Tours Mare na San Pra ai Martin a Poi Nhtoi (November 11) 11 November 2023

Tours Mare na San Pra ai Martin a Poi Nhtoi (November 11)

San Pra ai Martin gaw, lai wa sai A.D 316 ning hta, Hungary Mungdan, Pannonia ngu ai Mare hta shangai chyinghkai wa ai rai nga ai. Shi a chyinghkai Kanu yan Kawa gaw, tara maigan masha yan rai nga ai. San Pra ai Martin hpe “Hpyenla ni laksan kam hpa ai San Pra ai Masha” ngu nna masat da nga ai. Kawa gaw, Roma hpyen du langai mi rai nga ai majaw, shi mung, hpyen la langai tai wa sai.

San Pra ai Martin, Shi a asak (23) ning hta, lani mi shi gaw, Amiens mare kaw, dap dung chyinghka sin lit ang wu ai. Dai shara kaw, si wa na zawn nga hkra kashung ai prang kaw sin-gu krin re ai mawhpyi langai mi hpe shi mu ai. Shaloi jang shi a palawng hpe daw mi rep di la nna mawhpyi wa hpe jaw kau wu ai. Dai shana e, Martin gaw shi daw chyen rep ya kau ai palawng hpe Madu Yesu bu hpun tawn ai Yup mang hpe mu ai. Dai hpe myit sumru let akyu hpyi ngut ai hpang, shi gaw Karai Kasang a magam gun tai mat na matu myit dawdan kau wu ai.

Dai aten hta n hkru ai masha shazai ni, shanhte a hpyen hpung hpe sa htim gasat maw ma ai. Martin gaw, Jau tai na dawdan ai hpe hkawhkam Julian gaw; “Martin gaw htim sa wa nga ai tai hpyen ni hpe hkrit ai majaw dai zawn Jau tai maw ai re.” nga nna grai shut ai hku nna sawn la kau wu ai. Shaloi Martin gaw, “Madu Yesu Hkristu a mying ning sang a marang e, ngai gaw hpa lak nak mung n lawm ai sha, tai hpyen ni a majan man de htim sa na matu jin jin, gwi gwi rai nga n ngai. Dai sha n-ga manang mung n lawm ra ai; ngai hkrai sha tai hpyen ni hpe sa gasat wam ai.” ngu nna bai htan dat wu ai.

Dai hpang shani e nan, tai hpyen ni gaw mau na zawn rai nna laknak jahkrat asum jaw sana nga nna shiga jaw ma ai. Ndai mabyin a majaw Martin gaw hpyen dap kaw na pru na ahkang hte Kashin Kamun Sakramentu hpe hkam la lu na ahkaw ahkang lu la mat nu ai.

San Pra ai Martin gaw, shi a nta kaw na Kanu yan Kawa hte nta masha ni hpe wenyi makam masham hte seng ai lam ni hpe hkaw tsun kau da n htawm, Fransik mungdan na, Liguge mare hta, Tawra Jau sa tai nna nga mat wu ai. Shi a asak, (71) ning hta Tours Mare kaw na Saradaw tai wa sai. Shi a Saguhpung masha ni hpe sagurem kaja a sat lawat hte up hkang ai, Jau tai jawng ni law law hpe mung gaw gap da ya sai. Shi a Jau ni hpe mung, lam woi kaja tai let shading sharai shadum shahprang ya lai wa sai. Makau mayang nam kahtawng hkan na, masha ni hpe mung, tara mungga sharin ya ai lam hta grai shakut lai wa sai rai nga ai.

San Pra ai Martin gaw, nat hkrungri ni, nat hte seng ai hpun kawa ni hpe shatsai kau ai lam hta grai mying kaba ai. Shi nsa garai nhti ai aten du hkra, shi a lata hpe lamu de sharawt tawn ai. Shi a hkamja la a majaw, maga mi de sha grau galeng manu ai zawn nga hkam sha lai wa nu ai.

Shi gaw, “Ngai hpe, ga ntsa de mada yu na malai, sumsing mungdan de mada yu na ahkang she jaw rit law” nga nna shi akyu hpyi nga yang, matse labye ni a nsam hte nat satan ni gaw shi a makau kaw sa tsap dan dan rai wu ai. Shaloi Martin gaw, dai nat satan matse labye ni hpe, “Masha a sai shan hpe chyu gyam nga ai matse labye nang e, ngai hpe hkum gyam,” nga nna bai tsun dat wu ai. Ndai ga ni hpe tsun ngut ai hte, San Pra ai Martin gaw, A.D 397 ning, November (8) ya shani hta,  Madu kaw yup pyaw ban sa mat wa sai rai nga ai.

Shi n nga mat ai hpang, Nawku hpung kaw nna, Shi hpe San Pra ai Masha dang da let, Shi a Poi Nhtoi hpe mung, November shata (11) ya shani ngu masat shagrau dat ya sai rai nga ai.

Daini Nawku Hpung gaw, Tours Mare na, San Pra ai Martin a Poi Nhtoi hpe galaw nga ga ai ten, anhte a Prat hta mung, Karai Kasang Wa a shaga la ai nsen hpe na ai hte shi hpang de gayin wa lu na matu, shi shangun ai magam hpe galaw lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)