Ramma Ni Hte Seng Ai Wa Sarabyin A Matsun Laika

Lai wa sai shaning October shata, Vatican hta galaw lai wa sai Ramma ni hte seng ai Saradaw ni a Synod hkumra hpawng kaba a mahtai hku nna, Ramma ni hte seng ai Wa Sarabyin a matsun shatam laika hpe Vatican kaw nna April praw 2 ya shani, ndau shapraw dat nga ai. Ndai Wa Sarabyin a matsun shatsam laika hpe, “Madu Yesu asak hkrung shamu shamawt nga ai” ngu ai ga baw hte ndau shapraw dat ai rai nga ai.

Daw kaba 9 garan nna ndau shapraw dat ai, Ramma ni hte seng ai ndai matsun shatam laika gaw, Ramma ni hpe sha sha-ang nna ndau shapraw dat ai lam nrai, hpung masha ni yawng hpe madi nna matsun shatsam dat ai lam re, nga nna tsun da nga ai.

“Karai Kasang a mungga hte Ramma ni,” ngu ai ga baw shatut da ai daw kaba langai hta, Ga Shaka dingsa prat hta Ramma ni hpe manu shadan hkungga ai masa nau nnga ai raitim, Karai Kasang a mu mada ai lam gaw dai masa nre ngu ai lam hpe Chyum laika ga si nkau mi hta mu mada lu nga ai. Ga shaka nnan hta Madu Yesu a lam hpe yu yang, asak kaji ai ngu ai lam gaw nau nahkyak ai, ngu ai lachyum nre ngu ai masa hpe mu lu nga ai, nga nna Wa Sarabyin tsun da nga ai. Daw kaba lahkawng hta gaw “Galoi mung asak ram zet let nga ai Madu Yesu” ngu ai ga baw hte, galoi mung zet let ai Madu Yesu shamu shamawt nga ai zet let ai Nawku hpung ngu ai masa hpe madi madun lam galaw da nga ai.

Wa Sarabyin a matsun laika daw kaba 3 hta gaw, dai ni Mungkan hta byin pru nga ai, bu htawt hkawm mang hkang, ma kaji ni n gun makru daw hkrum nga ai mang hkang, hkum shan roi rip lam hte seng ai mang hkang, dai ni na prat dep digital matut mahkai lam hte seng nna byin pru nga ai kaja ai, nkaja ai ngu ai mang hkang lam ni, ndai lam ni hpe ramma ni a garum ya ai lam ni a marang e mai kaja ai mahtai ni mu tam la lu na ahkaw ahkang nga nga ai, ngu ai lam hpe madi madun da nga ai.

Daw kaba 4 hta gaw teng man ai lam hpan 3 hpe Wa Sarabyin jahkrat madun da nga ai. Dai teng man ai lam ni gaw, nam bat langai, Karai Kasang ramma ni hpe tsawra nga ai, ngu ai lam, lahkawng ngu na teng man ai lam gaw, Madu Yesu nanhte hpe hkye la ai, anhte a mara ni hpe madu yesu raw dat ya ai, ngu ai teng man ai lam. Masum ngu na gaw, Madu Yesu asak hkrung shamu shamawt nga ai, ngu ai lam rai nga ai.

Da kaba 5 hta gaw, Ramma prat ngu ai gaw daw dan lata la lam galaw na asak aprat ten rai nga ai. Mu mada wa ai ahkaw ahkang ni hpe hkap jum tek la na matu hkrit tsang lam nmai nga ai zawn, shut shai lam galaw hkrup wa na hpe mung nmai hkrit tsang ai, ng anna Wa Sarabyin tsun da nga ai. Magrau grang marai rawng ai sasana maje je ai masha ni byin tai wa hkra shakut na matu mung ramma ni hpe saw shaga ai lam ndai daw kaba 5 hta mu lu nga ai.

Daw kaba 6 hpe gaw “Asak ram ai ramma ni hte, Asak kung sai kaba ai ni” ngu ai ga baw shatut da nga ai. Ramma ni hku nna asak kung sai kaba ai ni hte mai kaja ai matut mahkai mahkri shawn hkat lam ni nga na ahkyak ai lam madi madun da nga ai. Asak kaba sai ni hta hpaji la hpa shanhte a mahkrum madup law law nga nga ai. Ramma ni hku nna asak kaba sai ni a mahkrum madup ni hta ru jung da lu ai rai yang shawng lam a matu mai kaja ai n gun ni lu la na rai nga ai, nga nna Wa Sarabyin tsun da nga ai.

Daw kaba 7 hta gaw Ramma ni a sasana magam bungli ni hte seng ai lam hpe mu mada lu nga ai. Ramma ni hte seng ai sasana magam lam ni gaw ginrat jahtuk la hkat mai ai hpan masa rai ra ai, nga nna Wa Sarabyin mu mada da nga ai. Ramma ni gaw hkaw ai hpe nrai, tsawra myit madun la na hpe madaw grau ra sharawng nga ma ai. Ramma ni hpe lakawn la ai sasana magam bungli hta, shingni hpaji ni, ginsup lamang ni, makau grup yin shingra tara masa makawp maga lam ni, ndai lam hpe myit shalawm la mai nga ai, ng anna Wa Sarabyin tsun da nga ai.

Daw kaba 8 hta gaw, mayaw htinggaw de sha ai lam hte seng nna ramma ni hpe matsun dat ai lam galaw da nga ai. Mayaw htinggaw de sha ai lam hte seng nna Wa Sarabyin tsun ai hta, Jet ai tsawra myit ngu ai gaw maju jung ai myit dun lam rai nga ai, hkum shan ganawn mazup ai ngu ai lam hta yaw shada ai lam lahkawng nga nga ai, dai gaw tsawra ai lam hte, kashu kasha shangai shaprat lam, ngu ai hpan lahkawng rai nga ai. Jau, ma ma tai ap nawng ai prat a matu mung myit yu ai lam ni galaw na matu ramma ni hpe wa sarabyin shadut da nga ai.

Wa Sarabyin a matsun shatsam laika hpe daw kaba 9 hte gin chyum dat da nga ai. Tinang a prat hpe atsawm dinglik masam maram yu ai lam ni n galaw ga ai rai yang, prat aten hta byin pru nga ai lam ni hta aloi sha yawng lawm hkrat sum mat lu chye ga ai. Karai Kasang a shaman chyeju ni hpe hkap kam la mayu ai rai yang, yak hkak ai lam ni hpe lai di hkawm san a matu mung anhte tinang a prat hpe shajin da ra na rai ga ai, nga nna Wa Sarabyin a matsun shatsam laika hpe gin chyum dat da nga ai .

Chapter 9: Discernment

Ga gale:Wajau Bernard Dashi Tang Ji

Source : Vatican News