Madu Yesu Hte Mahku Hkau Ai Lam

Anhte shinggyim masha ni, mungkan ga ntsa sak hkrung hkawm sa nga ai ten hta, manaw manang ngu ai gaw nga chyalu rai nga ai. Manaw manang kaja gaw prat a matu ra ahkyak nga ai.

Tinang a prat hta manaw manang kaja madu lu na matu gaw shada da mahku hkau ai lam shawng nga ra nga ai. Hku hkau ai lam hpe gaw de sa wa lu na matu, shing nrai, anhte langai hte langai mahku hkau ai lam lu la na matu gaw anhte shada da myit hkrum myit ra kahkyin gumdin let chye na hkap la hkat lu ai myit masa rawng ra ai gaw ahkyak dik rai nga ai.

Dai majaw, anhte a prat hta anhte hpe chye na ya ai wa, anhte hpe galoi mung garum ya lu ai wa, anhte hpe galoi mung tsaw ra n jin ai wa, anhte hpe lam madun yu lanu lahku ya ai wa, anhte a matu sak jaw ap nawng ya lai wa sai wa, anhte a manang kaja Yesu Hkristu nga ai ngu ai hpe dum chye ra nga ga ai.

Madu Yesu anhte yawng hte mahku hkau mayu ai lam, anhte hte jinghku/ manang byin mayu ai lam Ja Chyum Mungga hta asan sha tsun da nga ai. Yawhan a laika 15:15 hta: “Ngai nanhte hpe ‘jinghku’ ngu na nngai; nye Wa kaw na ngai na la ai hte yawng, ngai nanhte hpe chye shangun na nngai,” nga nna tsun da nga ai.

Madu Yesu Hkristu a hpang hkan nna Shi a matsun ni hpe hkan shatup nga ai anhte Hkristan hpung masha ni malawng maga gaw Yesu Hkristu hpe anhte a Hkyela Madu, anhte a hkawhkam wa, anhte a sara hku nna sha mu mada let anhte a manang kaja, ni htep dik ai manang langai mung re ngu ai hpe n dum sawn la nga ga ai.

Madu Yesu Hkristu gaw anhte hpe Shi hpang de ga sa shaga na hpe ra sharawng nga ai. Anhte a prat hta ru yak jam jau jam hkau, myit ru myit tsang lam ni hkrum sha wa ai ten hta, Shi hpang de sit shang wa nna Shi hte ni htep ai hku nna mahku hkau ai lam gaw gap sa wa na matu galoi mung anhte hpe ala nga ai re.

Madu Yesu a ra sharawng ai lam ni, anhte hpe byin shangun mayu ai lam ni hpe chye na wa ai rai yang, Yesu Hkristu hpe tinang a prat hta galoi n mai lu ai manang kaja langai hku nna lu hkap la wa na rai nga ai. Madu Yesu hte mahku hkau let, Shi hpe prat a manang kaja hku nna lata la ai rai yang jet ai ngwi pyaw simsa ai prat hpe madu lu na rai nga ai.

Shakawn Kungdawn 5:3 hta: “Madu e, jau jau nye a nsen na lu na ndai; jahpawt manap e ngai na a matu hkungga lajang da nna, a mada nga nngai,” nga nna ka da ai hpe hti yu ai shaloi, Madu Yesu gaw anhte hpyi ai lam ni, anhte a akyu hpyi nsen ni hpe aten shagu madat ya nga ai lam chye lu nga ai. Anhte a hkam sha ai lam, anhte hta byin nga ai masa lam ni mahkra hpe chye na ya nna, anhte a ntsa sadi dung ai manang kaja Yesu Hkristu nan rai nga ai.

Titu hpang de San Pawlu shagun dat ai laika1:3 hpe hti yu yang, masu magaw n chye ai Karai Kasang gaw htani htana asak lam moi chyaloi nhkoi kaw nna ga n dat da sai re lam, dai ga ndat hpe mung shagrin da sai re lam, ga sadi grin ai, teng man dinghpring ai Madu re lam chye lu nga ga ai.

Matut nna Yawhan a laika 15:13 hpe hti yu yang, “jinghku  wa a matu tinang a asak nawng kau hkra tsawra ai myit hta, grau kaba ai tsawra ai myit gaw kadai hta mung n rawng nga ai,” nga lu hti nga ai. Manang kaja ngu ai gaw tinang tsaw ra ai, tinang manu shadan ai wa a matu makawp maga sak jaw ap nawng na jin jin rai ra ai lam hpe Madu Yesu ta tut hkrang shapraw madun dan lai wa sai rai nga ai.

Madu Karai Kasang gaw shi a amyu masha ni hpe galoi n kabai da/ galoi nkau da ai, Shi a amyu masha ni hpe myit daw myit hten ai lam nnga ai sha galoi mung garum ya nga ai, galoi mung makawp maga let shanhte matu tsap ya taw nga ai lam mu chye lu nga ai. Tara Jahprang laika 31:6 hta: “nanhte n-gun da ting mu, myit nden shaja mu, nanhte hte rau hkawm sa nga ai wa gaw na a Karai Kasang  nan rai nga ai; Shi nang hpe kau da na nrai,” nga nna anhte hpe n-gun jaw da nga ai.

Dai majaw, Yawhan a laika 14:1-3 hta, Yesu, Shi si hkam na shawng e Kasa ni hpe tsun ai gaw: “nanhte myit hkum  ru myit, Karai Kasang hpe kam mu, Ngai hpe mung kam mi; Nye wa a nta e nga shara law law nga ai,..nanhte a matu nga shara lajang na she, ngai wa na nngai; shingrai ngai wa nna, nanhte a matu nga shara lajang da nhtawm, ngai nga ai shara e nanhte mung nga lu hkra, ngai bai sa nna nanhte hpe woi la na nngai,” nga nna kasa ni hpe sha n-ga, nang ngai anhte yawng hpe ga sadi jaw da sai re. Yesu Hkristu gaw anhte hpe galoi n kau da ai, shi hte grau grau nna mahku hkau ai lam nga wa na matu saw shaga nga ai. Madu Yesu anhte a matu manang kaja tai ya ai lam gaw anhte hpe jaw ya ai shi a kumhpa nan rai nga ai.

Lahta de tsun mat wa ai Chyum laika daw ni hpe atsawm sha hti sumru dinglik yu ai rai yang, Madu Yesu gaw teng sha anhte hte rau mahku hkau mayu, manang tai na matu myit ra sharawng ai re lam chye lu nga ai. Raitim, anhte myit yu ra ai lam langai gaw: Yesu Hkristu anhte hpe dai ram manu shadan tsawra nga ai, Shi hte rau jawm pawng mahku hkau nga na matu saw shaga nga yang, nang ngai anhte ni mung Madu Yesu hte manang kaja tai nga sai kun? Shing nrai, Madu Yesu hte mahku hkau ai lam garai n nga ai rai yang mung, Shi hte ni htep ai hku nna nga sa na matu shajin da sai kun? myit yu mai nga ai.

Anhte ni Shi Madu hte ni htep ai hku nna hku hkau nga sa mayu ga ai rai yang, shi Madu a sak prat nga sat nga sa lam ni hpe  kasi la ra na rai nga ai. Bai nna, Yesu Hkristu a ngwi pyaw simsa lam hpe mung, nni nhkri lam ni hpe mung shi Madu hte rau garan hkam sha gwi ra ai. Shi hpe madat mara na hte Shi a tara mungga lam ni hpe mung jahpring shazup hkan nang hkan sa ra nga ai. Yawhan a laika 14:21 hta: “Nye a ga matsun lu la nna hkan shatup ai wa gaw, ngai hpe tsawra ai wa rai nga ai; ngai e tsaw ra ai wa hpe, nye Wa mung tsawra na wu ai,” nga nna tsun da nga ai. Madu Yesu hta, shi a tsaw ra myit hta anhte a prat hpe ap nawng daw jau gwi ra nga ai. Madu Yesu hkawm sa mat wa ai lam hku anhte shi a hpang hkan ai ni gaw hkan nang hkan sa ra ai. Dai rai yang she, anhte a wenyi sak prat hkrun lam a matu myit mada lam/ awng dang lam lu la na rai nga ai.

Anhte a prat galai shai wa lu na matu gaw shawng nnan Madu Yesu Hkristu hte mahku hkau ai lam nga ra ai. Dai majaw, Kolose ni hpang de San Pawlu shagun dat ai laika 2:7 hta: “Hkristu hta ru jung nna gaw da nga ai hte, nanhte sharin achyin la ai hte maren, nanhte a makam masham hta ngang ngang kang kang rai nga mu,”

nga tsun da nga ai. Hpilipi ni hpang de shagun dat ai laika 4:13 hta; “ngai hpe n-gun lagaw shaja ya ai wa a majaw, lam shagu hpe ngai hkam lu nngai,” nga nna San Pawlu sakse hkam da nga ai. nang ngai anhte a prat hta mung Madu Yesu hte mahku hkau let, shi hta manoi manat let sak hkrung hkawm ai rai yang, kaja wa awng dang ai lam law law lu la na gaw teng sha rai nga ai….

Deacon Paul Zinghtung  Htoi Naw