San Pra Ai Bruno A Labau Lam ( 24 November, 2019 )

San Pra Ai Brono A Labau Lam

          Nu wa hpu nau ni, San Pra ai Bronu gaw, Madu a shaning (1030) ning hta, Germany Mungdan Cologne mare kaw shangai dai daw wa sai lam chye lu ai. Carthusian Order ngu ai Carthusian Jau  Tawra hpung magam gun hpung hpe de hpang da sai San Pra ai masha mung rai nga ai. Jau tai ai hpang Rheims mare na Saradaw a laika sharin jawng kaw, laika sharin ya ai sara lit hpe (18) ning tup gumhpai lai wa sai rai nga ai. Shingrai, San Pra ai Bruno sharin shapan dat ai Jawngma ni kaw na, hpaji chye kungzet nhtawm me, ning tawn ai ni law law re lam labau hta matsing da ai hpe mu lu ai. Bruno gaw, kaji ai ten kawn bawnu ngyan marai kung zet ai re majaw, manaw manang ni hte shingdaw dat ai shaloi, grau chye chyang kunghpan, machye machyang law ai hpe mu lu ma ai. Shingrai, Bruno shi chye ai hpaji a majaw, gumrawng myit n gung alau kaw nna, lawt lu na matu Seche Fontaine ngu ai, hkahpawk nga ai maling de tara sa shadik mat nu ai. Dai maling kaw, tara shadik nga ai Tawra Jau ni mung nga ai lam chye lu ai. Shingrai, dai Tawra Jau ni hte rau, tara shadik let nga nga sai. Ya na zawn Tara shadik nga ai ten, shut hpyit kau sai mara ni ma hkra raw dat hkyen sa lu na matu, mara dan hkam la let, dai mara dan a matu, akyu hpyi shaja ai hte, jamjau jamhkau ni hpe hkam sharang let, tara shaja nna, nga ma ai. San Pra ai Bruno gaw, ya na zawn tara shadik ai hpe sha myit ndik ai re majaw, dai hta grau tara ja ai, pru shang yak la ai, laja lana re ai Chartreuse  ngu shamying ai, nam maling de bai htawt nga mat sai.

          Dai nam maling kaw San Pra ai Bruno gaw, Carthusian Jau Tawra hpung magam gun, wuhpung hpe, de hpang da sai lam labau shang rai nga sai. Ya na zawn Tara shadik ai magam gun wuhpung hpe gaw de lu sai re majaw, ra ai lam ma hkra hpe langai hpang langai galaw shagrin hpang wa sai. San Pra ai Bruno gaw, shanhte Jau ni rau sha akyu jawm hpyi lu na matu,  nta langai mi shawng gaw gap hpang nu ai. Dai hpang, shanhte Tawra Jau ni a Tara hte seng ai rit kawp tara ni  hpe masing jahkrat shagrin la lu sai. Ya na zawn gaw gap da lu sai nta hta rau jawm hpawng, akyu jawm hpyi lu sai rai nga ai. Dai hpang, Bruno gaw, Shi a Jau ni marai hkum shagu, gawk langai hpra nga lu na matu, bai gaw gap la lu sai. Ndai San Pra ai Bruno woi awn gaw de hpang ai Jau wuhpung gaw, lak lai Tara shadik ai wuhpung re majaw, shanhte nga ai Jawng de Num sha ma ni tsep kawp nmai sa ai lam chye lu ai. Dai majaw amyu shayi sha ni ndai shara de tsep kawp nmai sa na matu mung galaw da ma ai. San Pra ai Bronu gaw, shi hkum nan mung, Tawra Jau langai a tara hte hkrak nga sa let, lam woi ning shawng tai nga sai. Lak lai tara shadik ai Jau re majaw, shi a woi awn ai magam bungli gaw grai awng dang nga sai. Nam maling kata, pru pru shang shang yak ai shara kaw tara shadik nna nga ai raitim, ndai San Pra ai Bruno de hpang da ai Tawra Jau wuhpung de shang nna, tara shadik ai ni mung law law rai nga ai.

          Karai Kasang a lak lai shaman chyeju nan re ngu yang , n shut na re. Hpa majaw nga jang, ya daini na ten, Tara shadik nna nga sa ai ni, mungkan hta grai yawm wa ai hpe mu lu ai. Mungkan a pyaw hpa lam hta sha madung hkawm sa ai ni law law rai nga ai. Shingrai, Nu wa hpu nau ni, San Pra ai Bruno a, Karai Kasang hpe gade ram tsawra ai, tara shadik ai, makam masham ngang ai ngu ai hpe kasi la nna, Kasang Kasang hte grau ni htep hkra shakut ga, ngu n gun jaw mayu n ngai. Bai nna, San Pra ai Bruno a kasi la mai ai lam langai mi mung she madat yu ga. Bruno gaw, galoi mung, mani sumsai re ai, myi man nsam hte nga chye ai wa mung rai nga ai. Ten shagu hta sumsai myi man hte sak hkrung nga ai re majaw, gadoi ten pawt sin dawng ai kun pi n chye ma ai da. Shinggyim masha re majaw, myit hta n chyi nmu, machyi makaw, myit ru tsam pu ai lam ni mung law law nga na re, Raitim, San Pra ai Bruno gaw, npyaw n ngawn ai lam galoi n tsun, sam n madun ai re majaw, shi a Jau manang ni grai mau ma ai lam labau hta matsing da ma ai lam chye lu ai. San Pra ai Bruno gawde ai Tawra Jau wuhpung de ramma shayi shadang sha law law, sa shang nna, Tara shadik ai Jau ni tai wa masai. Ya daini, San Pra ai Bruno gaw de hpang da ai Tawra Jau hpung ni mungkan hta law law naw rai nga ai. San Pra ai Bruno gaw sak prat kaba wa sai hte rau, Madu a shaning, (1101) ning hta, Italy mungdan, Calabria mare na, Tawra Jau ni nga ai Jawng kaw Madu hta yup pyaw ban sa mat wa sai rai nga ai.

          San Pra ai Bruno gaw, sak hkrung nga ai ten tup hta, mani sumsai myi man hte sha nga ai re majaw, shi nsa hti mat ai ten hta mung sum sai myi man hte sha nsa hti mat ai lam chye lu ai. Labau hta matsing da ai gaw, Jau gaw galoi mung mani sum sai hte sha nga ai re majaw, shi nsa hti mat ai pi n shadu kau ma ai lam rai nga ai. Shi a wuhpung na Jau ni hpe mung, pawt daru ai, nju ndawng, manawn masham lam galoi n galaw ai sha, mani sumsai tsawra myit hte sha pawn ba la ai majaw, ya na zawn Tawra Jau ni law law tara shadik let, apyaw sha magam gun lu ai rai nga ai. Dai ram du hkra, sum sai myi man hpe madu da ai wa mung rai nga ai. Dai majaw, Shi gaw de da ai Tawra Jau wuhpung hpe “Simsa ai shara kaw myit sumru nna, tara shatup na matu, sut dik ai kasi kamang ni”, ngu nna, masat shagrau, shamying ya hkrum sai rai nga ai. Shingrai, Nawku hpung kawn nna, San Pra ai Bruno a poi nhtoi hpe, October Shata (6) ya shani ngu, masat da ya sai rai nga ai. Shingrai, tsawra ai nu wa hpu nau ni, San Pra ai Bruno a kasi hpe la let, nlaw htum tinang hte ni htep ai wa hpe sum sai myi man hte hkap tau hkap lum shaga lu hkra shakut ga. Mani sum sai myi man nsam madum ai gaw, manang wa a matu n gun tsi kaba mung rai nga ai. Kalang lang myit ru myit tsang, hkri ba lit li ai ten, myit daw myit hten ai ten ni hta, mani sum sai hte n gun jaw ai, ga hkum ni gaw, prat hpe galai shai lu nga mali ai re. Dai majaw, lahta de na la lu sai lam yan ni hpe myit kraw lawang kata hta matsing let, ta tut hta jai lang akyu jashawn ga, teng sha akyu hkam sha lu na sha n ga, Madu Karai Kasang hte grau grau nna hti htep wa na rai nga ai. Sum sai myi man gaw, sim sa lam jaw ya lu ai, nga nna, Wa sarabyin Francis a Mungga hta mung na la lu nga ding yang rai nga ai. Dai re majaw, San Pra ai Bruno kaw kam  hpa let, ra ai chyeju ni hpe hpyi la nga ga ngu, n gun jaw let, lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.