(3) Lang Na Myitkyina Saradaw Ginwang Ramma Ni A Ginsup Poi Galaw Hpang

Myitkyina Saradaw Ginwang kata na Ramm ni a (3) lang ngu na Ginsup Poi Kaba (Sport Day) hpe Tanghpre Jau Ginwang, Sumsing Lamu A Hkawhkam Jan Nawku Jawng wang hta, Dai ni August shata praw 1 ya shani kaw nna galaw hpang nga ma ai.

Hpaw poi lamang n-galaw shi yang, Ginsup poi hpe ap nawng ai Missa hkungga hpe Jahpawt 7:30 AM hta Tanghpre Ginwang up Wajau Stephen Supma Sut Awng hte Jau ni marai 3 woi awn nawng jau ya lai ma ai.

Missa ngut ai hpang, hpaw poi lamang galaw ai hta Myitkyina Sasana Sagurem wa Wa Saradaw Francis Daw Tang sa du nna, Ramma ni hpe n-gun jaw mungga tsun, shaman ya sai hte lai di sum ri rep kadoi let Ginjaw Ramma ni hte ap nawng ramma ni a mahkawn shakawn ka manawt lamang ni hte rau Ginsup Poi lamang hpe hpaw hpang dat ma ai. Hpaw poi lamang hta Myikyina Ginwang up Wajau Peter.Dr.Hka Awng Tu, Wajau John Galang La Raw , Wajau Mikeal Myint Awng,Shadau Jau Ginwang up Wajau John Mungngawn La Sam hte Tanghpre Jau Gingwang up Wajau Stephen Supma Sut Awng, Hpakant Ramma ni hpe woi awn let du sa ai Hpakant Wajau Francis Jangma Awng Li, wuhpung shagu na Mama ni, Tara Hkaw Sara/num ni, Ramma ningbaw ni hte Buga masha ni sa du shang lawm ma ai.

Ndai lang na ginsup poi lamang hta Jau Ginwang 17 kaw na Ramma ni shang lawm na matu jahpan jaw da ai raitim Putao, Lungsha Yang, Kata the Monyin Jau Ginwang ni lam amyu myu a majaw n lu shang lawm mat ai lam Ramma ningbaw John Paul Nhkum Htoi Awng tsun ai the maren chye lu ai.

“Jau Ginwang 17 shang lawm na matu anhte Parish shagu na ramma ni ningbaw ni hte June shata kaw zuphpawng galaw ai shaloi jahpan jaw da ai raitim nkau ni lam amyu my a majaw nlu shang lawm mat ai lam nga ai, dai majaw ya anhte Jau ginwang 13 kaw na Ramma ni hte ginsup shingjaw ai lamang galaw galaw nga ga ai” nga nna tsun lai wa ai.

Ginsup poi hpe August praw langai ya shani kaw nna praw manga ya shani du hkra galaw na rai nna, Futsel, Volleyball, Table Tennis,Chess, Meter 100 gat shingjawng ai lam, num kasha ni laksan u-mun ginsup ai lam the La kasha ni Ka din Chin Loon ginsup shingjawng ai lam ni galaw mat na re ai lam, tang pyaw ginsup lamang hku nna hpang jahtum shani Wa Rim shingjawng ai lamang hpe mung galaw na re ai lam chye lu ai.

Dai ning na Ramma Sport Day hta laklai ai hku nna Ramma ni shawng shaning na hta grau sa du shang lawm ma ai, shawng de lahkawng lang galaw ai hta ramma 200 jan ram sha sa du lawm ai raitim dai ning gaw 300 jan sa du shang lawm nga ma ai lam DYC Ramma ningbaw tsun ai.

“ Shawng ning na the shai mat ai gaw, lai sai 1 lang the 2 lang na Ginsup Poi hta gaw Ramma n-gun 200 jan ram sha shang lawm lu ai raitim dai ning gaw apnawng Ramma ni yawng hte rai yang Ramma n-gun 320 ram shang lawm ai “ nga nna John Paul tsun lai wa ai.

Lai wa sai 2017 the 2018 ningna Ramma ginsup poi lamang ni hpe Myitkyina Edin San Luka Chyum Jawng wang hte Mogawng Jau Ginwang St.Peter Nawku Jawng Wang ni hta galaw lai wa sai lam chye lu ai.

( Npu na sumla:Ginsup Poi Hpaw Poi Lamang hta sa du shaman ya ai hte akyu hpyi ya ai Wa Saradaw Francis Daw Tang)

Add new comment

16 + 0 =

Please wait while the page is loading

(3) Lang Na Myitkyina Saradaw Ginwang Ramma Ni A Ginsup Poi Galaw Hpang | Radio Veritas Asia

Error

The website encountered an unexpected error. Please try again later.