Miwa Gumsan Mungdan a matu akyu hpyi ya ai shani masat na matu matut hpyi lajing dat ai hte akyu hpyi ya ai shi ga

Wa Sarabyin gaw Miwa mung na Kahtawlik Hpung masha ni Mungkan ting hte seng ai Kanu Nawku Hpung hta lawm wa magang sai lam hpe (Regina Coeli) Lamu Hkawhkam jan akyu hpyi ga tsun ngut ai shaloi tsun da nga ai.

“Tsaw ra ai Misa gumsan mungdan kaw nga ai hpu nau ni e, mungkan ting hte seng ai Kanu Nawku Hpung hta lawm wa ai a majaw nanhte myit mada da ai hte maren, nanhte gumlau hkrum yak hkak ai ten shagu dai nawku hpung gaw garum madi shadaw ya na re hpe pahkam hkam nngai. Chyoi Pra ai Wenyi ru bang ya ai chyeju nnan hte kam sham ai ni a hkye hkrang la hkrum lu na matu Karai Kasang a hpung dagu gaw Kabu gara shiga nhtoi hte tsawm htap ai lam gaw nanhte hta nga nga u ga Nawku Hpung gaw akyu hpyi garum ya let arau nga nga ga ai re.”

Miwa mungdan kata na Kahtawlik Nawku Hpung masha ni gaw Miwa mung masha ni a kam hpa shara Sheshan na  Nu Maria (Our Lady of Sheshan) poi hpe lai wa sai May 25, laban shani hta galaw lai wa sai.

Wa Sarabyin gaw kam sham ai Miwa myusha ni makam masham hta ngang gring mu ga hte myit hkrum gahkying gumding lam hta, kabu gara sakse hkam sa wa ai hta, garum shingtau hkat ai lam hta myit mada shara kaba nga ai mungdan masha kaja ni tai nga mu ga matu akyu hpyi ya ai.

2007 shaning hta Wa Sarabyin Benedict XVI gaw “Miwa Kahtawli Hpung masha ni hpang de shagun laika” ka dat sai hta shaning shagu May 24 ya shani Miwa mungdan kaw nga ai Nawku hpung a matu akyu hpyi ya na lam rai nga ai.

Dai aten hta Wa Sarabyin Benedict XVI gaw Miwa mungdan hta nga ai mung masha yawng shanhte lapran tengman ai tsawra myit hte simsa lam hta arau nga pra lu mu ga matu Hkawnset Maria kaw akyu hpyi ga hpe mung ka dat ya sai lam chye lu ai.

Mungkan shara shagu nga ai ni mung miwa hkristan hpung masha ni shanhte galaw ai magam bungli ni hta shanhte a makam masham hta hkawm sa let Madu Yesu hpe sakse hkam sa lu mu ga garum shingtau ya na matu hpyi sawn da nga ai.

Wa Sarabyin Francis mung miwa mungdan na kam sham ai hpung masha ni a matu ahkyak la akyu hpyi ya nga ai lam tsun da nga ai. Shaning shagu dai akyu hpyi nhtoi hta nhprai ai sha akyu hpyi ya nga ai lam mung matut tsun da ai.

Sarabyin Rung (Holy See) hte Miwa gumsan mungdan Asuya lapran mahku mahkau matut mahkai lam hpe mung 2018 September 22 ya shani myit hkrum ta masat htu shagrin da sai lam chye lu ai.

Vatican Amu Madu Cardinal Pietro Parolin gaw “ndai myit hkrum da ai lam gaw miwa mung na Kahtawlic hpung masha ni sha n ga, mung masha ni yawng hte mai kaja ai lam ni hta rau jawm galaw sa wa na shawng lam a matu nnan hpang da lu ai lam re” ngu tsun da nga ai.

Cardinal parolin gaw Global Times shiga dap ni hte san htai galaw ai shaloi “Anhte ni arau hkawm sa wa ra na re; hpa majaw nga yang ndai zawn hkawm sa ai rai yang lai wa sai aten ni hta na chye na shut ai lam ni hte dam ana hpe tsi lajang shatsawm la lu na re majaw re” ngu tsun da nga ai.

Miwa mung Asuya gaw Kahtawlic Saradaw yan rai nga ai Joseph Guo Jincai hte John Baptist Yang Xiaoting hpe Mungkan Ramma hte seng nna 2018 shaning, Vatican kaw galaw ai (synod) zuphpawng kaba hta shang lawm na matu ahkaw ahkang jaw lai wa ai.

2019 shaning hta Sarabyin kawn Mongolia kata Jining Sasana hte Sananxi mungdaw Hanzhong Sasana matu Anhtony Yao Shun hte Stephen Xu Hongwei yan hpe Saradaw shatai lit shatsam ai hpe Miwa Asuya kawn madi shadaw hkap la da sai lam chye lu ai.

Coronavirus ana zingli Chyam bra nga hpang ai ten kaw na nan Sarabyin Rung hte Miwa mungdan lahkawng lapran shada garum shingtau madi shadaw hkat let ana zingli hpe arau gasat nga sai re lam mung chye lu ai.

Miwa mungdan na Kahtawlik Hpung masha ni gaw Wa Sarabyin Casa Santa Marta kaw nawng jau ai shani shagu nga Misa Hkungga hta online hku shang lawm nga ma ai.

Shada hkrum shaga ai hta shada chye na hkat ai lam nga nga ai majaw, shawng lam hta grau ai myit hkrum myit ra lam hpe gaw de sa wa lu na hpe Wa Sarabyin hte Vatican kawn ra sharawng ai re hpe Vatican shiga dap kawn ndau da nga ai.

#churchnews
#rvakachinservice