Wa Sarabyin a Mungga

Pope Francis

Shatan nhkan lam gaw Karai Kasang hte htingbu wa hpe sat nga ai

Wa Sarabyin Francis, Sept 13, 2013.

 

“……. tinang myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, hpa rai yu nga n ta? Tinang myi hta rawng ai hpuntawng hpe pyi, n mu ai wa mi, Hpu nau wa e, na myi hta rawng ai nbun hpe ngai naw lai kau ya de ga, nga nna nhpu nnau wa hpe kaning rai tsun lu n ta?.......” Lk 6:39-42

Tinang myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, hpa rai yu nga n ta? nga nna tsun ai madu yesu a ga san gaw, anhte a htau li htau li myit mang ai myit sat lawat hpe sung sung sum ru ding lik yu ai lam ni galaw na matu anhte hpe shalut shamawt dat ya ai nga ai. Shagrit shanem lam the seng nna madu yesu tsun sharin shaga ai lam galaw ngut ai hpang, ndai shagrit shanem ai lam the ning htan shai ai lam rai nga ai, tinang a thing bu manaw manang ni a ntsa nju ndawng ai, je yang daw dan mayu ai myit jasat hte seng nna tsun sadi shadum ai lam Madu Yesu galaw ai lam rai nga ai. Ndai lam the seng nna tsun sharin ai lam hta grai ja ai ga rai nga ai, “Hypocrite” hpyi hpun ai wa, Sawt ai wa e, ngu nna madu yesu tsun lang ai.

Tinang a hpu nau wa, thing bu wa hpe n kaja ai hku tsun shatan nna nga ai, je yang ai lam ni chyu tsun mayu, galaw mayu ai myit jasat hte nga pra nga ai ni gaw hypocrite ngu ai Sawt ai ni, hpyi hpun ai ni rai ma ai, hpa majaw nga yang, ndai masha ni gaw tinang a ra rawng gawng kya ai lam, tinang a n hkum zup ai lam ni hpe mu mada yin la na matu atsam nrawng ai masha ni rai ma ai majaw rai nga ma ai. Ndai lam the seng nna galu galang tsun shaga ai lam madu yesu n galaw ai, raitim mung, tinang a hpu nau wa, thing bu wa a ntsa nju ndawng ai lam myit masin hta rawng nga ai wa gaw masha sat ai tara tawt lai ai lam tai ai, nga nna Madu Yesu tsun sadi jaw ai lam galaw da nga ai. “Tinang a hpu nau wa hpe nju ndawng ai wa gaw nsin hta hkawm nga ai,” nga nna Kasa Yawhan a shagun laika hta kasa Yawhan asan sha shadum da nga ai.

Anhte kadai rai tim mung tinang a thingbu wa, hpu nau wa hpe je yang mayu ai lam tinang a masin salum hta rawng nga ai rai yan, masha sat ai hkristian ni anhte rai nga ga ai, dai hta grau sawng ai gaw masha ni a lam nkaja ai hku tsun shatan ai ga ni tsun ai lam rai nga ai. Ndai zawn re ai masha ni anhte rai yang, anhte gaw masha sat ai hkristian ni rai ga ai, ngu ai ga gaw ngai tsun ai ga nrai Madu tsun ai ga nan rai nga ai. Ndai ga hta grau si mani ai ga kaga nnga nga ai. Tinang a hpu nau wa hpe nkaja ai hku tsun shatan ai lam gaw tinang a hpu nau wa hpe sat ai lam nan rai nga ai. Ndai zawn tsun shatan ai lam hpe anhte galaw shagu shing gyim masha labau hta masha sat ai lam shawng nnan galaw lai wa ai Cain a masha sat amu hpe anhte bai galaw ai lam rai nga ga ai.

Kasat gala majan ni law law byin nga ai hte, simsa lam a matu tsun shaga ai lam ni law law galaw nga ai dai ni na prat aten masa hta anhte hpang maga myit masa galai ra ai lam ni law law nga nga ai. Tsun shatan ai lam ni gaw masha sat ai ru hka amu byin wa na matu wan wut ya ai, shagrung ya ai lam rai nga ai. Mai kaja ai tsun shatan lam ngu ai galoi mung nnga nga ai. Anhte a shing let ni gaw karai kasang hpe shakawn shagrau na matu she rai nga ai. Raitim mung, anhte a shing let hpe tsun shatan galaw ai lam hta anhte asung jashawn jai lang nga ga ai rai yang, karai kasang a hkrang sum la hte shabung nna hpan hpajang da ai anhte a hpu nau ni hpe sat ai lam hta dai shing let hpe anhte asung jashawng lang ga ai rai nga ai. Masha nkau mi gaw tsun shatan kau na zawn rai nga ma ai, nga nna tsun mayu ai masha ni mung nga na re, raitim mung dai zawn nmai galaw nga ai. Shatan kau na zawn re ai masha mu yang shanhte a matu akyu hpyi ya ga, shanhte a matu ap nawng ya ai lam ni galaw ya ga, nbyin nmai ra wa na zawn rai yang, dai masha wa hpe sharai ya lu na zawn re ai masha ni hpang de sit sa nna, dai masha hpe hkye la lu na lam garum hpyi mai ai. Raitim mung, dai lam ni hpe kaga kadai hpe muung hkum tsun hkawm u.

Kasa Pawlu gaw grai kaba ai mara tawt lai yu ai wa re, nga nna shi hkum shi tsun ai wa rai nga ai. “Ngai chyawm gaw, shawng e shatan nhkan ai, zingri zingrat ai hte sheng mareng re ai wa rai nga nngai” nga nna 1Tim 1:13 hta Kasa Pawlu shi hkum nan tsun da nga ai. Anhte yawng gaw Kasa Pawlu zawn karai kasang a mying ning sang hpe kamaan lila tsun shtan ai, hkristian ni hpe zingri zing rat lam galaw ai ni anhte mahkoi nrai na ga ai, raitim mung hpu nau ni hpe tsun shatan ai lam ni galaw ai ni anhte rai ga ai rai yang anhte gaw zingri zingrat lam galaw ai ni, jahten shaza magam shabyin ai ni anhte rai na ga ai. Masha ni hpe tsun shatan ai lam ni galaw ai masa kaw nna tsawra ai masa de, shagrit shanem ai myit masa de, si mani ai masa de galai shai wa lu hkra anhte tinang hkum a matu mung, nawku hpung a matu mung akyu hpyi ga.

 

Add new comment

3 + 0 =