San Pra Ai Margaret A Lam ( 10 December, 2019 )

saints image

San Pra Ai Margaret A Lam

          Nuwa hpu nau ni, Madu Karai Kasang gaw nyan, hpaji hte sut gan shaman chyeju ni hpe, shi ra ai hte maren shinggyim masha shagu hpe karan jaw nga ai re. Shingrai, Karai Kasang kaw na kumhpaw kumhpa law law hkam la lu ai ni gaw, dai Madu hpe chyeju grai htang ra na teng sha re. Chyeju kumhpa law wa hkam la ai wa kaw na law wa hpyi na ra ai, law wa ap ya shajang ai wa kaw na mung, grau nna bai hpyi na mara ai, nga nna, Ja Chyum Mungga ( Luka 12: 48 ) hta tsun da ai hte maren, hpaji rawng ai ni, aja gumhpraw sut gan lu ai ni, shabrai sha ai ni nlang hte gaw, matsan mayan re ai yu maya masha ni hta grau nna shakut ra ma ai. Shing re ai masha kaba ni hpe kaja ai kasi kamang madun dan na matu hte shanhte hpe tara lam ni hta n gun jaw woi awn na matu, Madu Karai Kasang gaw, lu su nga mai ai masha ni kaw na, san pra ai masha hpe ya sha ya sha paw pru shangun ai hpe na lu nga ga ai re. Shingrai, ndai Chyoi Pra ai sahti kasha ni hta na, San Margaret  ngu ai num sha gaw langai mi rai nga mali ai nu wa ni.

San Pra ai Margaret gaw, Hungary Mung kaw Madu a shaning (1046) ning hta shangai dai daw wa sai lam chye lu ai. Margaret gaw, (1070) ning hta, Skotland mung na, Malcom III ngu ai Hkawhkam wa hte, ding hku de nu ai. Shi hte shi a madu wa gaw, ding hpring Chyoi Pra ma ai hte Karai Kasang a chyeju a majaw kashu kasha (8) lu la masai. Shannu wa ni gaw lu su nga-mu nga-mai ai hte ngwi pyaw nga ma ai. Raitimung, kalang lang tsaw ra ai kasha ni a majaw, kanu yen kawa grai myit ru myit yak hkrum nga ma ai. Hpa majaw nga jang, sut gan law law lu ai ni a kasha ni re majaw, Ja gumhpraw hpe n taw ntsang kam ai hku jai lang lu ai sha n ga, shawa masha ni a  hkungga lara shagrau sha-a ai hpe hkam la lu ai majaw, gumrawng gumtawng ai myit rawng wa nhtawm me, shanhte a arawn alai kyang lailen ni hten mat wa na, hkrit shara kaba byin pru wa na lam ni hpe shan chye da manu ai. Shing rai, shan a kasha ni gaw, ndai prat hta sha ngwi pyaw nhtawm me, hpang na prat tup hta, jam jau hkrum na hpe San Pra ai Margaret myit tsang nga nu ai. Dai majaw Maragaret gaw, Madu a Ja Chyum Mungga, Ga shagawp laika (22:6) hta  matsun da ai “ Ma kaji ni hpe shi hkan mai ai lam hta sharin u, shingrai yang dinggai dingla wa ai shaloi, lam n yit na ra ai” ngu ai Karai Kasang nan Tsun dan ai ga hpe myit dum nga let, shi hkum nan kasha ni hpe atsawm yu lajang sharin shaga, shadum jahprang nga sai rai nga ai.

 

 

San Pra ai Margaret gaw, shi a kasha ni ga chye shaga hpang wa ai hte rau, Wudang sumla galaw dan ai hte, ma kaji ni mai tsun ai akyu hpyi  ga ni hpe sharin ya nna, jahpawt hte shana shagu akyu woi hpyi nga nu ai. Bai, Laban jahpawt shagu, Margaret shi hkum nan, kasha ni yawng hpe kashin lajang ya nna, bu hpun sumraw ya n htawm me, Nawku Jawng de woi sa, Missa Hkungga Nawng Jau akyu hpyi ai lam hpe nhprai hkra woi sa nna, Madu Karai Kasang hpe nawku shakawn chye na lam ni hpe sharin ya sai rai nga ai. Nawku Jawng kaw, shi a ma ni hpe shinggan de n ginsup shangun ai sha, shi a makau kaw tawn da nna, Yesu Madu hte shi anhte hpe hkye hkrang la ai lam ni, tsawra shawang myit hte tsun dan nga nu ai. San Pra ai Margaret gaw, shi a kasha ni hta gumrawng gumtawng ai myit, mungkan pyaw daw gadaw ai hpe ra marit ai myit hte shut hpyit mara galaw mayu ai myit mahkra nrawng u ga, lam shagu hta  kaja ai kasi ning li hpe madun dan nga ai hte, Karai Kasang hpang shi akroi anoi akyu hpyi shaja nga sai lam labau hta matsing da nga mali ai nu wa ni. Bai nna, San Pra ai Margaret gaw, shi a kasha ni hpe gade ram tsang ai i nga jang, woi shut chye ai manang ni hte n kanawn mazum na matu shanhte hpe shana e mare hkan ginsup hkawm, len hkawm na ahkang galoi mung njaw ai da. Dai majaw, yawng gaw, San Pra ai Margaret hpe nyan marai hpaji hte tsawra ai myit rawng ai Hkawhkam jan ngu amying shing teng jaw ai lam chye lu ai.

Nu wa ni, San Pra ai Margaret a woi awn zinlum chye ai hte tsawra myit dam lada ai, san seng ai myit masin hte Madu Karai Kasang kaw akyu hpyi ai lam ni a majaw, shannu wa ni yawng, tsawra hkungga sumnung shingdi ai, myit langai sha hte grai ngwi pyaw ai dinghku dum nta masha ni rai nga ai. Shi a kasha ni yawng mung, Kanu a sharin achyin ai n pu hta myit su myit kawp ai kasha ni byin tai wa sai. San Pra ai Margaret gaw, shi a kun dinghku hpe Madu Karai Kasang kaw ap da let, san seng ai myit masin hte shakut shaja lai wa sai sha n ga, kasha ni yawng hpe mung, teng man ding hpring ai lam de woi awn hkawm sa lu ai jan mung rai nga ai. Ya na zawn ngwi pyaw ai dinghku prat hta hkawm sa let, Madu a shaning (1093) ning hta Edinburah kaw Madu hta yup pyaw ban sa mat wa sai rai nga ai. Nu wa ni, San Pra ai Margaret a kasi hpe la let, Madu Karai Kasang kaw kam hpa manoi manat chye ai ni byin tai hkra shakut ga. Grau nna, dinghku hta kanu tai nga ai ni, tinang a kashu kasha ni hpe nhkru nkaja ai de n du hkra, San Pra ai Margaret a kasi hpe la let, Ma ni hpe atsawm sha woi awn zinlum la nga ga. Ya daini na prat ten hta, kashu kasha ma ni, malawng maga, pyaw hpa hta len let prat hpe jasum kau ai ni law law rai nga ai. Dai majaw, anhte kanu shara hta nga nga ai ni yawng, tinang a kashu kasha ni hpe naw kaji nga ai ten kawn nna, makam masham nli jaw bang ya let, mai kaja ai de hkawn sa lu hkra shakut ya ga ngu, n gun jaw let, dai ni na lamang hpe ndai kaw naw jahkring sai rai.

San Pra ai Margaret a poi nhtoi gaw, November shata (16) ya shani rai nga ai.

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

 

Add new comment

2 + 2 =