Wa Sarabyin: Guadalupe Mu Maria Gaw Shinggyim Masha Ni Hte Ni Htep Nga Ai

Our Lady of Guadalupe, "Guadalupe Nu Maria Poi, December 12, bat langai ya shani, WA Sarabyin Francis, San Peter Basilica Nawku Htingnu Kaba hta, Missa Hkungga nawng jau woi ai rai nga ai. Kahtawlik Nawku Hpung ting mung

Karai Kasang gaw Shi a kasha a kanu rai nga ai Nu Maria hku nna Shi a ni htep ai lam hpe madun dan nga ai lam Wa Sarabyin sumru woi da ai.

Karai Kasang gaw anhte a mungkan hpe, n hkring n sa, yu makawp maga nga ai: ra kadawn ai ni hpe, machyi makaw hkrum ai ni hpe, ningma kap ai ni hpe Shi a matsan dum lama ai tsaw ra myit hte garum ya nga ai. Shi a hkum hpe shadan dan ai lam gaw anhte a matu galoi mung mau hpa rai nga ai, anhte hpe kabu pyaw lam hte jahpring ya ai.

Yesu Madu gaw anhte hte ni htep nga nga ai. Dai shani na chyum daw langai gaw Karai Kasng, Shi a kasha hpe numsha langai hta na shangun shaprat ai, dai gaw anhte hpe hkye hkrang la na matu rai nga ai lam, San Pawlu sakse hkam tsun da ai rai nga ai.

Nu Maria hta shangai wa ai Yesu hta Mahkra Dang Chye Ai Wa shang ningngai nga ai; hpa majaw nga yang, Karia Kasang gaw anhte hte rau nga nga ai, anhte a makau hta hpu nau majing wa zawn manang tai ya nga ai.

Dai majaw Yesu gaw anhte a manang kaja langai zawn, mara hta lai nna, mahkra hta aten shagu anhte hte rau nga nga ai. Dai ten, Nu Maria gaw America Dan de du shang nna dai mungdan ni hta Karai Kasang a shalan shabran ai lam chyam bra lai wa sai lam Wa Sarabyin labau hpe sagawn dan da ai.

Hkye hkrang la lam gaw majan tsin-yam hkrum masha ni hte hte n tara ai lam masa hta  dip sha hkrum ai ni a lapran hta byin pru nga ai lam, Guadalupe Nu Maria dan pru ai labau hpe lakap nna, Wa Sarabyin Francis, sawk sagawn dan da ai.

Nu Maria gaw anhte hte rau nga na myit ra ai. Shi hpe anhte a kanu hku hkap la na hpe sha shi hpyi shawn ai. Anhte a prat hpe mung shi a kasha Yesu a matu hpaw da nna, Shi a mungga hpe hkap la let Shi zawn sak hkrung na hpe hpyi shawn da ai.

Nu Maria gaw htawt sit nga hkawm ai ni hte mung ni htep nga nga ai. Majan a majaw, shingra maka htenza ai majaw, dip sha hkrum ai majaw htawt sit nga hkawm ai ni hpe Nu Maria makawp maga ya nga ai lam Wa Sarabyin tsun dan da ai.

Shinggyim masha ni kaja ai de galai shai wa na matu akyu hpyi nga ra ai lam mung Wa Sarabyin Francis tsun shadum da ai.

Guadalupe hta dan pru ai Nu Maria a poi gaw 2031 shaning hta tsaban manga hpring ladu hkrum shaning rai nga ai majaw dai shaning a matu novena akyu hpyi ga hpe ya kaw nna hkye lajang hpang nga sai re lam chye lu ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-francis-mass-lady-guadalupe-homily-americas.html