Tsawra matsan dum lama ai chyeju daw 3 (Indulgencence ) 27 August, 2019

saints image

 

Indulgencence ( Tsawra matsan dum lama ai chyeju )   daw 3

          Nu wa hpu nau ni, Indulgencence ngu ai, ( Mara raw dat hkrum ai hpang na, ari dan hka: hpe shaprai ya ai ahkaw ahkang, ngu ai hte seng nna,) lai sai lamang ni hta kau chyen na la lu saga ai rai nga ai. Rai yang matut nna, Indulgencence chyeju amyu myu nga ai lam mung, nawku hpung a labau hta hpaw tsun da ai hpe chye lu ai, Shingrai, ndai Indulgencence chyeju kumhpa hpe, mungkan mungdan ting hta, hkam la mai ai rai nga ai. Raitim, shara masat ai lam gaw, dai chyeju jaw ai a yaw shada lam hta hkan nna, shai ai lam gaw nga ai. Ga shadawn, lai wa sai 2011 ning hta, Yangon mare kaba na San Mary Nawku htingnu (100) ning hpring Jubali poi galaw lai wa saga ai. Daizawn lak lai ai poi kaba a majaw, Indulgencence ngu ai chyeju hpe hkam la lu nga ga ai. Dai chyeju hpe hkam la lu na matu, sinpraw sinna, dingdung dingda, shara shagu na sagu hpung masha ni yawng, yak hkak ai lapran hta, dai chyeju hpe sa du hkam la nga ga ai re. Jinghka nna, tsun ga nga jang gaw, Nawku htingnu ni law law nga ai hta na, dai shani na, (100) ninhpring ai, ngu ai lak lai ai chyeju a majaw, dai nawku jawng hta sa du let, akyu ara hkam la ai gaw, lak lai ai Indulgencence chyeju hpe hkam la lu na rai nga ai. Bai nna, Sumtsaw sumtsan mungdan ni hkan na, buhkawm masha ni, mai gan masha ni, dai shani hta, nmyit mada ai, dai nawku jawng Jubali poi de sa du hkrup nna, akyu ara sa hpyi la ai a marang e, dai buhkawm masha ni yawng mung, ndai Indulgencence chyeju hpe hkam la mai nga ai. Dai majaw, gara mungdan, gara shara kaw mi rai rai, lak lai ai poi masat da ai shara ni hta, ndai chyeju kumhpa hpe hkam la lu ai, nga nna, nawku hpung a labau hta hpaw tsun da ai hpe mu lu nga mali ai nu wa ni.

          Ndai Indulgencence chyeju kumhpa hkam la ai shaloi, lahta de na la lu sai, lak lai ai nhtoi, Nawku Jawng Jubali masat nhtoi poi ni hkan hkam la lu ai zawn, Udang masat dazik gali ai, kam sham ai, Rosary hti kyu hpyi ai, Karai kasang lak san chyeju jaw ai San Pra ai ni a dazik sumla ni hpe manu shadan, hkungga la ra, kyu hpyi ai a marang e mung, ndai chyeju kumhpa hpe hkam la lu nga mali ai re. Ndai Indulgencence chyeju hta mung, hpring tsup ai chyeju hte nau nhpring tsup ai chyeju nga nna, mung ginhka da ai hpe chye lu ai. Hpring tsup ai chyeju ngu ai hta, mara hpe raw dat ya ai sha n ga, mara dan hpe mung raw dat kau ya hkrum ai chyeju rai nga ai.

Nhpring tsup ai chyeju ngu ai gaw, nga-rai mung kaji kaw nga ai wenyi ni hpe tsun mayu ai rai nga ai. Shanhte a mara dan hpe karai kasang raw dat hkyem sa jaw ya na matu, sak hkrung nga ai anhte yawng gaw, Indulgencence ngu ai chyeju hpe hkam la let, dai nga-rai mung kaji kaw nga ai wenyi ni a matu, akyu ara hpyi ya ra nga ga ai. Dai majaw, Indulgencence chyeju gaw, hkrung nga ai ni a matu sha n ga, si mat wa sai wenyi ni yawng a matu mung akyu jaw ai kumhpa kaba rai nga ai hpe myit dum ra nga mali ai nu wa ni. Shai ai lam hta mung, sak hkrung nga ai ni a matu, Indulgencence chyeju hpe nawku hpung kawn ahkaw ahkang lu ai wa sarabyin shing nrai, wa saradaw ni jaw ya lu ai zawn, si mat wa sai wenyi ni a matu gaw, karai kasang hte seng ai lam labau hta hpaw tsun da ma ai. Dai majaw, n nga mat wa sai wenyi ni a matu, lak san yaw shada let, shanhte a mara dan hpe karai kasang raw dat hkyem sa jaw ya na matu, lak lai ai poi nhtoi shani ni hta, akyu ara, hpyi nem tawng ban ai lam ni galaw ra nga mali ai. Reng jang she karai kasang a tsawra matsan dum ai hpe hkam la lu nna, lawt lu ai chyeju ni hkam la lu na rai nga ai. Shingrai, Chyoi Pra ai Catholic Nawku hpung kawn nna, shaning shagu, November shata Praw (2) ya shani hpe n nga mat wa sai wenyi ni yawng a matu ngu nna, lak san nhtoi masat let, akyu hpyi ya nga ga ai re.

          Nu wa hpu nau ni, hpring tsup ai Indulgencence chyeju kumhpa hpe hkam la na matu, No. 1 mara raw hkyem sa hpyi ra ai. No. 2 Manu daw dan nlu ai Chyoi Pra ai Missa hkungga hta shang lawm kyu hpyi, chyoi pra hkum hpe hkam la ai lam ni galaw ra ai. 0Daizawn galaw ai shaloi, tinang a yaw shada lam mung nga ra ai. Ga shadawn, lahta de na la lu sai, n nga mat sai wenyi a matu ngu nna, yaw shada ai lam nga ra ai. Dai yaw shada ai lam a matu, kaja ai magam bungli ni hpe grau grau nna shakut galaw ai, shawoi na hta grau nna akyu hpyi shaja ai hte nawku jawng ni hta sa du nna, simsa ai hte myit sumru akyu hpyi ai lam ni galaw ra ai. Ndai zawn galaw ai a marang e, mara dan raw dat hkyem sa lu na matu, ra nga ai wenyi ni a matu, raw dat hkyem sa lu na ahkaw hkang langai mi rai nga ai lam nawku hpung a labau hta hpaw tsun da nga mali ai re. Shingrai tsawra hkungga ai nu wa hpu nau ni, Lahta de na la lu sai Indulgencence ngu ai, , ( Mara raw dat hkrum ai hpang na, ari dan hka: hpe shaprai ya ai ahkaw ahkang, ngu ai hte seng nna,) na la lu sai hte rau, ndai chyeju kumhpa hpe hkam la lu hkra shakut ga. Nawku hpung kawn masat ai, lak lai ai poi nhtoi shani hte, chyeju kumhpa hku nna, masat ya ai Jubali poi ni hpe majoi n shalai kau ai sha, sa du hkam la nga ga, ngu n gun jaw let, daini na lamang hpe ndai kaw naw jahkring sai rai.

          Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

Add new comment

1 + 10 =