Wa Sarabyin A Mungga (Makam Masham Hka Ja Ai Lam)

Pope Francis delivers his speech /(AP Photo/Alessandra Tarantino)

Tsawra ai  Nu Wa Hpu Nau ni, n-dai makam masham hka ja ai ndai lamang kaw nna Wa sarabyin Francis hkaw tsun lai wa ai mungga ni hpe shapoi ya nga ai rai nga ai. Ya ndai bat shapoi ya na mungga gaw ; Mt 9:9-13-

 “Yesu gaw dai shara kaw na sit sa wa yang, kang hta ai sum e dung nga ai Mahte ngu ai wa hpe shi mu hkrup nna, shi hpe Ngai kaw hkan nang rit, ngu wu ai: Shaloi shi rawt nna shi kaw hkan nang nga ai. Dai hpang dai wa a nta e dung nga a yang, yu mu, kang hta ai ni hte yubak kap ai masha law law wa, Yesu hte shi a sape ni hte rau sa dung nga ma ai. Hparishe ni dai mu ma yang shanhte gaw, Kang hta ai ni hte yubak kap ai ni hte rau, hpa rai nanhte a sara gaw shat pawng sha a ta? nga nna shi a sape ni hpe san mu ai. Shi gaw dai na jang, N-gun ja ai ni tsi sara n ra ma ai; machyi ai ni sha ra ma ai. Dai rai nna, Hkungga jaw ai lam n rai, matsan dum ai lam she ngai tsaw nga nngai, nga ai ga hpe chye lu mu ga, sa sharin la mu: Kaning rai nme law, ding hpring ai ni hpe shaga na n rai, yubak kap ai ni hpe shaga na she ngai sa du nngai,”  nga ai ja chyum mungga daw rai nga ai.

       Kang hta sha ai, shut hpyit mara lu ai Mahte a myi man hpe madu yesu yu dat ai shaloi, ja gum hpraw chyu sha shi a prat a matu a-hyak dik re, ngu ai masa hpe mu lu nga ai. Raitim mung, shi hpe azi yu nga ai Madu Yesu hpe shi mu nga ai a ten hta gaw, shi a masin salum hpe madu Yesu azi yu nga ai, ngu ai lam hpe Mahte hkam sha lu nga ai. Madu a azi mada yu ai lam gaw Mahte a masin salum hpe shapoi la mat wa ai the shi a prat hpe galai shai lam kaba byin pru shangun sai rai nga ai. Madu Yesu shi a masin salum hpe azi mada yu nga ai, ngu ai lam hpe mahte hkam sha lu dat ai the rau kalang lata rawt nna Madu a hpang shi hkan nang mat wa ai rai nga ai.

     Madu Yesu a azi mada yu ai lam gaw anhte hpe sharawt ya nga ai, anhte a kadang taw ai prat hpe sharawt shatsap ya ai. Madu Yesu a azi mada yu ai hpe hkrum ai ni kadai rai tim mung, mi na masa hta nan nan nrai nga lu nga ai. Madu yesu a azi mada yu ai lam gaw anhte hpe kaji kadun kau shangun ai lam nbyin shangun nga ai zawn, anhte hpe shagrit kau ya ai, gaya jahkrum kau ya ai lam mung galoi nbyin shangun nga ai. Shi madu a azi mada yu ai lam gaw rawt tsap na matu saw shaga ai lam, rawt jat galu kaba wa na matu lam woi la ai lam, marai rawng magrau grang ai myit hte shawng de sit nawt hkawm sa na matu saw shaga ai lam she rai nga ai. Shi Madu a azi mada yu ai lam gaw, shi madu anhte hpe tsawra nga ai ngu ai hkam sha lam anhte a kraw lawang hta byin pru shangun nga ai hte, madu anhte hpe tsawra nga ai ngu ai lam hpe hkam sha lu ai lam a marang e magrau grang marai rawng ai myit hte shawng de sit nawt hkawm sa nga na matu, shi madu a hpang hkan nang na matu anhte hpe n gun shabyin ya nga ai rai nga ai.

      Raitim mung, Madu Yesu gaw myit shayup shamau lam ni galaw lu ai man dan sara nrai nga ai majaw Madu a azi yu ai lam gaw man dan masa teng sha nrai nga ai. Yawng hpe Madu Yesu yu mada nga ai, yawng langai hpra hpe mying shatut mying gang nna shaga nga ai zawn, Madu yawng hpe yu mada nga ai ngu ai lam hpe mung masha shagu hkam sha lu nga ai. Ndai Madu Yesu a yu mada ai lam gaw masha yawng hpe galai shai lam byin pru shangun nga ai. Madu Yesu hpe masum lang tup nyet kau lai wa ai kasa Petru, madu Yesu shi hpe azi mada yu da ai hpe hkrum dat ai shaloi shi a prat galai shai mat wa ai. Udang ntsa kaw nna hpang jahtum azi mada yu ai lam madu galaw lai wa ai. Shi a kanu hpe mada yu ai, shi a kasa hpe mada yu nna anhte hpe madu tsun ai gaw, “ ndai Kanu gaw nanhte a kanu rai lit dai, Nawku Hpung gaw nanhte yawng a kanu rai lit dai” nga nna madu tsun ai, dai hpang shi hte rau noi nga ai hkra maga na lagut damya wa hpe Madu Yesu azi mada yu ai.

       Madu Yesu si ai kaw nna bai hkrung rawt wa ai hpang hkrit gari nga ai kasa Petru hpe Madu Yesu kalang bai azi mada yu nna, “nang ngai hpe tsawra nga nni, ngu ai ga san 3 lang tup madu shi hpe san lai wa ai. Ndai shara hta, anhte hpe mung azi mada yu ya rit nga nna shi Madu kaw anhte akyu hpyi mai nga ga ai.Mahte a nta de Madu Yesu du sa wa nna sha ku hta dung nga yang shut hpyit mara lu ai ni law law Mahte a nta de du shang wa ma ai. Shi madu dai Mahte a nta sa wa na lam shiga mawng gara mat wa ai a majaw, masha shagu dai nta de sa wa mayu nga ma ai, raitim mung yawng chyawm gaw nrai, shut hpyit mara lu ai ni madaw malawng sa du nga ma ai. Sha ku hta dung nga ai kang hta sha ai ni hte, kaga shut hpyit mara lu ai masha ni hpe madu yesu azi mada yu dat ai shaloi, shanhte a myit masin hta wan hkru ai zawn nga hkam sha lai wa na rai ma ai, hten za mat sai shanhte a sari ni hpe madu yesu bai gram lai ya ai, shanhte a hten run nga ai prat hpe Madu Yesu sharawt shatsap dat ya sai rai nga ai.

       Madu Yesu a azi mada yu ai lam gaw, anhte hpe gying dan ni tai wa shangun ai, anhte a sari ni hpe bai sharawt shatsawm ya ai. Ndai gaw shawang tsawra myit kaba ai lahpawt nchye ai yu mada lam rai nga ai. Dai shanhte a mare na shut hpyit mara lu ai matsan shabat re ai masha ni hte dai Sara wa shat rau sha nga ai. Ratim mung dai matsat shabat re ai lam a shing du maga de Karai Kasang a hkrang sum la ngu ai hkyik hkam ai lam nga nga ai, dai hkyik hkam ai lam hpe bai shadan shadawng ya na masha langai ngai dai masha ni ra nga ma ai, dai lam hpe lajang shabyin ya ai gaw Madu Yesu a azi mada yu ai lam nan rai nga ai.

       Anhte hkum shagu a prat hta mung ndai Madu a azi mada yu ai lam hpe kalang sha nrai law law lang anhte hkrum lu, hkam sha lu nga ga ai. Makam masha sharin shaga ya ai, shut hpyit mara raw sacramentu jaw ya ai Jau ni hta rai yang rai na, shing nrai anhte hpe mai kaja ai lam shabyin ya ai, garum ya ai hpu nau manaw manang ni ngu ai hta rai yang rai na, ndai Madu Yesu a mau hpa azi mada yu ai hpe anhte hkam sha lu nga ga ai. Madu anhte hpe azi mada yu nga ai, ngu ai lam hpe chye na da ai masa hte anhte prat hpe shawng de matut sit nawt hkawm sa nga ga. Anhte hpe mada azi yu na matu, teng sha ala ding da nga ai, ngu ai lam hpe mung myit dum nga ga. Hpang jahtum anhte a prat hta mu mada hkrum gadup lu na Madu Yesu a azi mada yu ai lam gaw htani htana rai na rai nga ai.

 

2013 ning September shata 21 ya shani Wa Sarabyin hkaw tsun lai wa ai mungga

Ga Gale ai :

 Wa Jau Bernard Dashi Tang Ji 

 RVA Jinghpaw Nsen Shapoi Dap Lithkam

Add new comment

7 + 7 =