Wa Sarabyin a munnga, Oct 22

2013 ning Oct 10 ya shani hkaw tsun lai wa ai Wa Sarabyin Francis a mungga

Lk 11:5-13      “Bai shi shanhte hpe, Nanhte hta na langai mi jinghku lu ai rai nna, yuptung hpawa e shi kaw sa nhtawm, Jinghku wa e, muk tawng masum ngai hpe gan hkoi ya e; nye a jinghku wa hkrum lam de na ngai kaw du ra ai rai nna, shi hpe jaw sha na hpa mung n lu nngai, ngu wu yang, nhku de na wa gaw, Ngai hpe hkum shatsang et; chyinghka mung la kau se ai, ngai sha ni mung ngai hte rau yup ku hta rai mat ma sai: nang hpe jaw na ngai n rawt lu ni ai, ngu nna hkap htan na wu ni? Ngai nanhte hpe tsun ma de ga, jinghku re ai nga nna n rawt jaw hkraw rai ti mung, shi akroi anoi hpyi nga ai majaw, dai wa hpe ra mara rawt jaw na wu ai. Bai, nanhte hpe ngai tsun ma de ai gaw, Hpyi mu, shaloi nanhte lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai. Kaning rai nme law, hpyi ai wa kadai mung lu la ai; tam ai wa mung mu la ai, akawka ai wa hpe mung hpaw ya na ra ai. Nanahte hta kadai kawa mung, kasha gaw muk hpyi yang, nlung jaw na wu ni? nga hpyi yang, nga a malai lapu jaw na wu ni? u di hpyi yang, n-gawgawk jaw na wu ni? Dai rai nna, nanhte n hkru nga myit dai ni pyi, tinang a kasha ni hpe kaja ai kumhpa chye jaw myit yang gaw, dai hta grau nna sumsing lamu na Kawa gaw, shi e hpyi ai ni hpe dai chyoi pra ai Wenyi jaw na n rai hka! ngu nna tsun mu ai”

Anhte gara hku akyu ga ai kun? Galoi mung hpyi taw ai lam rai nga ai majaw mawn nga ai lam langai masa zawn byin nga ai kun? Anhte ra nga ai chyeju kum hpa lu la na matu, tinang a hkum hpe karai kasang a man hta ap ya, gwi gwi sit shang ai masa hte hpyi ai lam rai nga ga ai kun? Ndai lam ni hpe dinglik yu mai nga ga ai. Marai rawng ai myit hte karai kasang a man de gwi gwi sit shang ai lam nnga ai akyu hpyi ai lam gaw, kaja wa akyu hpyi ai lam nrai na rai nga ai. Karai kasang a masin salum chying hka hpaw ya na matu gwi gwi akawak gwi ra ai, karai kasang anhte a akyu hpyi ga ni hpe madat ya na re ngu ai lam hpe gwi gwi kam hpa gwi ra ai. “Hpyi mu, shaloi nanhte lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai” nga nna madu yesu tsun ai.

Bai ahkyak ai ga san langai mi gaw, karai kasang a masin salum chying hka hpe gara hku akawk na anhte chye nga ga ai kun, ngu ai lam rai nga ai. Kabu gara ai shiga hta, “nanhte n hkru nga myit dai ni pyi, tinang a kasha ni hpe kaja ai kumhpa chye jaw myit yang gaw, dai hta grau nna sumsing lamu na Kawa gaw, shi e hpyi ai ni hpe dai chyoi pra ai Wenyi jaw na n rai hka!” nga nna madu yesu tsun ai. Anhte gwi gwi akyu hpyi ga ai shaloi, shaman chyeju kum hpa ni hpe madu yesu jaw ya ai, dai sha nrai shi a hkum hpe nan chyeju kum hpa hku nna anhte hpe jaw ya ai, Chyoi pra ai Wenyi hpe jaw ya ai, dai Wenyi gaw madu Yesu shi hkum nan rai nga ai. Anhte hpyi lajin ai lam hpe laika sa ai zawn langai ngai a lata hta bang dat ya nna anhte hpang de shalai ya ai masa madu yesu galoi n galaw ai. Dai anhte hpyi ai lam ni hpe shi madu hkum nna hpai nna, anhte hpe sa jaw ya ai rai nga ai. Hkrak nga yang anhte a akyu hpyi ai lam hta, jaw ya na matu anhte hpyi nga ai lam ni gaw chyeju kum hpa hpe makai ya ai makawp mai sau sha rai nga ai, dai makawp hte makai da ai kata hta na kum hpa madung gaw madu yesu shi hkum nan rai nga ai. Shi hkum hpe shi hkum nan hpai nna anhte hpe sa jaw ya ai rai nga ai.

Kabu gara shiga hta anhte mu lu ai mabyin ni hta, masha nkau mi gaw chyeju kum ni hpa lu la yang, la nna atsin nga wa mat ai lam ni galaw ma ai hpe mu lu nga ga ai. Ga shadawn, mang gang kap ai masha marai shi hpe shamai dat ya ai lam hta, langai chyu sha madu hpang de bai gin htang wa nna chyeju kaba sai nga nna wa tsun ai. Jericho ngu ai mare na myi kyaw ai wa hpe shamai dat ya ai shaloi karai kasang hpe chyeju dum ai the shakawn shagrau lam galaw ai hpe mu lu nga ai.

Anhte gwi gwi akyu hpyi na ra ga ai. Lu la na re ngu nna pyi nmyit mada gwi ai lam a matu hpyi ra nga ai, dai gaw karai kasang shi hkum nan hpe jaw ya na matu hpyi gwi hkra anhte tinang a hkum hpe ganawng ra na ga ai.

Anhte hpyi ai chyeju kum hpa ni mahkra hpe madu yesu shi hkum nna hpai sa ya nga ai. Anhte hpyi ai chyeju hkum hpa ni hpe hpai sa ya ai madu yesu hpe chyeju ndum ai lam n galaw ga. Shi madu hpe hkap la shakawn shagrau ai, nawku ai lam ni galaw nna shi madu jaw ya ai, shi a hkum hpe chyeju dum ai myit hte hkap la nga ai.

 

 

 

 

Add new comment

15 + 1 =

Please wait while the page is loading

Wa Sarabyin a munnga, Oct 22 | Radio Veritas Asia

Error

The website encountered an unexpected error. Please try again later.