Karai Kasang Kaw Akyu Hpyi Ai Ten Shagu Shi Galoi Mung Pat Shingdang Ai Lam N nga Ai Sha Hkap La Nga Ai

Lai wa sai Laban shani na Missa hkungga hta Wa sarabyin Francis kawn Karai Kasang gaw anhte shi hpe manoi let akyu hpyi ai hpe galoi mung pat shing dang ai lam n nga ai hte anhte hkum hkrang hte seng ai hpe Karai Kasang hte galoi mung matut mahkai nga let anhte a makam masham hpe kri dung hkra galoi mung shakut nga ra ai lam hpe n-gun jaw tsun lai wa ai.

Makam masham hta kri dung ai lam gaw anhte hte Karai Kasang a lapran na matut mahkai nga ai lam rai nga ai, dai majaw anhte hku nna shi hta akyu hpyi ai lam galaw ai hpe galoi mung pat shing dang ai lam n nga ai.

St.Peter’s pa kaba  kaw du sa wa ai Kam sham ai hpung masha hkying jan hpe Wa sarabyin kawn anhte ni Karai Kasang hpe ya jang ra kadawn ai hte hpyi nem mayu ai lam ni rai tim shi hpe kam sham ai hte shi hpang de nhtang kayin wa nna akyu hpyi ai rai yang shi galoi mung lajang ya nga ai hpe tsun lai wa ai.

Wa sarabyin gaw shani kaang na Angellus akyu hpyi ai lam garai n galaw shi yang dai shani hti ang ai Mahte a kabu gara shiga hpe shawng hti lai wa ai. Dai kabu gara shi ga hta na la sai Canaanite num langai gaw shi a kasha hta kap nga ai “Sa tan” hpe shamai kau ya na matu Karai Kasang hpe kam sham ai myit kaba hte hpyi shawn ai, shi a makam mashan kri dung ai myit a majaw Karai Kasang gaw shi hpe na a kam sham ai myit nga ai hte maren byin wa u ga ngu nna tsun dat ai hte  shi a kasha num kasha kalang ta machyi ai kaw na mai tsai mat wa ai lam re hpe tsun dan lai wa ai.

Dai Num a aja wa akyu hpyi ai nsen hte shi a ngang kang ai myit masin nga ai a majaw Karai Kasang grau nna matsan dum ai hte garum ya mayu ai rai nga ai, bai shi a myit ni galai shai wa ai hpe anhte ni mu chye lu na lam mung tsun lai wa ai.

Dai zawn re ai lam ni gaw Karai Kasang a tsawra myit nan rai nga ai. Karai Kasang gaw shi tsawra ai kashu kasha ni hpe galoi mung shara langai kaw sha ntawn da ai, shi hte gring dan ai shara hta nga lu na matu shi galoi mung lajang ya nga ai lam re ai hpe mung Wa sarabyin tsun lai wa sai.

Anhte Christan hpung masha ni Madu Yesu hpe yu let kasi la ra nga ai lam hpe Wa sara byin  tsun shadum lai wa ai.

Dai num a Makam masham kade daram kri dung nga ai lam hpe san jep lai wa ai re lam hpe mung mu shangun nga ai.

“Ndai num hta laga myit sawn hta la na lam law law n nga tim tatut shi galaw dan ai gaw tsawm htap nga ai” shi (Canaanite Woman) Karai Kasang kaw ni htep let shi hta ra kadawn nga ai lam hpe Madu Yesu hpe makoi magap ai lam n nga ai sha sit shang ai hte hpyi shawn lai wa ai a majaw shi hta ra kadawn nga ai lam ni hpe hkam la lu ai, dai majaw anhte ni ra kadawn nga ai lam hpe Karai Kasang hpe tsun dan na gaw ahhkyak nga ai nga nna tsun lai wa ai.

Ndai gin lam hpe yu nna anhte  hpung masha re ai lam hte nseng nna Makam masham gade ram ngang kang ai hte Karai Kasang hte ga shaga nga ai lam rai nga ai hpe Wa sarabyin  tsun lai wa ai.

Ndai num a makam masham gaw Karai lam yan hku yu ga nga yang n hpring zup tim, shi a kaja wa Karai Kasang hpe ga hte sha nre kaja wa tatut hta mung akyu hpyi ai lam hpe galaw nga ai, Karai Kasang gaw anhte ni a kyu hpyi ai lam hpe galoi mung pat shing dang ai lam n galaw  nga ai hpe Wa sarabyin  tsun lai wa ai.

Dai majaw shi anhte hpe “Hpyi Mu lu na mara ai, Tam mu Mu na mara ai, ah kawk u hpaw ya na ra ai” ngu ai jachyum mung ga hta tsun da ai ga hpe tsun lai wa let ndai lam ni mahkra hpe yu dat ai shaloi anhte ni mung tinang hkum tinang ga san ni hpe san la ra ai lam, Wa sarabyin  tsun lai wa ai.

Madu Yesu hta ndai zawn galai shai wa ai lam hpe myit hta bang da let anthe ni mung Myit sawn sum ru yu ra nga ai, “Nye a ningmu ni hpe galai shai kau na matu ngai hta ahtsam nga ai kun, masha hpe gara hku matsan dum na hte chye na ya na ngu ai hpe ngai chye da nga sai kun, ya ngai nga ai shara hta ngai ngang kang hte nga lu sai kun” ngu ai ndai lam ni hpe myit sawn la na matu anhte hpe hpaji jaw da nga ai.

Anhte kam sham nga sai ni hpe tinang a myit masin hta ngang kang ai myit nga ai kun ngu ai hpe tinang hkum tinang san yu na matu mung n-gun jaw tsun shadum lai wa ai.

Num sha a makam masham hpe bai anhte ni nhtang myit yu ga, “nye a makam masham gaw gara hku rai nga sai?”, ngai nye a gasi hte sawn la ai lam hta sha hkring taw nga ai kun shing nrai  ngai kaja wa tatut hta akyu hpyi nna sak hkrung nga ai kun, ngai Karai Kasang hte ga gara hku shaga nga ai hpe chye nga ai kun, ngai shi hpe galoi mung shaga nga ai kun (sh) ngai tsawm htap ai hte hkan sa mai ai lam ni hpe sha hti let myit dik nga ai kun ngu ai ndai ga san ni hte san ding lik la na matu anhte hpe hpaji jaw tsun lai wa ai.

Chyoi Pra Ai Nu Maria gaw anhte hpe “gara gaw gaja ai hpe chye na hkawn hkrang lu na matu hte anhte a makam masham ngang wa na matu” anhte hpe garum ya u ga ngu Wa Sarabyin kyu hpyi let hpung dim dat tsun lai wa ai hpe chye lu ai.