Hkye Hkrang La Ai Lam Hte Hkan Sa Ra Ai Tara Ni

Hkye hkrang la ai lam hte hkan sa ra ai tara ni ...

Karai Kasang gaw shi a hkrang sumla, nsam hte bung ai  shinggyim masha anhte hpe hpan tawn da ai lam ningpawt ninghpang laika 1:26 hta ka da nga ai. Shi a hkrang bung sumla hte maren hpan tawn da hkrum sai anhte shingyim masha ni hta, kaja ai hte n kaja ai hpe garan gyin hka chye lu ai myit nyan marai ngu ai nga chyalu rai nga ai. Dai anhte a myit nyan marai hte tengman ai lam hpe hkan tam let kaja ai arawn alai ni hpe hkan sa shatup nga ra ga ai.Tinang a myit nyan marai hte Karai Kasang hpe chye chyang wa nna, tsawra kam hpa myit kaba hte tinang a prat hpe shi hte rau jawm sak hkrung hkawm sa nga lu ai lam re.

Karai Kasang hte jawm asak hkrung hkawm sa ai lam gaw, tinang a asak prat yawng hpe Karai Kasang hpang de ap tawn da nna, shi a tara mungga hte maren nga sa ai lam rai nga ai.Karai Kasang hpe tsawra let shi hte rau jawm sak hkrung hkawm sa nga ai zawn, Karai Kasang a hkrang bung sumla ni rai nga ai anhte shinggyim masha shada da a n tsa hta mung, tsawra myit tawn da nna rau sha jawm pawng nga ra ga ai. Ndai gaw masha langai a jet ai prat a lachyum rai nga ai. Anhte shinggyim masha shagu hta, Adam hte Ewa Karai Kasang a ga n madat ai majaw lu wa ai npawt shut hpyit mara kap ai ni hkrai rai nga ai. Dai zawn rai n pawt shut hpyit mara kap nga ai majaw, anhte shinggyim masha ni a myit gaw n kaja ai lam de sha shanawng nga ga ai re.

N kaja ai lam de shanawng nga ai majaw masha a prat gaw, hten run hten za ai lam de du wa ai rai nga ai. Dai majaw masha gaw jet ai ngwi pyaw simsa lam n lu la mat nna, shut hpyit mara, yubak a mara tai mat nga ai lam Yawhan 8:34 hta tsun da nga ai.Bai Yawhan a laika daw 3:19 hta, “ Masha gaw arawn alai n shawp ai lam galaw ga ai majaw, nhtoi hta nsin hpe grau tsaw ma ai” nga nna mung tsun da nga ai. Dai re majaw, masha gaw si hkrung si htan lam, hten run hten za lam hta sha, sak hkrung nga ra mat ai lam rai nga ai.Karai Kasang a hkrang bung sumla, Karai Kasang a kashu kasha langai hku nna tup hkrak bai nga sa lu na matu, hkye hkrang la ai hkrum lu na ra ahkyak nga ai.Marai langai ngai kaw nna  hkye hkrang la ai hkrum lu na matu grai ahkyak nga ai.

Shut hpyit mara kap ai shinggyim masha ni hpe hkye hkrang la na matu gaw, shut hpyit mara n kap ai, san seng san pra ai masha rai ra nga ai. Ga shadawn, htawng rawng ai masha shada da n mai hkye hkrang la hkat nga ai.Htawng kata kaw na masha hpe hkye la mayu yang, htawng n rawng ai masha rai ra nga ai. Dai hte maren sha, shut hpyit mara, yubak nsin htawng kata hta nga nga ai anhte shingyim masha ni hpe hkye la na, shalawt dat na wa gaw, shut hpyit mara n kap ai san seng san pra ai masha re ra nga ai. Anhte hpe shalawt dat ya lu ai wa gaw, Yesu hkristu nan rai nga ai. Yesu hkristu gaw anhte shinggyim masha ni hpe nat tsa dan wa gyit hkang da ai kaw nna, shalawt dat ya lu ai. Lawt lu na lam hpe mung, madun dan lu nga ai.Shalawt dat ai hta sha n-ga, Karai Kasang hte mung, masha shagu hpe mung, bai mahku mahkau ya let hpring tsup ai Karai Kasang hte bungpre ai masha asak aprat hpe bai gaw gap ya nga ai rai nga ai.

Yawhan 1:4 hta  Yesu hkristu gaw shinggyim masha ni hpe nhtoi hte asak jaw ya na matu, sa du sa ai wa re ai lam tsun da nga ai. Mara a mayam prat hte shut hpyi ai lam ma hkra kaw na shalawt dat ya nna, mai kaja ai lam hte tengman dinghpring ai lam de hkawm sa shangun nga ai.Madu Yesu gaw hpang gara ai ni a matu asak hka hpawk rai nga ai. Yesu gaw,

“Asak muk gaw ngai rai nga nngai, ngai hpang de sa ai wa gaw, kaw si hkrum na nrai, ngai hpe kam sham ai wa mung, galoi hpang gara ai hkrum na nrai”

nga nna, Yawhan 6:35 hta tsun da nga ai. Bai Yawhan a laika 10:11 hta mung, “ Ngai gaw sagurem wa kaja rai nga nngai. Sagurem wa kaja gaw, sagu ni a matu tinang asak hpe nawng kau ya lu ai “ nga ai. Karai Kasang hpe hkan tam ai ni a matu Madu Yesu gaw lam rai nga ai zawn, tengma ai hte asak mung rai nga ai lam Yawhan 14:6 hta lu mu hti nga ai. Madu Yesu a prat, shi a tara mungga hte shi galaw ai amu magam yawng hte gaw, anhte shinggyim masha ni hpe shalawt dat ya ai lam rai nga ai hpe mu lu nga ga ai.

Hkye Hkrang la ai ngu ai gaw,  tinang a hkum hpe tinang shut ai hku nna mu mada ai ningmu ni kaw nna, shalawt dat ai lam rai nga ai. Dai hta n-ga, n kaja ai lam ni kaw nna lawt lu ai ting gyeng myit, gawngba ai lam, masu magaw myit ni kaw nna shalawt dat ai hte, kaja ai amu magam hpe galaw na matu, gaya ai myit ni kaw nna shalawt dat ai lam rai nga ai. Masha gaw hpring tsup ai tengman dinghpring ai lam ma hkra kaw nna lawt lu na matu, Karai Kasang hpang de gayin wa ra nga ga ai. Tinang a hkum hpe tinang ladu shalai kam hpa ai myit hpe la kau nna, Madu Karai Kasang hpang de sit shang, kam hpa shamyet shanat nga ra ga ai. Dai re yang she, masha gaw Madu Yesu jaw ya ai Mungkan a nhtoi, asak hte seng ai nhtoi hpe lu la nna, San Pawlu zawn, “nsin a ahkang aya kaw nna anhte hpe mawai la mi ai “ ngu tsun lu na rai nga ai.

Bai, hkye hkyang la ai lam ngu ai gaw si ai kaw nna lawt lu ai lam re. Anhte shinggyim masha ni gaw htani htana asak hpe lu la na matu, si ai kaw nna lawt lu ra nga ga ai. Karai Kasang gaw mungkan masha ni hpe tsaw ra ai majaw, shi a kasha shingtai hpe Mungkan ga de shangun dat sai re. Dai Karai Kasang a kasha hpe kam sham ai ni nlang hte gaw, hten bra nhkrum ai sha, htani htana asak hpe lu la na ra ai nga nna, Yawhan 3:16 hta ka da nga ai. Tsun mayu ai gaw, Yesu hkritu hpe kam hpa ai ni yawng hte gaw, si ai kaw nna shalawt dat ai hkrum lu na ngu tsun mayu ai lam rai nga ai.

Madu Yesu Lazaru hpe si ai kaw nna bai jahkrung sharawt dat ai lam gaw, si ai kaw nna hkye hkrang la ai lam a sakse nan rai nga ai. Hpa majaw nga yang Yesu hkritsu gaw, bai hkrung rawt ai lam hte asak hkrung ai lam rai nga ai. Shi hpe kam sham ai wa gaw si mat ti mung, ahkrung nga na ra ai nga nna Yawhan 11:25 hta tsun da nga ai.

Hkristu hta hkungga tsawra ai Nu Wa Hpu Nau Ni, hkye hkrang la ai lam gaw htawm hpang prat a matu sha myit mada mai ai lam n rai, ndai dinghta mungkan prat hta mung lu la mai ai, myit mada na mai nga ai.Hkye hkrang la hkrum ai prat hpe lu la na matu anhte shakut ra nga ga ai. Hpa majaw nga yang Yesu Hkristu gaw  hkye hkrang la ai lam hpe jaw ya sai rai nga ai. Hkye hkrang la ai lam gaw, masha hkum shagu hpe jaw ai Madu Karai Kasang a Kumhpa rai nga ai. Raitim, hkye hkrang la ai lam hpe lu madu lu na matu gaw anhte shinggyim masha ni a lit nan rai nga mali ai.Hkyehkrang la hkrum ai prat gaw tinang ahkum hpe ladu shalai kam hpa ai, myit tsaw myit dap ai lam nnga ai sha,  Karai Kasang hpe madung da let kaja ai lam hku sak hkrung hkawm sa ai prat hpe ngu ai re.

Dai majaw hkye hkrang la ai lam gaw hten run hten za ai lam kaw nna, ngang grin ngang kang ai lam de lawt lu ai n kaja ai lam kaw nna kaja ai lam de lawt lu ai yubak shut hpyit mara kaw nna mai kaja ai lam de  htani htana shalat dat ai ndai zawn re ai lam ni hpe ngu mayu ai re.Hkye hkrang la ai prat hpe madu lu ai gaw, Yesu hkritu hta sak hkrung ai lam re nga nna Roma 6:1-12 hta mu hti lu nga ai.Madu hte sak hkrung ai lam gaw, Yesu Hkristu hpe kasi da nna, shi sharin shaga ai hte maren, anhte a prat hpe shi hte  jawm pawng let sak hkrung hkawm sa ai lam rai nga ai. Dai gaw anhte hkistan hpung masha ni hkan sa ai lam rai nga ai.

Hkristan hpung masha ni hkan nang hkan sa shatup ra ai tara gaw, jet ai masha langai hku nna nga sa na matu rai nga ai. Anhte hkristan hpung masha ni a tara gaw, Karai Kasang myit ra ai hku, shi sharin shaga ai hku hkan nang hkan sa na matu rai nga ai. Anhte hkristan ni a prat gaw hkye hkrang la ai lam hpe madung da let myit mada sak hkrung hkawm sa ai lam rai nga ai.

Deacon Nangzing Htoi Naw ( Myitkyina)

Add new comment

12 + 4 =