San Pra Ai Wa Sarabyin John Paul II a Labau Lam Daw 2. 04 Sep 2018.

 

          Hkungga tsawra ai shiga madat Nu Wa hpu nau ni,  nau nna shi ai ten hta sha san pra ai masha ngu tang da sai Wa Sarabyin John Paul II a lam hte seng nna, makam masham machye machyang rai u ga, matut gam garan ya mayu n ngai.

          Nu wa hpu nau ni, Wa sarabyin Yawhan Pawlu lahkawng gaw, sak hkrung hkawm sa nga ai ten, shinggyim ahkaw ahkang hpe teng man ai tara lam hku nna, hkawm sa ai hpe grai nan ra sharawng ai wa mung rai nga ai. Dai majaw, shi a prat hkrun lam hta, masha lu gring ai ahkaw ahkang lam hte seng nna, mungkan masha ni hkam sha nga ma ai lam ni hpe madi shadaw, tsun garum ya sai rai nga ai. Ga baw law law hte seng nna, tsun shaga na ahkaw ahkang nil u nga ai hte maren, hkaw tsun lai wa sai. Bai, mungkan up hkang masa galai shai ra ai lam ni hkaw tsun na lam hta mung, Madu karai kasang jaw ya ai ngu ai, arawng aya lu ai wa langai mi hku nna, gwi ai myit masin hte,  hkaw tsun lai wa ai magrau grang ai Hkristu a hpyen ma langai mi hku nna sak hkrung hkawm sa wa sai rai nga ai. Shi a daidaw buga rai nga ai, Communit ni up hkang nga ai Poland mungdan hpe communit masa jahkrat kau ya lu ai lam hta arawng sadang lu ai wa mung rai nga ai.

          Ya na zawn tsun shaga na ahkaw ahkang lu ai raitim, masha n kau n chye na ai, myit masa n tsawm ai ni a majaw, tsun shaga ai lam shagu hta, dingbai dingna byin shangun ai lam ni mung hkrum lai wa sai lam labau hta ka matsing da ai hpe chye lu ai. Kalang lang Wa Sarabyin hte myit hkrum lam n nga ai ni a ntsa e laja lana mung byin chye ai, ahkyak ahkya re ai mabyin lam ni hte seng nna bawng ban yak ai ten ni mung nga nga ai. Ga shadawn, kun dinghku de nna nga ai ni yawng, kashu kasha shayawm la na ngu ai, n htap htuk ai, makam masham hte nhtan shai ai lam ni hpe ninghkap ai ten ni hta, ndai tara hpe nra sharawng ai ni gaw,Wa Sarabyin hpe mara shagun, nju ndawng ai lam ni byin pru wa ma ai. Ya na zawn ninghkap ai ni nga ai raitim, Wa sarabyin gaw, n dai lam ni hte seng nna, teng man ai Catholic Nawku hpung a makam masham langai hku nna, ja ja rai tsap nga ya sai rai nga ai. Dai majaw, ya daini du hkra Nawku hpung kawn nna, kashu kasha shayawm la ai, ngu ai tara n nga ga ai Nu wa ni. Kashu kasha ngu ai gaw, Karai Kasang jaw ai chyeju sut gan re nga nna, Wa sarabyin shi hkum nan hpaw tsun lai wa sai rai nga ai. Teng man ai lam hta, gwi ai myit masin gaw, nhpaw nya rai nga ai. shi a sasana magam lam shagu hta, Chyoi Pra hkum hpe manang shatai let, Madu Yesu hte rau sha sak hkrung hkawm sa ai lam labau hta matsing da nga ai re. Mungdan shagu ngu na ram hta hkawm sa let, sagu hpung masha ni hpe gawan gatsan ai, wenyi n gun jaw let, tsawra myit hpe garan ya nga ai wa mung rai nga ai. Rau ai ten shagu hta, Chyoi Pra hkum sin kyu hpyi ai, Nu Maria kaw kamhpa manoi ai, shi hte nyi htep ai ni yawng hpe hkrum shaga n gun jaw ai magam ni hpe galaw shakut mat wa sai rai nga ai. Ndai zawn Madu a magam hta shakut gumhpai nga ding yang, aten shaning ni na wa magang nga sai hte rau, hkam ja lam gaw tsawm ra yawm mat wa sai rai nga ai. Hkamja lam a majaw, n jin n ngut ai raitim, masha hpawng a man e, angwi sha lagaw lahkam lahkam htawt nna, yawng hpe sa du jahkrum lu hkra shakut lai wa sai re. Hpang jahtum Shi hkrai sha nlu tsap, n lu hkawm, gari gawa  rai wa ai ten du hkra, Madu a magam hta shakut gun hpai mat wa sai rai nga ai. Daizawn shakut nga ding yang, Madu a shaning, 2001 ning hta, Wa sarabyin hpe gawn lajang nga ai sarawun kaba langai mi tsun ai hta, Wa Sarabyin gaw, Parkinson’s disease ngu ai, bawnu ashuk ashak, nru nra, ashun ashan byin mat ai majaw, gari gawa byin  ai re lam tsun dan sai. Raitim, Vatican kaw nna, tara shang ai hku, shi a hkamja lam hte seng nna, tsun shabra ai lam, kalang mi pyi n nga ai.

          Hkamja lam hta yawm wa ai majaw, sasana gawan ai lam hta n mai byin mat ai raitim, yup ra ntsa kaw nga let, mungkan ting na shi a sagu hpung masha ni yawng hpe Rosary hti kyu hpyi ya nga ding yang rai nga ai. Daizawn shakut nga ding yang, Madu a shaning 2005 ning April shata praw 2 ya shani, Vatican kaw Madu hta yup pyaw mat wa sai. Wa Sarabyin Yawhan Pawlu II gaw, shi a sak prat (84) ning du hkra Madu a magam hta shakut mat wa sai rai nga ai. Wa sarabyin n nga mat sai lam na lu ai mungkan mungdan shagu na Saguhpung masha ni yawng, yawn myi prwi hte myit dum nga ma ai lam labau hta mu mada lu nga mali ai re. Wa sarabyin n nga mat sai lam na lu nna, Shi a makoi mayang lamang hpe lawm lu hkra shakut ai mungkan mungdan shara shagu hkan na Saguhpung masha ni gaw, San Peter Pa kaba shawng kaw, shara la, tsawra hkungga ai nawku hpung a ningbaw ningla Wa sarabyin Yawhan Pawlu II hpe, shakram dat mayu ai majaw,  kyu hpyi ya let, lup na shani du hkra, nga nga ma ai. Hpang jahtum hku nna, Wa sarabyin hpe sa shakram ai ni yawng rai jang, wan 3 jan daram sa du ai lam labau shang ka matsing da ai hpe mu lu nga ga ai.

          Nu wa hpu nau ni, Wa sarabyin Yawhan Pawlu II n nga mat ai hpang 2013 ning July shata praw 5 ya shani Roma mungdan Vatican kaw nna, San Pra ai masha shatai na re ai shiga hpe shana shabra ya sai rai nga ai. San Pra ai masha shatai ya na nhtoi hpe gaw, dai shani kaw nna, shata (16) hta galaw saw a na re lam hpe shana shabra dat sai. Ya na zawn San Pra ai masha shatai ai ngu ai hta, n tsa lam hpe yu nna shabyin shatai ai nrai nga ai. Nawku hpung kawn nna, masat da ai, San Pra ai masha byin tai lu ai lamik kumla ni hpe dan dawng ai hku nna, mu mada, hkam sha lu ai hpe sak se hte hkrak, mu lu chye lu ai hpe madi madun lu jang she, San Pra ai masha shatai ai rai nga ai. Dai majaw, Wa sarabyin Yawhan Pawlu II hpe hpa baw na majaw San Pra ai masha shatai ai rai kun? myit lawm hpa, makam masham labau lam hpe du na lamang hta bai gam garan ya na n’ngai law.

 

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

         

 

Add new comment

3 + 10 =

Please wait while the page is loading