Wa Sarabyin Francis a Mungga

(Sept 14, 2013 ya shani wa Sarabyin Francis hkawn tsun lai wa ai mungga)

Luka 6:27-38 “Nanhte a hpyen ni hpe tsaw ra mu; nanhte hpe n dawng n yawt ai ni e kaja ai hku galaw mu; nanhte e dagam ai ni hpe shaman ya mu; nanhte hpe aroi arip di ai ni a matu akyu hpyi mu…..”

Mara rawt dat hkyam sa jaw ya na matu, myit galu na matu, hpyen wa hpe tsawra na matu ngu ai, grai yak ai lam ni hpe hkan nang hkan sa galaw shatup na matu anhte hkristian ni hpe kabu gara ai shiga saw shaga, lajin matsun ai lam galaw nga ai. Grai yak ai ndai lam ni hpe ta tut hkan sa shautp lu na langai sha re ai lam gaw, madu yesu a nni nkri lam ni hpe sawn sum ru dingli yu ai, Chyoi pra ai Nu Maria hte Madu Yesu a shagrit shanem ai lam ni hpe sum ru dinglik yu ai lam ni galaw ai hku nna chyu sha rai nga ai. September 12 ya shani gaw Chyoi pra ai Nu Maria a Chyoi pra ai amying shing teng poi nhtoi mung rai nga ai.

Madu yesu anhte hpe matsun ai lam ni hpe chye na lu na matu, ta tut hkan nang hkan sa galaw lu na matu dai ni ndai Chyoi pra ai Nu Maria a ‘Chyoi pra ai amying shing teng’ ngu ai hpe anhte ra nga ga ai. Hpa majaw nga yang, ‘nanhte a hpyen ni hpe tsaw ra mu; shanhte hpe kaja ai hku galaw mu; bai wa lu na lam nnga ai masha ni hpe myit hpa mung n ru ai sha hkoi shap ya mu’ ngu ai madu a matsun ai lam ni gaw hkan sa shatup na matu loi ai lam ni nrai nga mali ai. Raitim mung ndai lam ni mahkra hpe Chyoi pra ai Nu Maria hkan sa shatup sak hkrung lai wa sai rai nga ai. Ndai gaw sum nung shing ding ai chyeju kum hpa, shagrit shanem si mani ai chyeju kum hpa ni nan rai nga ai.

“Karai Kasang a lata la ai ni hte, chyoi pra nna tsaw ra hkrum ai ni zawn, matsan dum ai, sumnung ai, mai kaja ai, myit nem ai, myit gyip ai hte myit galu kaba ai dagraw nga nna, shada da hkam mana ai hte, mara langai ngai nga yang gaw, shada da raw dat kau hkat nga mu:” nga nna Colose 3:12, 13 hta kasa Pawlu tsun shadum da nga ai. Ndai shara hta anhte a myit masin hta pru wa lu mai ai ga san ni law law nga nga ai, dai ni gaw, ndai lam ni ngai ganing rai hkan shatup lu na rai ta, ndai lam ni hpe hkan sa shatup lu hkra nye ai hkum hpe ngai gara hku shajin lajang shachyip la lu na rai ta, ndai lam ni hkan sa galaw shatup lu hkra hpa lam ni hpe ngai sharin hkaja lam ni galaw ra na rai kun, ngu ai ga san ni rai na rai nga ai. Mahtai gaw asan sha rai nga ai, ndai lam ni hpe anhte tinang a atsam san san the sha nbyin mai ai, shaman chyeju the sha galaw lu mai ai, ngu ai lam rai nga ai.

Awng dang sai madu yesu, shut hpyit mara the si hkrung si htan, nat tsa dan yawng mayawng hpe dang kau sai madu yesu, lam magup hpe galaw shabyin ya lu ai madu yesu, ndai madu yesu anhte a masin salum hta rawng nga ai rai yang, madu matsun ai lam ni mahkra hpe anhte hkan sa galaw shatup lu na rai nga ga ai. Madu yesu hpe sharawt mada yu ai lam nnga, anhte a masin salum hta madu yesu nrawng nga ai rai yang ndai lam ni hpe teng sha anhte nhkan sa shatup lu na rai ga ai. Madu yesu a lam hpe sawn sum yu dinglik yu ai lam a marang e sha shaman chyeju du yu wa ai rai nga ai.

Madu Yesu a lam hpe sawn sum yu ai ngu ai lam hta ahkyak ai daw langai mi gaw madu yesu a nni nkri lam, shi madu a sharit shanem ai, nji nmu hkam la lam ni hpe sawn sum ru dinglik yu ai lam rai nga ai. Si mani ai myit masin the nni nkri lam ni hpe shi madu azim rai hkam sharang la ai lam ni hpe sum ru yu mai nga ai. Anhte atsam dat galaw ra na lam ni gaw ya tsun ai sum ru dinglik yu ai lam ni sha rai nga ai, ngam nga ai daw ni ma hkra hpe shi madu galaw na rai nga ai. Anhte a prat hpe madu yesu the rau karai kasang hta makoi bang da ra na rai ga ai. Ndai gaw madu a nni nkri lam, shi madu a sharit shanem ai nji nmu hkam sha lam ni hpe sawn sum ru dinglik akyu hpyi ai lam rai nga ai. Madu matsun ai lam ni hpe hkan nang shatup lu na matu ndai lam hta lai nna kaga lam nnga nga ai.

Hpyen wa hpe raw dat hkyak sa jaw ya lu na matu madu a nni nkri hpe sum ru dinglik yu nga ga, htingbu wa hpe nju ndawng lam n shabyin hkra nga lu na matu, shatan nhkan lam ntsun hkrup hkra nga lu na matu madu a nni nkri lam ni hpe sum ru dinglik yu nga ga, Anhte a prat hpe madu yesu the rau karai kasang hta makoi bang da nga ga.