Wa Sarabyin Francis a Mungga, Aug 6, 2018

Nawku hpung gaw magrau grang marai rawng ai Kanu re

Luke 7:11-17 “…… Dai mare chyinghka de du magang yang, yu mu, si mat sai masha langai mi a moi mang hpe hpai kau sa wa nga ma ai; si ai wa gaw kanu a kasha shingtai rai nga ai; kanu mung gaida rai nga ai; mare masha law law mung dai num hte rau hkan sa nang ma ai. Madu gaw dai numsha hpe mu jang, shi hpe matsan yu dum nna, Hkum hkrap et, shi hpe ngu wu ai……”

Anhte a nji nmu lam ni hpe hkam sha ya lawm na, anhte a nji nmu lam ni hpe shi madu a nji nmu lam shatai la kau na atsam madu yesu hta nga nga ai. Langai sha re ai shi a kasha shing tai si mat ai majaw yawn hkyen hkrum nga ai Nain ngu ai kahtawng na gai da jan hte madu yesu hkrum kadup ai shaloi, matsan yu dum ai myit madu yesu hta byin pru ai. Dai aten dai masa hta dai gai da jan a myit hta kaning nga hkam sha nga na re, ngu ai lam hpe Madu Yesu atsawm sha chye ya nga ai. Ndai gai da jan a mabyin ja chyum mungga hpe hti sum ru nga ga ai aten ndai gai da jan gaw nawku hpung a kum la rai nga ai ngu ai hku nna mu mada mai nga ga ai, hpa majaw nga yang nawku hpung ngu ai hta gai da jan ngu ai masa mu mada mai nga ga ai.

Nawku hpung a hkungran la rai nga ai Madu shakram da ai, dai madu hpe bai mu la na, bai hkrum lu na myit mada let labau hkrun lam hpe nawku hpung hkawm sa nga ai. Dai Madu hte teng sha bai hkrum nna nawku hpung gaw dai Madu a hkungran num teng sha tai na rai nga ai, raitim mung, ya ndai ten hta Madu ndan dawng nga ai majaw nawku hpung gaw shi chyu naw rai nga ai. Dai re majaw nawku hpung hta gai da jan ngu ai kum la masa shi hta nga nga ai. Shi a kashu kasha ni rai nga ai hpung masha ni hpe makawp maga lam galaw ya nga ai magrau grang ai ndai nawku hpung gaw, ntara ai tara agyi wa hpe shi hpang maga tsap nna tsun dara ya hkra shakut nna jahtum e tara dang la ai gai da jan zawn rai nga ai. Anhte a kanu nawku hpung gaw magrau grang ai jan rai nga ai. Hpung masha ni gaw shi a kashu kasha ni rai nga ai ngu ai lam hpe chye nga nna dai shi a kashu kasha ni hpe makawp maga lam galaw ya ra ai, lani mi na nhtoi hta ndai shi a kshu kasha ni shi a hkrungran la rai nga ai madu hte teng sha hkrum zup lu ra ai, ngu ai lam hpe atsawma sha chye nga ai marai rawng ai kanu rai nga ai.

Karai kasang hte tsan hka nga ai lam ni kaw nna bai gayin wa na matu tinang a kashu kasha ni hpe tsun sharin shaga lam ni galaw ya ai gai da jan ni a lam mabyin law law hpe ja chyum mungga hta mu lu mai nga ga ai. Dai ni hta na dan dawng ai gai da jan langai gaw kasha 7 lu ai Maccabe gai da jan rai nga ai. Anhte a kanu nawku hpung mung kashu kasha ni hpe tinang nang a myu sha ga hte sharin shaga lam galaw nga ai. Tara laika ngu ai ga ni sharin ya nna nkaja ai lam ni hpe ding run manga kau ai lam hta hkawm sa nga lu hkra atsawm jaw ya nga ai rai nga ai.

Hkungran la hte bai hkrum zup lu hkra myit mada let, hkan tam nga ai labau hkrun lam hkawm nga ai gai da jan ngu ai masa nawku hpung hta mu mada lu nga ai. Ndai gaw anhte a kanu nawku hpung a mabyin masa nan rai nga ai. Sadi dung ai jan rai nga ai majaw hkrap yawn madai chye ai kanu mung rai nga ai. Yawn hkrap madai ai lam ngu ai nawku hpung hta nnga ai rai yang nawku hpung gaw lama ma ra nga sai masa rai nga ai. Shi a kashu masha ni a matu yawn hkrap madai let akyu hpyi ya nga ai rai nga ai. Nawku hpung gaw tinang a kashu kasha ni hpe bau maka let shawng de sit nawt nga ai, kashu kasha ni hpe n gun atsawm jaw ya ai, kashu kasha ni hte rau hkawm sa lawm ya ai, madu hte hkrum ai shaloi dai madu a lata de ma ni hpe shakram ap jaw dat ya ai, jahtum e shi nawku hpung hkum nan mung shi a hkungran la hte hkrum zup lu na rai nga ai. Ndai gaw anhte a kanu nawku hpung nan rai nga ai.

Yawn hkrap madai nga ai gai da jan hpe madu hkrum ai shaloi hkum hkrap e nga nna madu tsun ai lam gaw nawku hpung hpe tsun ai lam re ngu ai masa ngai mu mada nngai. Hkum hkrap u, ngai nang hte rau rai nga na nngai, dai jahtum hkrungran daw sha poi hta ngai nang hpe teng sha ala nga na nngai, hkum hkrap sanu, ndai asak si mat sai na kasha ya asak bai hkrung nu ai, nga nna nawku hpung hpe Madu tsun nga ai lam rai nga ai.

Ndai gaw madu hte shi a nawku hpung a lapran tsun shaga ai ga ni rai nga ai. Kanu nawku hpung gaw shi a kashu kasha ni rai nga ai nawku hpung masha ni a matu makawp maga ya lam galaw ya ai. Shi a nawku hpung masha ni si hkrum wa ai aten nawku hpung yawn hkrap madai ai, dai zawn nawku hpung hkrap madai ai aten hta, ngai nang hte rau rai nga nngai, na kasha ngai hte rau rai nga ai, nga nna Madu gaw nawku hpung hpe tsun ai. Nain gai da jan a kasha hpe si ai ku kaw nna rawt hkawm na matu Madu tsun ai, dai zawn sha anhte hpe mung rawt hkawm na matu law law lang madu tsun ai. Shut hpyit mara a majaw anhte si ai de du ga ai shaloi hkyam sa jaw ya na matu anhte hpyi lajin ra ga ai. Anhte a mara hpe madu raw dat hkyam sa jaw ya ai ai shaloi madu anhte hpe asak bai jaw ya ai rai nga ai. Anhte a mara raw dat hkyam sa jaw ya ai ngu ai lam gaw, ‘ngai’ mara raw hkap la wa, ‘Madu Yesu’ bai, ‘mara raw ya ai jau’ ndai 3 hte hte sha ngut kre ai de du ai nrai, kanu ngu ai nawku hpung a lata de shi Madu bai ap ya ai shaloi she ngut kre ai de du ai rai nga ai.   

NB.   2013 ning Sept 17 ya shani Wa Sarabyin Francis hkaw tsun lai wa ai mungga     

Add new comment

3 + 3 =

Please wait while the page is loading