(71) Ninhpring Jinghpaw Mungdaw Nhtoi Hpe Hkik Hkam Ai Hku Galaw Na Hkyen Lajang Nga

Jinghpaw Mungdaw Asuya ni kaw nna woi awn nhtawm, Wunpawng Htunghking Hpung Ginjaw ni ginrun shang lawm nna 71 Ninghpring Jinghpaw Mungdaw n htoi hpe 2019 January shata praw 9 ya shani kaw nna 12 ya shani du hkra masum ya  galaw na re ai lam chye lu ga ai.

71 ninghpring jinghpaw Mungdaw n htoi  hpe hkik hkam ai hku galaw lu na matu laiwa sai December shata kaw nna, Manau wang shatsawm jahtap mawn sumli ai lam hte kaga ra mara galaw shajip ai lam ni hpe seng ang ai Poi Shabyin Shatai Komiti ni woi awn galaw hpang nga masai rai nga ai.Dai hte maren, Manau Shadung hpe tsi nnan chya shatsawm ai lam, Manau nta ni hpe shatsawm jahtap bai gram jat ai lam, Manau wang shang chyinghka lam muk wa ni hpe tsi chya shatsawm ai lam, State Pyin Ra ni hte Poi Shingra Bu Shu Tabin ni hpe nnan bai gram galai ai lam ni ,Manau Wang kata hta Wan Slide ni jat bang ai lam hte Wan pu nnan galai bang ai lam ni galaw da ma ai.

Poi Shabyin Shatai Kaomiti (Mungdaw Asuya) gaw nnan daw hta  “ (71) ning hpring Kachin Mungdaw N’htoi “ ngu tsun shamying let galaw na hkyen ai hpe Jinghpaw Wunpawng Mung shawa ni law law n ra sharawng ninghkap ai hte seng ang ai Salang ni kawn Mungdaw Hkingmang Daju kaw du hkra sa du let mi moi kaw nna 70 ningtup lang hkrat wa ai  ‘ Jinghpaw Mungdaw N’htoi “ ngu sha lang na matu hpyi shawn ai hte maren ' Jinghpaw Mungdaw Nhtoi' ngu bai gram sharai masat galaw na re ai lam chye lu ai.

( 71 ) ninghpring jinghpaw Mungdaw n htoi hta, Htunghking Hpung ginjaw hku nna woi awn let lahkawng ya Manau Nau na re lam, dai hte maren, Januray praw 8 ya shani mung , Manau shamawn shakyang ai lam galaw lai wa ma ai.Poi Masum ya laman, Jinghpaw Htunghking Kahprek Karite Shingjawng Poi, Fusal Shingjawng Poi, Pite Kyaw Shing Lonn, U Mun Gayat (Batmenton) shingjingaw Poi, Ballyball, hte Manau Shayi shingjawng Poi, Jinghpaw Wunpawng sha ni a htunghking ka hkrang hpan 6 hte rau kaga Myen Sam myu sha ka hkrang ni, yu ngwi pyin ra lamang ni hte Shana Shat Manhkrum Daw sha poi ni  hpe Htunghking Hpung Ginjawng kaw nna woi awn galaw mat na re ai lam chye lu ga ai.

Jinghpaw Mungdaw Nhtoi hpe  lai wa sai ten hta grai hkikhkam ai hku galaw lai wa sai raitim, 2011 ning hta tinang Shanglawt hte Myen Hpyen Dap ni gasat gala byin wa ai kaw nna Hpyen Yen tsin yam hkrum masha ni law wa ai hte maren, Mungdaw Nhtoi hta Manau nau ai lam hte htunghking hte seng ai poi lamang ni n-galaw byin mat ai rai nna, ya dai ning gaw nnan daw hta myit nhkrum ai wuhpung n kau ni nga ai raitim atsawm bai bawngban jahkrup myithkrum dawdan la lu sai re majaw Mungdaw Nhtoi hpe Htunghking poi lamang ni hte rau wu wu di di galaw mat na matu lajang ai re lam ,71 Ninghpring Jinghpaw Mungdaw Nhtoi hta Mungdan Hpaji Jaw Salang Daw Awng San Su Kyi hte Asuya Salang ni mung sa du lawm na re lam chye lu ga ai.

Thomas

Add new comment

3 + 0 =

Please wait while the page is loading