Madu Yesu Hkristu Hte Rau Sak Hkrung Hkawm Sa Ra Ai Lam

 

            Madu Yesu Hkristu a hpang hkan ai anhte hkristan hpung masha ni gaw Yesu Hkristu hte rau sak hkrung hkawm sa nga ra ga ai. Kashin Kamun Chyeju kumla a marang e, anhte gaw shut hpyit mara hta si mat sai rai nna, Hkristu Yesu hta Karai Kasang a man e ahkrung nga ai rai nga ai nga nna Roma ni hpang de San Pawlu shagun dat ai laika 6:11 hta tsun da nga ai. Dai rai yang, anhte Madu Yesu hta gara hku sak hkrung na i? Ja Chyum Mungga hta, Madu Yesu, Shi hkum nan ndai ga san hpe tsabyi ru ga shadawn hku nna htai ya sai rai nga ai. Yawhan a laika 15:5-6 hta: “Ngai gaw tsabyi ru madung rai nga nngai, nanhte gaw lakung lakying ni rai nga myit dai; ngai hta noi nga nna, ngai mung dai wa hta noi nga ai rai yang gaw, dai wa  gaw asi law law si wa lu ai. Kaning rai nme law, ngai hte hka jang, nanhte hpa mung n galaw lu myit dai. Ngai hta n jung n noi ai wa gaw, lakung lakying hpe zawn kabai kau ai hkrum nna hkraw mat wa ai hte, masha ni e magawn la nhtawm, wan hta kabai bang nna, hkru krawp mat ai kaw du wa na ra ai,”

nga nna tsun da nga ai. Kashin Kamun a marang e, anhte gaw Yesu Hkristu hta asak nnan hte sak hkrung hkawm sa ai ni rai nga ai.

            Alexanda na San Cyril tsun ai hta, anhte gaw Chyoi pra ai wenyi hpe hkam la ai a marang e, shi hte rau jawm pawng nga lu na matu Hkristu a daw chyen ni tai wa sai re. Hpa majaw nga yang, Chyoi pra ai wenyi a marang e, Hkye la Madu Hkristu hta anhte gaw langai sha rai nga ai. Madu Yesu Hkristu hte rau sha jawm pawng ai wa gaw Shi hte myit mang langai sha tai wa ai, nga ai. Yesu Hkristu gaw shi a asak gambum pyi anhte hpe garan jaw ya sai re. Dai majaw, anhte langai hte langai kade mi shai hkat nga tim/ n bung hkat nga ai raitim, Yesu Hkristu hte rau langai sha jawm pawng nga lu ai rai nna, anhte shada da mung Madu Yesu jaw ya ai Chyoi pra ai wenyi a atsam hte myit hkrum myit ra gahkyin gumdin lam lu la ai rai nga ai.

            Hpa majaw, Yesu Hkristu hte rau sak hkrung ra ata…. nga yang, anhte gaw Hkristu a daw chyen ni re sha n-ga, Yesu Hkristu gaw anhte a baw, anhte a npawt daju nan rai nga ai. Ga shadawn, anhte a hkum hkrang na sai, baw kaw nna hkum hkrang daw chyen shagu de lwi hkrat wa ai zawn, anhte a baw rai nga ai Hkristu a nsa wenyi mung Shi hkum hkrang a daw chyen ni rai nga ai nang/ngai anhte marai hkum shagu hta lwi hkrat wa ai rai nga ai. Dai gaw, Madu Yesu anhte hpe garan jaw ya ai Shi a wenyi asak gambum kumhpa nan rai nga ai.

            Dai majaw, anhte gaw Madu Hkristu hta shara lu ai ni re… ngu ai hpe dum chye ra nga ga ai. Kawa Karai Kasang anhte shinggyim masha ni hpe hkum hkrang, myit masin, wenyi lam n bung ai hku nna/ laklai ai hku nna hpan tawn da sai re. Tinang hta byin nga ai masa, shing nrai, tinang a ningpawt hkrang gaw Karai Kasang a ra sharawng ai lam re, Karai Kasang a yaw shada ai lam rai nga ai. Ehpesu ni hpang de San Pawlu shagun dat ai laika 2:10 hta: “Hkristu Yesu hta e hpan da ai ni gaw, anhte rai nga ga ai; mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da mu ai,” nga nna tsun da nga ai. Korinhtu ni hpang de shagun dat ai laika langai 7:7 hta mung: “masha yawng mayawng ngai zawn rai na ngai ra nngai; raitimung, langai hte langai gaw Karai Kasang kaw na tinang a chyeju kumhpa lu la shajang ma ai; marai langai mi gaw amyu langai mi, kaga gaw amyu kaga lu la shajang ma ai,” nga nna Karai Kasang jaw ya ai n bung ai shaman chyeju a lam San Pawlu tsun da nga ai.  

Anhte langai hte langai n bung hkat ai raitim, “nanhte gaw Hkristu a hkum hkrang rai nga ai hte, de a daw shan ni rai nga myit dai,”

nga nna Korinhtu ni hpang de shagun dat ai laika langai 12:27 hta mu hti lu nga ai. Bai, anhte hkam la lu ai shaman chyeju hte seng nna, Ehpesu ni hpang de San Pawlu shagun dat ai laika 4:7 hta, “Hkristu a kumhpaw kumhpa hpe sharam ya mi ai hte maren, anhte langai hte langai hpe dai chyeju ren di mi ai,” nga nna mung tsun da nga ai.

Karai Kasang gaw nang ngai anhte hpe hpan tawn da sai hte maren, laklai ai shaman  chyeju mung jaw da sai re. Dai majaw, tinang kadai re ngu ai hpe dum chye let, tinang a hkum hpe hkap la chye na ahkyak nga ai. Tinang a hkum hpe tinang hkap la chye ai rai yang sha, Karai Kasang a yaw shada ai lam, Karai Kasang laklai ai shaman chyeju, Karai Kasang a tsawra myit hpe hkam la lu nna, tinang a prat hpe mung myit pyaw myit dik lam lu la na rai nga ai. Tinang a prat hpe myit pyaw myit dik ai lam lu nna, masha wa a prat hpe mung chye na ya lu na rai nga ai. Anhte langai hte langai hta nga ai laklai ai shaman chyeju, n bung ai atsam marai ni hpe mu mada hkap la chye wa lu na rai nga ai. Anhte yawng gaw Madu Karai Kasang a man hta maren sha rai nga ai, Karai Kasang a yaw sing yaw shada ai lam hta yawng mayawng gaw ahkyak ai ni hkrai rai nga ai… ngu ai hpe chye na wa nna, shinggyim masha shada da manu shadan hkat let Karai Kasang a mungdan gawgap ai lam hta rau sha jawm pawng galaw sa wa lu na rai nga ai.

Mungkan ga ntsa hta tinang zawn re ai, tinang hte bung ai masha kaga n nga ai. Dai majaw, Madu Hkristu hta lu da ai tinang a shara kaw galai ya na masha kadai mung n nga ai. Tinang a shara kaw tsap na gaw tinang sha rai nga ai. Dai gaw Karai Kasang jaw da ai anhte a lit nan rai nga mali ai. Ehpesu ni hpang de San Pawlu shagun dat ai laika 4:16 hta:

“Shi kaw nna dai hkum ting gaw, hkrihkraw lamyi laman ni yawng matut manoi shachyaw nga let, daw shan ni langai hte langai shachyen lu nna, tinang kung kaba wa ai lam, dai hkum hkrang gaw shabyin wu ai,”

nga nna tsun da nga ai.

Anhte gaw Yesu Hkristu a daw chyen ni rai nga ga ai majaw, Shi a magam ningsang lam ni hta shang lawm gun hpai ra nga ga ai. Dai zawn, Yesu Hkristu a masing, Shi a magam lam ni hta shang lawm lu na matu, moi shawng na anhte a arawn alai dingsa hpe raw kabai kau let, anhte a myit masin wenyi nnan  hte tengman ai, dinghpring chyoi pra ai Karai Kasang hpan tawn da ai gawng shing-yan ningnan hpe dagraw la nna sharin achyin hkam la ra ai lam Ehpesu ni hpang de shagun dat ai laika 4:22-24 hta San Pawlu tsun da nga ai. Dai zawn, anhte a myit masin nnan, hkum hkrang nnan hte nga sa ai lam gaw Madu Yesu Hkristu hte rau sak hkrung hkawm sa ai lam rai nga ai.

 

Deacon Paul Zinghtung Htoi Naw

Add new comment

17 + 3 =

Please wait while the page is loading

Madu Yesu Hkristu Hte Rau Sak Hkrung Hkawm Sa Ra Ai Lam | Radio Veritas Asia

Error

The website encountered an unexpected error. Please try again later.