Wa Sarabyin: Madu Yesu Gaw Anhte A Manang Kaja Re

August 5, bat manga ya shani, Italy Mungdan a ginjaw mare kaba hta galaw nga ai 'Alpha Camp' mying hte dabang lung nga ai ramma ni hpe, Wa Sarabyin Francis hkap la hkrum shaga ai lam galaw ai lam chye lu ai.

"Madu Yesu gaw nanhte a manang kaja tai nga u ga, nanhte a prat hkrun lam mahkra hta rau rai nga let manang tai ya nga u ga," ngu Wa Sarabyin Francis, Ramma ni hpe akyu hpyi ga hte n-gun jaw da nga ai.

'Alpha Camp' gaw Nawku Hpung kawn hkrat ang ai hpe jai lang nna galaw ai nhtoi galu galaw ai dabang re lam chye lu ai.

Madung gaw shinggyim prat hte makam masham a lachyum hpe grau chye na wa na matu yaw shada ai re lam chye lu ai.

Hkristu gaw nanhte hpe galoi mung n kau da ai, nanhte hpe lakawn la nga ai

Hkristu gaw sak hkrung nga ai. Shi gaw anhte a myit mada shara re. Ramma ni mungkan hpe asak galu tsawm htap shangun ya na hpe Hkristu sharawng awng ai. Hkristu gaw nanhte ramma ni zet, zeng, ja, rai nga na matu nanhte hpe jum hkra let ya nga ai,  asak jaw bang ya nga ai, ngu Wa Sarabyin n-gun jaw da ai.

Yesu Madu gaw nanhte a manang re

Yesu Madu gaw shinggyim masha atai rawng ai wa rai nna, shinggyim masha shagu hte nihtep ai hku nga nga ai wa mung rai nga ai.

Shi a lam woi ningshawng ai hta hkan nang nga ga.

Satan mung gaw anhte a lapran, anhte a kata hta nga taw ai. Anhte a lapran, anhte a kata, anhte a makau grupyin hta nga nga ai n kaja ai lam ni hpe hkrum katut ai shaloi, teng man jaw ang ai lam hpe koi yen na matu n re ai. Tinang hkum nyet kau na matu mung n re ai. Tinang hte seng ai lit magam hpe lahpa hta gun hpai nna, lit magam rau karan gun hpai na matu rai nga ai, ngu mung Wa Sarabyin n-gun jaw da nga ai.

Madu Yesu gaw anhte a wudang hpe tsaw ra myit hte kabu gara let gun hpai na matu saw shaga nga ai. Madu Yesu hta kam hpa kam shamyat na mung n mai malap ai.

Yesu Madu gaw anhte hkum hpe anhte tsaw ra ai hta grau nna anhte hpe tsaw ra ai

Yesu hpe chye ai rai yang, anhte shani shagu gun hpai nga ai wudang hpe gun hpai lu ai atsam, shi kaw na lu la na rai nga ai. Dai rai yang, teng man simsa lam hte shimlum lam hpe lu la na ra ai.

Anhte hkum hpe anhte chye ai hta, anhte a lam grau chye ai, anhte hkum hpe anhte tsaw ra ai hta anhte hpe grau tsaw ra ai Yesu a shawng kaw rai nga ra ga ai. Shi gaw, anhte hpe, Kadai hte mung n bung ai laksan re ai masha hku anhte hpe jahkrum shatsup ya nga ai.

Wa Sarabyin Francis, Asak 17 ning aten hta Hkristu Madu hte hkrum matut wa lu nna Jau prat hta hkawm sa na matu shaga la hkrum ai hpe tam mu la ai, ngu ramma ni hpe sakse hkam da ai.

Yesu Madu hte hkrum na, hku nau na hte makam masham lam hta kung hpan na gaw  grai naw jau ai ngu n nga ai.

Italy masha, A lu ai Carlo Acutis gaw asak 17 ning kaw si wa ai. Acutis gaw Yesu hpe hkrum lu, tsaw ra wa ai rai nna, Mara raw Sakramentu hte Chyoi Pra Hkum Sacramentu hpe naw kaji yang hkam la lu sai rai nga ai, ngu Alu ai Carlo Acutis a lam hpe tsun hkai dan let Wa Sarabyin Francis ramma ni hpe n-gun jaw da ai.

Hpang jahtum ginchyum dat hta mung "Sak hkrung Madu Yesu gaw nanhte prat a manang kaja tai nga u ga" ngu akyu hpyi ya da ya nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-to-alpha-camp-jesus-is-your-friend.html