Grau Shinggyim Jet Ai Mungkan Byin Tai Hkra Galaw Ga Nga N-na Wa Sarabyin Tsun

Daw hten n kung n byen ai masha ni a sari sadang hpe makawp maga ya ai lam ni galaw nna grau shinggyim jet ai mungkan byin tai hkra galaw ga nga nna Wa sarabyin Francis tsun dat nga ai. Dec praw 3 ya shani galaw ai “Daw hten n kung n byen ai masha ni a mungkan masat nhtoi kaba shani a matu ndau shapraw ai Wa sarabyin a matsun ndau laika hta ya na zawn tsun dat ai lam rai nga ai.

“Daw hten n kung n byen ai masha ni hpe tsi gawn lajang lakawn lamawn la lam hte seng ai magam lam ni hta rawng jat bawng ring wa ai lam ni law law nga nga a. Raitim mung, daw hten n kung n byen ai masha ni hpe atsawm n lakawn la kam ai masa ni dai ni aten naw mu mada nga ai. Ndai masa gaw, n kung n byen ai masha ni hte shanhte a dum nta masha ni hpe garum lakawn la lam galaw na ra nga ga ai, ngu ai lam hpe shadum ya nga ai lam sha n ga, lachyen ginhka ai lam ni hpe koi kau nna grau tsawm htap ai, grau shing gyim jet ai mungkan byin tai hkra galaw na ra nga ai ngu ai lam hpe mung shadum ya nga ai lam re, dai ni mungkan hta nga nga sai hpung tang hpaji rawt jat lam ni hpe asung jashawn jai lang nna ndai n kung n byen ai masha ni hpe lakawn la ra ai, garum la ra ai, ndai zawn garum lakawn la ai lam ni a marang e, ndai masha ni shing gyim uhpung uhpawng kata hta sari sadang hte nga pra shamu shamawt lu na rai ma ai” ng anna Wa sarabyin a ndau laika hta tsun dat nga ai.

Matut nna Wa sarabyijhn tsun ai hta, “asak kaba wu gut gu sai masha ni hpe mung myit dum nga ai, ndai asak kaba sai masha ni mung n kung n byen ai shamu shamawt yak ai masha ni rai nga ma ai, lakawn la na lit grai li la ai ngu mu mada nna shanhte hpe lakawn la nkam ai, kabai da ai masa ni law law nga nga ai. Nkau masha ni gaw grau ahkyak ai, nakau masha ni gaw nau n ahkyak ai ngu ai masa shing gyim masha hpe hpan ga garan nna ganawn mazum lam galaw ai lai masa gaw mara nan rai nga ai majaw dai zawn re ai myit lai ni hpe adawt manga kau mayu ai myit masa ni anhte hta nga wa hkra shakut ra ga ai” nga nna Wa sarabyin tsun dat nga ai lam Vatican shiga dap kaw nna shana dat nga ai.       

Soruce : Vatican News

#churchnews

#rvakachinservice