm wa galaw ai Sasana magam lam hta jai lang na matu Mawdaw langai tangshawn hpyi da ai lam hte Wudang Bum hte seng ai lam hpe mung bawng ban jahkrup ma ai.

Zuphpawng hte maren, du wa na 2020 hta Tanghpre Jau Ginwang kaw nna Alam Wudang Bum hte Njang Yang Jau Ginwang lahkawng hpe tara shang  garan masat mat na re lam, ndai 2019 ning laman ya nga ai Jau ni hte Jau Ginwang hkrang langai hku shamawn shakyang let Nawku Daw Jau ai lam, kaga Hkungran ga shaka la na lam ni hte Kashin Kamun hkam ai lam ni yawng hpe tinang a Jau hte jahkrum let galaw na, matsing ningting mying jahpan bang (Register) galaw ai lam ni hpe Ginjaw Tanghpre Jau Ginwang kaw sha galaw mat na, lamu ga jarit , Mare kahtawng masat ai lam ni hpe Hpung masha htinggaw jahpan chyarang atsawm hkrak chye ai hpang  masat shagrin mat na matu myit hkrum daw dan ma ai.

Wa Saradaw tsun ai hta“ Nawku Hpung a matsun ai rip kawp tara ni hta, “ Quasi “ ngu ai Jau Ginwang byin tai wa lu na matu tau nau hkyen lajang ai, masing masa hpe shawng hkyen mat wa n htawm, hkum zup jang she Jau Ginwang hku nna masat ai re, ngai du ai hpang shawng nnan masat ai gaw, Hpakant  Jau Ginwang de a hpang Lawa, Hting Nan , ya Zang Yaw hte Pang Sau kaw mung shagrin masat ai lam gaw nnga shi ai, n dai shara ni hta ya dai ning 2019 htum du hkra, Jau Ginwang langai kaw nga ra ai, Jau nta hte kaga ra mara ni hpe galaw shajin rai nna, aten ladaw masat let hpaw shagrin mat wa yang grau kaja na re” nga nna tsun lai wa ai.

Hpung masha ni kaw nna tsun ai hta, masat shagrin da ya jang gaw hpung shawa n-gun law ai n law ai nga nna, myit kaji taw nga na lam gaw nnga ai, dang di lu ai daram anhte Nawku Hpung, Jau Ginwang galu kaba lam hpe jawm shakut na matu jin jin rai nga ai, galaw wa jang gaw masha n-gun gaw law wa na re ai lam hpaw tsun dan ma ai.

Dai hte maren, Wajau James Gawlu La Doi tang shawn hpyi ai Mawdaw hpe mung , Alam Wudang Bum Komiti,Tang Hpre Jau Ginwang hte Diocese Rung kaw nna jawm pawng shakut  let  Mawdaw langai (Sen 50) hpe ndai shata laman tam lajang ya na matu myit hkrum daw dan da ma ai. Wajau James Gawlu La Doi gaw, Alam Wudang Bum tsawmhtap galu kaba hkikhkam ai shara langai hku galaw sa  wa lu na lam masing masa ladat shaw hpang na matu Wa Saradaw kawn shatsam da hkrum ai hte ya ten Alam Buga kaw wa nga ai shata masum ram na sai rai nna, Alam, U-byit hte Dumgan Mare ni hta Missa Nawng , Nawku Daw jau lamang ni hpe woi awn nga ai rai nna, hkawm sa hkawm wa hkrun lam a matu Cycle Mawdaw nnga ai majaw tangshawn hpyi da ai re lam chye lu ai.

Wa Jau hku nna “ Ginwang hpaw ra ai law law nga ai hta na Alam hpe madung da nna shawng nnan lajang sa wa ai lam gaw, n dai Wudang Bum a majaw re ngu nna chye na ai, magam bungli kaba hpe gunhpai na matu htawt sit na lagaw shatai na Mawdaw hpe tang shawn hpyi ai re , majoi mi tinang tinggyeng jai lang pyaw na matu n re ai lam, ya na zawn yawng hte seng ai anhte a Wudang Bum re ai majaw ndai lam hpe ahkyak la madung shatai bawng ban na matu sa du hpawng ai ni yawng hpe chye ju dum ai lam, yawng gaw Nawku hpung a matu shakut nga ai hkrai re, magam bungli shawng lam masing masa ni  hpe awngdang ai  hte rau jawm gun hpai sa wa ga, “ nga nna tsun lai wa ai.

Wudang Bum Shagrau Poi galaw ai shaning 30 jan ning na sai rai tim, ya ten du hkra Akyu Hpyi Gawk hte Hpung Masha ni hkring sa shara, Nawku Daw Jau ai ten hta dung na shara ni nnga shi ai hte hkawm wa hkawm sa Bum Lung ai lam dingyang shaning shagu yak hkak ai lam ni nga ai.Wan n lu ai majaw mung Poi lamang galaw ai , lam hta mayak mang hkang law law nga ai hpe mu mada ai lam Wa Jau James Gawlu La Doi hku nna tsun lai wa ai.

Wajau La Doi hku nna, Alam Wudang Bum grau galu kaba tsawm htap wa na matu shawng nnan, Mihprap wan lu hkra hte  Lam hpe madung da galaw sa wa ra ai lam, Wan lu na matu sen 1000 hku ma ra na re hpe n tsa lam chye lu ai, dai daram ma na rai tim, Saradaw Ginwang langai ting hte seng ai re majaw ndai hpe byin hkra galaw mat na masing nga ai, de hpang she  hkai sun hte kaga ra ai lam ni hpe matut manoi galaw mat na re ai lam tsun lai wa sai.

Wa Saradaw hku nna, Alam Wudang bum mayan hta Missa Hkungga kaw jai lang na matu Tsabyi sun galaw na lam hpe tang shawn lai wa sai hte Alam Wudang Bum hte seng nna Wajau La Doi hte Komiti ni, jau man Mare masha ni hte rau, Nawku hpung masha ni  yawng jawm pawng shakut let tsawm htap galu kaba hkra galaw sa wa ra ai lam tsun lai wa sai.

Bai nna, Njang Yang maga de Ma Ma Boarder hpaw sa wa na lam hte seng nna mung zuphpawng hta tsun jahta lai wa ma ai.Ma Ma ni hku nna gaw, dai shara de gasat gala n nga nna shimlum lam lu sai hte gaw mai byin na re lam, Ginjaw kaw nna shangun jang gaw shakut wa na re lam tsun lai wa ma ai.

“Njang Yang maga de Mare Kaba  nnan gaw gap na masing  nga ai nga nna shiga na ai, Asuya kaw nna mung Hpyen yen dabang ni tsip kawp pat kau na masing nga ai re majaw Hpyen yen ni  bai wa ai shaloi masan sa na matu ya kaw nna zai ladat hte tau nau hkyen lajang let hpu nau hpyen yen ni hpe woi lakawn ai lam,shara jahkrat ya ai lam, Nawku Hpung hte seng ai shara, ga shadawn, Ma Ma Boarder hpaw na rai yang , shara ni hpe Asuya hte jahkrum nna masat da ai lam ni hpe mung galaw na matu myit ga” nga nna zuphpawng sa ai ni hpe Wa Saradaw Francis Daw Tang kawn matsun madun lai wa sai.

Thomas