​Wa Sarabyin: Karai Kasang Hta Kahkyin Gumdin Lam Tam Mu, Agung Alau Hkrum Ai Lapran Shi A Mungga Hpe Dum Hprang Nga Mu

February 26, Lusha Gam Ladaw (1), laban shani, Wa Sarabyin Francis, lusha gam ladaw hta wenyi lam hte seng nna sak hkrung nga sa ra ai lam hte seng nna tsun shadum da ai.

Madu Yesu, Kashin Kamun Sara Yawhan Baptista a lata hta kashin kamun hkam la ai hpang, Satan a gunglau ai hpe awng dang kau ai lam, anhte mung agung alau hkrum ai lapran Madu Yesu zawn Karai Mungga hpe dum hprang let Satan hpe dang manga kau ra ai lam, Karai Kasang hta kahkyin gumdin lam tam sa wa ra ai lam, tsun shadum da ai.

"Anhte gaw Karai Kasang hta kamhpa myit tawn da nna, Shi a Mungga hpe chye chyang ai a marang e, agung alau hpe shani shagu tawt lai lu na ga ai; Madu Yesu kashin kamun hkam ai shaloi, Chyoi Pra ai Wenyi gaw hkrudu a nsam hte sa du ai zawn anhte ni Madu Yesu hpe hkap la nna shada kahkyin gumdin ai rai yang Chyoi Pra ai Wenyi gaw anhte hte rau tutnawng anga nga na ra ai," nga nna mung tsun shadum da ai.

Satan gaw Madu Yesu mali shi ya mali shi na tup lusha gam ai majaw, n-gun n rawng ai ten, sa gung lau ai raitim, Madu Yesu gaw Chyum Mungga ga hte dai Satan hpe awng dang kau ai.

Anhte gaw mungkan hte seng ai hpe ra marin ai, myit kap ai shinggyim myu ni rai ga ai. Dai lam ni hte gunglau hkrum shagu Karai Mungga hpe dum hprang let awng dang kau lu ra ga ai.

Madu Yesu gaw Satan hte hkrum shaga bawngban jahkrup na lam hpa n nga ai; Satan hte mahku mahkau galaw na lam mung n nga ai, mahkri sawn htingram lam galaw na lam mung n nga ai. Karai Kasang a Munggga gaw masha tai wa sai, dai Mungga gaw Madu Yesu hkum nan rai nga ai, Karai Mungga rai nga ai Yesu a marang e Satan a agung alau shagu hpe mahtai jaw htang lu ai hte awng dang lu ai.

Madu Yesu a chyeju hpe hti sumru nga ga! Madu Yesu a chyeju hta kam hpa nga ga! Dai gaw anhte ni agung alau hkrum ten hta garum ya na ra ai; Nu Maria gaw Karai Mungga hpe hkap la nna, shagrit shanem ai myit hte gumrawng gumtawng ai lam hpe shagrit kau lu ai. Shi a kasi hpe hkam la let ndau Lusha Gam Ladaw hta wenyi n-gun hkam la nga ga, nga nna Wa Sarabyin Francis, hpang jahtum mungga hte ginchyum dat da ai.

By Fr. Patrick Gawmaw Hkawng Yae

#vaticannews

#rvakachinservic

https://www.vaticannews.va/en/pope/news/2023-02/pope-seek-unity-with-god-welcome-his-word-in-face-temptation.html