Wa Sarabyin Francis Gaw: Yesu hte rau galaw ai Sasana Magam gaw Kawa Karai Kasang a Sasana Magam nan rai nga ai Nga Nna Tsun Dat Nga Ai Shiga

2020 May 31 ya shani ang ai Chyoi Pro ai Wenyi yu hkrat wa ai Pentecost poi shani hta Wa Sarabyin Francis gaw, dai ni na aten chyam bra nga ai coronavirus ana zingli tsin-yam hkrum sha nga ra ai hta hkan nna, sasana galaw na matu shaning shagu na Mungkan sasana laban mungga hpe htuk shapraw dat ai.

Wa Sarabyin Francis gaw shaning shagu man man galaw ai Mungkan Sasana laban mungga hpe 2020 shaning na Choi Pra ai Wenyi yu hkrat wa ai Pentecost poi laban shani hta htuk shapraw dat nga ai. Shi mungga ginlam hpe Myihtoi Isaiah laika 6:8 hta na “Ngai nga nga nngai, ngai hpe shangun dat e” ngu ai gabaw jaw da nga ai. Mungkan Sasana Laban (World Mission Sunday) hpe 2020 October 18 hta galaw na re. 

Shi mungga hpe lai wa sai March 27 shani shi a laklai ai akyu hpyi lam hpe bai nhtang sumru tsun dan let, hpaw hpang da nga ai. Daini, mungkan shara shagu hta yak hkak jam jau nga ai. Dai gaw masha shagu hpe myit mak mat shangun ai hte hkrit kajawng shangun nga ai. Karai Kasang gaw “Ngai kadai hpe shangun dat ra na i” ngu matut matut tsun nga ai. Anhte ni machyi hkra nna si hkrung si htan hkum na daram yak hkak ai mahkrum madup hta hkawm sa nga ga ai raitim, n hkru n kaja ai kaw na lawt lu let sak hkrung nga pra lu na myit sharawng nga ga ai re. Ndai zawn hkam sha ga ai lam gaw anhte hpe sasana shawng lam de pru rawt sa na matu shaga la hkrum nga ga ai re. Dai majaw Karai Kasang hte htingbu wa hpe tsaw ra ai lam hta daw jau magam hte akyu hpyi ai lam yan ni hku sasana magam hta shang lawm nga ga.

Yesu Madu Wudang ntsa si hkam ai a marang e shi a sasana magam hpe jahkum shatsup da sai zawn kaga masha ni a matu anhte hkum hpe ap nawng nga ai rai yang anhte hkum akyu pru manu dan nga na re ngu Wa Sarabyin matut tsun da nga ai. Anhte a sasana magam rai nga ai shaga la hkrum ai lam hta anhte ni myit sharawng awng ai hte hkap la nna shangun dat ai de pru sa ai gaw Kawa Karai Kasang a Sasana magam hta jawm pawng ai rai nga ai. Anhte hkum nan a shaga la hkum ai gaw nawku hpung hta Karai Kasang a kashu kasha ni rai nga ga ai majaw re.

Wa Sarabyin matut tsun ai “Nawku Hpung a labau hta Yesu Madu a Sasana magam hpe matu galaw sa nga ai re.” Dai majaw kashin kamun hkam la ai ni gaw nawku hpung a mying hte shangun dat hkrum ai nan rai nga ai. Anhte ni Kabu Gara shiga hpe sakse hkam ai hte hkaw tsun ai lam gaw Karai Kasang a Tsawra myit hpe nan madun dan ai rai nga ai. Dai zawn rai, masha ni a hkum hkrang myit masin salum hte wuhpung wuhpawng hta htunghking lam yan ni hpe aten shagu, shara shagu galaw lu nga ai.

“Sasana magam gaw Karai Kasang shaga la ai hta shanglawt lu ai myit masa hte sharawng awng let galaw lam rai nga ai. Sasana magam ngu ai hpe Yesu Madu nga nga ai nawku hpung kata anhte ni a shada tsawra hku hkau ai lam nga nga ai ngu chye lu ga ai. Dai gaw anhte ni hta Chyoi Pra ai Wenyi shanu nga nna magam bungli galaw na matu shadut ya ai hpe hkap la ai a marang e woi awn nga ai. Shi a shaga la ai lam gaw hkungran sacramentu chyeju kum la hkam la nna “kun dinghku gaw de ai ni, tinang hkum hpe ap nawng let jau, brother, mama tai ai ni rai nga ai. Dai zawn shaga la hkrum ai ni shani shagu shara shagu hta nga nga ai. Anhte ni aten shagu shara shagu hta makam masham hpe sakse hkam sa na matu Kawa, Kasha, Chyoi Pra ai Wenyi a Mying ningsang hta shangun dat ai hpe sharawng awng nga ga ai kun? ngu anhte hkum anhte san la ra ga ai. Anhte sharawng awng ga ai rai yang Kanu Nu Maria zawn Karai Kasang a ra sharawng yaw shada lam hta hkawm sa na jing jing rai nga ra ga ai,” ngu Wa Sarabyin n gun jaw ga san san da nga ai.

Daini na Nawku Hpung a Sasana magam hta shang lawm na matu shaga la ai hkrum ai gaw chyam bra nga ai ana zingli tsin-yam hkrum ladaw hta Karai Kasang anhte hpe gara hku yaw shada nna, hpa lam ni tsun nga ai hpe chye na na matu gaw ahkyak nga ai ngu Wa Sarabyin tsun sanglang da nga ai. Nkau ni gaw tinang hkrai nga nna si mat ai; nkau ni gaw kabai da hkrum ma ai; nkau ni gaw shanhte a bungli shamat kau ma ai; nkau ni gaw wuhpung wuhpawng hte nmai nga ai sha tinang dum nta kaw sha rawng nga ra ma ai. Dai zawn re masha ni a ra kadawn ai lam ni hta Karai Kasang hte anhte shyinggyim wuhpawng shada da hkrum matut lu na mahku mahkau lam yan gaw ahkyak nga ai. Anhte ni a akyu hpyi ai gaw ra kadawn nga ai ni hpe chye na wa nna Karai Kasang a yaw shada ai lam anhte a masin salum hta hkra shadut ai a marang e shada garum shingtau hkat lu na rai nga ai. Nawku daw jau lamang ni hta shang lawm nmai ai ten Misa hkungga nlawm lu ai hpe mahkrum madup a marang e chye na hkap la hkam sharang let makam masham hta matut shakut nga ma ai re nga nna mung Wa Sarabyin tsun da nga ai.

Ngai Kadai hpe shangun dat na rai kun? (Is 6:8)

Myihtoi Isaiah laika hta Karai Kasang tsun ai “ngai kadai hpe shangun dat na rai kun?” ngu ai ga san hpe anhte ni mahtai bai jaw nna shawang tsawra myit hte kam ging ai ni tai let dai ni na mayak mahkak lam ni hta shang lawm ap nawng nga ga ngu Wa Sarabyin n gun jaw saw shaga nga ai hpe Vatican kawn ndau shana da nga ai.

Source : Vatican News

#pope #message

#rvakachinservice