Wa Sarabyin: Hpaji Jawng Yawng Gaw, Yawng Hpe Hkalum La Ai Shara, Yawng Jawng Pawng Shang Lawm Ai Shara Ni Rai Ra Ai

September 29, bat mali ya shani, Wa Sarabyin Francis, Gregorian University Conference hta shang lawm ai ni yawng hpe hkrum shaga lai wa ai. Ndai hkrum shaga lamang gaw (initiatives in Refugee and Migrant Education) htawt sit nga hkawm ra ai ni hte tsin-yam hkrum machyu nga ai ni hpe hpaji shalat ya ai lam hte seng nna hkrum shaga ai lamang re lam chye lu ai.

Tinang a buga ni hta  hpaji sharin hka ja n lu ai tsin-yam hkrum htawt sit nga hkawm ai Sasana ma (ma kaji) ni hte ramma ni hpe madung da ai nna masin jahkrat hpaji shatsaw ya ai shamu shamawt lam rai nga ai, nga nna, hkrun zup, hpawng de, bawngban mahkyen a ahkyak ai lam hpe, Wa Sarabyin Francis, madi madun tsun sang lang jahpra da ai.

Mungdan hpe woi awn ai ni, gumshen ai ladat hte maigan mungdan de hprawng pru shangun ai ladat ni tai, n tai bai maram yu na gaw grai ahkyak ai lam, dai zawn re ai ladat rai yang gaw buga masha ni hpe hkra machyi shangun ai tai ai lam, Wa Sarabyin Francis tsun shadum da ai.

Mungdan htawt sit nga hkawm ai refugees ni, hpaji madang tsaw grau ai hku sharin hka ja hkam la lu mu ga, shanhte a shawnglam akyu a matu madung yaw shada let garum ya na matu hpaji jawng magam gun ai ni hpe, Wa Sarabyin n-gun jaw da nga ai.

 Shinggyim wuhpawng hpe shatsaw sharawt ya lu na matu shinggyim lam yan hta, myusha ga hte seng ai hta, n bung hkat ai makam masham hpung ni shada hku hkau kanawn mazum sa wa lu ai lam ni hta, dingbai dingna, dut dang ai lam n nga ai shawnglam hpe gaw de shatsaw sharawt sharin achyin ya na matu mung, Wa Sarabyin hpyi shawn da ai.

hkaptau hkalum, makawp maga, shatsaw sharawt, ginlung kahkying gumding nga mu nga nna hpang jahtum n-gun jaw ga tsun let shanglawm ai ni yawng hpe shaman akyu hpyi ya dat ai lam Vatican Shiga Dap kaw nna ndau da ma ai.

By Fr. Patrick Gawmaw Hkawng Yae