San Pra Ai Columban A Labau Lam ( 19 Nov, 2019 )

San Pra Ai Columban

Nu wa hpu nau ni, daini San Columban a labau gadun hpe sumru yu ga ngu ai shaloi, Shi gaw hkyik hkam ai, Iris Sasana majen je se hkam langai mi rai nga ai. Madu a shaning (563) ning hta, Sinna Lin-sa-kar ngu ai shara kaw shangai wa ai rai nga ai. San Columban a labau hta mu hti lu ai gaw, shi asak naw ram nga ai aten, Ramma re hte maren, shi hpe num sha mahkawn ma ni law law, myit shang sha, ra sharawng ai hte gung lau ai hkrum nu ai. Dai lam hte seng nna, san seng san pra ai Se hkam hpaw mi langai, Columban hpe tsun ai gaw, num sha ma ni hpe nang aloi sha yen kau lu na shadu nni? N gun ja la ai Samsung gaw, Gar-lai-lar ngu ai jan a lata hta, n gun kya mat hkra galaw kau hkrum ai hpe n dum nni? Bar-she-ba mung shi a tsawm htap ai shingni hpe jai lang nna, dingman dinghpring san seng ai David hpe lam she shang mat hkra gung lau kau ai hpe n dum nni? Bai, hpaji rawng nna, myit kup la ai, shaw-la-mung pi gaw, num sha ni law law shi hpe tsawra masu nna, ahkyawp sha, hkalem sha ai hkrum sai rai nga ai. Dai majaw, hprawg su, masha law law hkrat bang sai dai hka nu kaw nna, lawt hkra hprawng su, ngu dat nu ai. Dai shani kaw nna Columban gaw, shi a dum nta hpe kau da nna, se hkam prat hte Karai Kasang a matu ap nawng magam gun na myit daw dan hkawm sa mat wa sai rai nga ai.

Bai nna Columban se hkam prat hte Karai Kasang hpe daw jau na matu shakut ai lam mung, lak lai ai hpe mu lu nga mali ai. Dai lam gaw hpa ta nga jang, shi a chying hkai kanu myit nhkrum ai kumla wa, se hkam jawng de nsa lu hkra ngu yaw shada nna, chying hka lam e kaleng pat shingdang da ai lam re. Raitim, Columban gaw kanu hpe shing kawt kau da nna, se hkam jawng de sa mat wa nu ai. Columban gaw lam galu hkawm sa let, Karai Kasang a kabu gara shiga hpe, hkaw tsun na magam hpe grau nna ra sharawng ai hpe mu lu nga ai. Karai Kasang gaw Abraham hpe shaga ai nsen, na a mungdan buga hte nwa nta kaw nna pru nna, ngai nang hpe madun na lamu ga de rawt sa wa su, ngu ai hpe shi a na hta, nsim nsa shingran hta na lu ai lam gaw, n gun lu na lam rai wa nu ai. Dai majaw shi a asak (30) ning hta, manang se hkam (12) hpe, Greek, Britain hpe lai di kau da nna, Francis hte Belgyium mung dan de sa du masai. Dai Mungdan ni hta Kahtawlik makam masham hpe hkap la ai ni hpe mu lu ma ai. Rai tim, Hkristian sari sadang hte Nawku hpung a makam masham hkan sa tara hte hkrak nhkawm sa ai, dai hkan sa tara hpe ahkyak madung, lale nga ai hpe mu lu masai. Dai lam masa ni byin ai a mahtai tam tu ai aten hta, majan byin hkrum ai aten re majaw, Saradaw ni hpung masha ni hpe saw, sawn di, tawn da ai lam a majaw re hpe mu lu wa ma ai.

Shingrai nna, Columban gaw, Mungdan ting hkawm sa nna, Madu a kabu gara shiga hkaw tsun let, shagrit shanem ai lam hte tsawra ai lam hpe kasi kaja hte madun sharin ya nu ai. Shi a manang se hkam ni mung shi hte rau hkan nang garum shingtau let, shanhte kaw na langai ngai, shut shai lam lama ma galaw hkrup jang mung, kaga ngam ai ni yawng, rau jawm shadum sharai la ai lam hpe tsawra myit majing hte galaw chye ma ai. Dai zawn byin ai aten hta, shanhte a n gup kaw nna, gasheng gareng gajet gaja nga ai ga ni ntsun yu ma ai. Rung rai ni hpe mung, rau sha jawm lang chye ma ai. Columban gaw shi a asak (45) ning aten hta, Francis, Newziland ni de sa du nna, se hkam Jawng law law hpaw nhtan da ai hte, Ja la ai hkan sa tara ni hpe jahkrat masat da ya sai rai nga ai. Grau nna num sha ni hte manam ni, dai Jawng kata de n shang lu ai. Se hkam ni mung shanhte galaw ai bungli hta hkan nna sha, lu sha mai nga ai. Aten malawng maga, asim sha nga ra ma ai. Dai lam ni gaw, Karai Kasang hte matut mahkai lu na, Karai Kasang a lam hpe sum ru yu lu na matu hte tinang a shinglet hta tawt lai ai mara ni hpe koi yen kau lu na matu rai nga ai. San Columban tsun yu ai ga langai hta, masha ngu ai gaw, shada jahta apak nga ai, kaga masha ni a lam shatan n hkan, daw dan kau ai lam ni a malai, kaga kaja ai lam ni hta, grau nna ra sharawng nga ai.

Dai majaw kaja ai hte n kaja ai hpe ging hka chye ai shinglet nlu ai wa gaw, zim rai  asim sha nga lu ai gaw grau kaja nga ai. Shing nrai, lama ma hpe tsun dat ai aten hta, ngwi pyaw sim sa ai hpe jaw ya lu ai ga rai ra ai, nga nna tsun lai wa sai ga ni, daini anhte a prat hta manu mana manu dan kyem da mai ai lam ni re. San Columban gaw, Madu a shaning (615) ning November Shata (21) ya shani shi a asak (72) ning hta Madu kaw yup pyaw ban sa mat wa sai rai nga ai. Shi a poi nhtoi hpe Nawku hpung kawn nna, November shata (23) ya shani ngu masat da ya sai rai nga ai. Nu wa ni, Anhte a Jinghpaw Mungdaw hpe makawp maga ya ai San Pra ai Columban ngu nna mung kam hpa nga ga ai re. Shingrai, ndai November shata (23) ya shani hta, lak lai ai chyeju ni hpyi la ga. Grau nna, anhte a Mungdaw Mungdan hta, majan a majaw jam jau hkrum nga ai nu wa hpu nau ni yawng a matu akyu hpyi ya nga ga.  Sagu hpung masha ni hpe woi awn nga ai, Wa Saradaw ni, Wa Jau ni hte hpung magam gun ni yawng a matu mung myit dum akyu hpyi ya na nmalap ga ngu, saw shaga mayu ga ai. Bai nna, anhte a Mungdan de Sasana magam wa shakut ya nga ai, Columban Jau, Mama ni yawng a matu, chyeju dum let akyu hpyi ya nga ga. Anhte hpe makam masham nli gat hkai ya let Madu hta yup pyaw mat wa sai chyeju madu Columban Jau,mama ni a wenyi ngwip yaw ai hta ban sa nga mu ga, akyu hpyi ya nga ga ngu, gam garan ya let, daini na lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.