San Pra Ai Mother Teresa A Labau Lam Daw 3. 21 August 2018.

        Hkungga tsawra ai nu wa hpu nau ni, daini na Nawku hpung labau lam shana ya ai ten hta mung Mohter Teresa a labau lam hta na matsing sum hting da mai ai lam ni hpe bai hkap madat la lu na ga ai.

        Nu wa hpu nau  ni, Mohter Teresa gaw, shi a Mama hpung, gaw de hpang ai 1946- 1978 ning laman, Mama ni marai (935), Bro ni Marai 185), hte gawn lajang ap nawng ai masha ni marai (335) hte rau tsawra matsan dum ai magam hpe jawm galaw mat wa ma ai, shanhte a magam awng dang ai mahtai hpe maram yu yang, Sen lam hti ai machyi masha ni, Mang gang ana kap ai ni, AIDS ana zinli hkrum hkam sha ai ni, Gabai da hkrum ai Ma kaja ni, yu lakawn na n’nga ai Gum gai dingla ni, machyi makaw ru yak jam jau hkrum ai masha ni, kawsi hpang gara hkrum ai ni law law hpe tsawra myit kaba hte yu lajang lu mat wa masai, Mohter Teresa hkum nan kade daram shakut ai nga yang shi hpaw da ai jawng shagu hkan, matsan mayan ni hpe yu lakawn ai dabang hkan malu masha nlu sha ai ni hpe gawn lajang ai dabang ni de galoi mung sa du kawan n’gun jaw chye ai hpe mu lu ai. Mohter Teresa gaw lani hte lani dai zawn shakut nga ai ten hta hkamja lam sawng wa ai hte 1997 ning hpang daw de gaw, salum ana graugrau sawng jat wa nna, shi a hkang kalai na Ningbaw hpe 1997 March shata (13) ya shani Mama Nirmala ngu ai hpe lata tang da nu ai, dai zawn shi a hkang kalai na Mama lu da ai shata (6) a hpang 1997 september shata 6 ya shani madu yesu hta angwi apyaw yup pyaw ban sa mat wa sai rai nga ai. Mohter Teresa a makoi mayang poi gaw Jaw prat (20) a laman Hkyik hkam dik, mying dan hkung dik, labau shang makoi mayang poi kaba langai hku nna mungkan  hta mu lu mat wa sai, ndai gaw mungkan masha yawng a tsawra myit hpe hkap la lu mat wa ai a, sak se rai nga ai.

        Mohter Teresa a makoi mayang poi hpe India mungdan, asuya makoi mayang poi hku nna galaw ya lai wa ma ai, kaja wa nga yang India mungdan ngu ai gaw, Hindu makam masham mungdan re, Hkristan hpung masha ni gaw tsa hta shadang 2% sha nga ai re da. ndai zawn Hindu mungdan hta Cahtawlik hpung masha magam gun Mohter Teresa hpe mungdan asuya makoi mayang poi galaw ya ai lam gaw lak lai dik ai a’hkaw a’hkang labau nan rai sai. India mungdan hta ndai zawn makoi mayang poi hpe hkamla lu ai gaw Mungdan Gumsan magam hte hking mang daju ni chyu sha rai nga ai. Bai ndai makoi mayang poi de Hindu, Budda hte kaga makam masham hpung shagu na Dat kasa ni, India mungdan Gumsan magam, Italy mungdan Gumsan magam, philippens mungdan na Gumsan magam Corazan Aquino, Spain mungdan hkaw hkam jan, Jodan mungdan Hkaw hkam jan hte America mungdan Gumsan magam Bill Clinton a n’rum n’tau jan Hilary Clinton ni sa du yawn shawai lawm mat wa masai re. Mohter Teresa a makoi mayang poi lamang hpe Calacata mare na Netaji ginsup  ginra kaw galaw nna, shi a moi mang hpe gaw shi a Mama hpung ginjaw jawng wang kaw makoi mayang da ai, ya daini du hkra ndai Mohter Teresa a moi mang makoi mayang da ai lupding lupwa de mungkan masha ni law law sa du akyu hpyi ma ai lam chye lu nga ai. Mohter Teresa hpaw lajang da ai jawng shagu na matsan shayen, jahkrai ma ni yawng a n’gup hta “ tsawra myit dam lada ai nu, Madu karai kasang hpang de wa mat sai majaw, anhte yawng jahkrai hta jahkrai rai mat sai “ nga nna, yawn myit pru hte n’ja n’hpra shakram dat ma ai lam chye lu ai. Mohter Teresa gaw, matsan jahkrai ma ni a matu, kanu hta kanu tai ya lai wa sai rai nga ai. shinggyim myit hte gade mi n’ja tim, shakram da ra sai rai nga ai.

         Nu Wa ni, Mohter Teresa gaw, moi kaji ai ten kaw nna, tsawra matsan dum myit hte hpring ai san seng myit masin rawng ai shayi sha rai nga ai. U-Raw-Pa mungdan kaw nna, namuk dara hka pang lai, bum lang hkaraw n’hkap lai di kau da nna, myu, ru sai, ga n’bung ai India mungdan matsan ai ni law malawng nga ai Ka-la-ka-ta ngu ai shara de yu yak jam jau a myu myu hkam nna, karai kasang a kashu kasha ni hpe makawp maga , pawn ba la sai lam hpe yu yu ai shaloi mau hpa chyeju a’tsam rai nga ai.Gade mi yak hkak jam jau hkrum ai raitim, myit htum ai lam n’nga ai sha Madu Yesu shingbyi nga ai Chyoi Pra ai hkum hta n’gun la let, matsan mayen, nga shara shingbyi na n’nga ai jahkrai ma ni a matu a’tsam dat shakut lai wa sai rai nga ai. Shi a matsun maroi hta:  Nu Wa hpu nau ni, “Chyoi pra hkum hta nga ai madu yesu hta maju jung mu, Chyoi pra hkum hta  nga ai madu yesu hpe mu hkra tam u, shaloi na a myit masin salum hta madu yesu teng sha shanu nga na re nga ai ga hpe, n’nga mat sai San Pra  ai Mohter Teresa tsun lai wa ai re.” Bai Chyoipra ai hkum hta asak hkrung nga ai madu yesu n’lawm yang anhte asak N’hkrung lu ai zawn, Jau ni n’nga yang madu yesu hpe lu la na nre nga ai mungga mung Mohter Tersea tsun shadum lai wa sai rai nga ai.       

        Shingrai, shi a mai kaja ai magam bungli ni a marang e, Karai Wa gaw shi hpe mau hpa chyeju jaw ya sai rai nga ai. Dai gaw, ya nnga mat wa sai San Pra ai Wa Sarabyin Yawhan Paulu (II) shi hkum nan, lai wa sai 2003 ning, October (19) ya shani, Vatican, San Peter Nawku Htingnu hta Alu ai masha masat shagrau dat ai lam rai nga ai. Dai shani kaw nna, shi a poi nhtoi hpe shaning shagu September shata praw (5) ya shani galaw nga sai re. Bai nna, kabu hpa lam langai mi gaw, 2016 ning, September Shata Praw (4) ya, Laban Shani hta, Mohter Teresa hpe, Wa Sarabyin Francis kaw nna, Roma mare na, San Peter Nawku Htingnu Kaba hta e, San Pra ai Masha dang dat sai rai nga ai.

        Nu wa hpu nau ni, San Pra  ai Mohter Teresa a lam hpe na la lu sai hte rau, anhte a sak hkrung hkun lam hta Madu karai kasang a myi man hpe tau let, matsan shayen, ru yak jam jau, shingbyi machyu shara n’nga ai ni hpe mai byin ai made mi garum shingtau la nga ga. Anhte yawng gaw Hkristu hta langai sha re majaw, lani mi na ten hta, karai kasang hpang de wa shingbyi na ni hkrai rai nga ga ai. Anhte a kanu San Pra ai Mohter Teresa a katsi kaja hpe la let, mai kaja ai magam bungli ni hpe galaw nga ga ngu, n gun jaw let lamang hpe ndai kaw jahkring sai rai.

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

 

Add new comment

5 + 4 =

Please wait while the page is loading

San Pra Ai Mother Teresa A Labau Lam Daw 3. 21 August 2018. | Radio Veritas Asia

Error

The website encountered an unexpected error. Please try again later.