San Pra ai Barbara a labau lam ( 09 July, 2019 )

San Pra ai Barbara

          Nu wa hpu nau ni, San Pra ai Barbara gaw, Greek mungdan Ayia ngu ai mare hta shangai dai daw wa sai lam chye lu ai. Shi a kawa gaw, tara mai gan masha rai nga ai. Shingrai, Barbara naw kaji nga ai ten hta, shi a nhkru nkaja la ai kawa gaw, shi hpe grai tsan la ai Pangka ngu ai hkyuk htawng hta bang da nu ai. Htawng hta shi hpe yu lajang nga ai shangun ma ni hte sha nga nga ai. Lani mi hta Jau langai gaw, Madu Yesu hte seng ai mahkawn hkawn nna,  hkyuk htawng kata hku lai wa ai hpe mu jang, Barbara gaw, dai mahkawn a lachyum hpe san yu ai shaloi, Hkye la Madu Yesu a lam re hpe hkum hkum tsup tsup tsun dan nu ai. Shaloi Barbara gaw grai kabu nga sai hte, shi hkum nan, Hkristian masha langai rai nga ai hte, Yesu hpe grai tsawra n ngai ngu tsun dan nu ai. Shingrai, Barbara gaw, mara kata, hkyuk htawng hta rawng nga tim, Madu Yesu hpe sha kam hpa tsawra let, shi chye ai akyu hpyi ga ni hte mahkawn mangoi ni hte shakawn nga sai rai nga ai. Kawa gade mi nhkru nkaja ai tara mai gan masha rai tim, Barbara gaw, teng man ai makam masham hpe magra jum da let, shi a sak hkrung hkrun lam hta, Madu Yesu hpe sha tsawra nga sai lam shi a labau hta ka matsing da ai hpe mu hti lu nga mali ai re.

          Shingrai, Nu wa hpu nau ni, Barbara ya na zawn Madu Yesu hpe kam hpa nawku tsawra nga ai lam hpe shi a kawa na jang, grai masin pawt nga nu ai. Hpa majaw nga jang, Dai ten hta, Hkristian masha langai tai ai ngu ai gaw, shanhte a matu, mara la n htan shai ai hku, hkam la da ai majaw rai nga ai. Hkristian nga jang, sat na, nat na, adup abyen na, nkaja ai masha re, mala la masha nsawn ai hku rai nga ai. Shingrai, Barbara mung, shi a kawa tara mai gan makam masham kaga hpe nawku ai re majaw, Barbara a matu, tsang shara rai nga  sai. Barbara mung, Hkristian hpung masha langai tai taw nga sai re majaw, kawa hte nhtan shai ai lam rai nga ai ngu, sawn nna, kawa na chying pawt singdawng nga sai rai nga ai. Dai majaw, Barbara a kawa gaw, masin grai pawt ai hte, Tara agyi wa hpang de shi hkum nan dun garawt sa wa nhtawm me, Nye a kasha gaw Hkristian makam masham hpe hkan sa mat sai. Ngai kasha ngu nsawn sana, ngu Tara agyi wa hpe ap kau nu ai. Barbara gaw, shi a kawa ya na zawn, kasha nsawn sai, nra sai ngu tim, myit masin hta hpa hkam sha ai lam n nga ai sha, Madu Yesu kaw sha ap nawng let, pyaw taw nga sai.  Shi a kawa gade mi nhkru nkaja ai raitim, moi kaji ten kawn kawa hte hka bra nna nga wa sai re majaw, Barbara a myit hta, kawa ngu ai hta lai nna, kawa hpe myit kap ai lam, masin dun ai lam n nga byin taw nga sai. Brabara a myit hta, Madu Yesu hpe sha kam hpa let, nawku mahkawn mangoi ni hte sha pyaw taw nga sai.

          Dai majaw, shi a kawa, Brabara hpe  Tara agyi wa kaw ap kau ai raitim, shi hta hpa hkam sha ai lam n nga, shawoi na zawn sha rai nga ai. Tara agyi wa mung, Brabara a myit masa  san seng ai hpe chye ai re majaw, shi a kawa hpe nan gara hku lajang ya ra na lam san yu nu ai. Shaloi kawa gaw, htung tara nga ai hte maren galaw mu, ngu marawn jahtau tsun dat nu ai. Nu wa ni, ndai San Pra ai Barbara a kawa zawn re ai, tara mai gan hpe kam sham nna, kashu kasha ni hpe ya na zawn gabai tawn, nhkru nkaja ai myit hte zingri zingrat ai kawa ni, ndai mungkan hta nga na shadu ai. Kaja wa mung, lai sai ten shaning law law hta ya na zawn nga lai wa sai rai nga ai. Karai kasang ra sharawng ai teng man ai makam masham ngu ai gaw, gadai mi zingri zingrat galaw tim, hten mat ai nrai, mat mat ai nrai nga ai. Karai kasang a chyeju atsam hpe hkam la lu sai rai jang, hpa hpe mung hkrit tsang ai lam n nga, Madu Karai Kasang a matu, gwi gwi tsap lu nga mali ai re. Shingrai, San Pra ai Brabara a kawa gaw, shi a kasha hpe tara agyi kaw ap kau ai sha n ga, si ai du hkra, adup kayet nhtawm me, baw daw kau ya na du hkra, hpyi shawn nu ai. Tara agyi wa, Barbara a lam chye ai re majaw, n gwi zingri ai sha, dai hku tawn da ai hpe Brabara a kawa chye jang, si ai du hkra adup abyen baw daw sat kau mu, ngu ya sha ya sha hpyi shawn nga sai.

          Shingrai, Tara agyi wa shi a hpyen la ni hpe ap kau nhtawm me, zingri sat na matu, ahkaw hkang jaw dat nu ai. Dai majaw, mara kata Brabara hpe hpyen la ni woi la nna, zingri hpang wa masai. Daizawn Brabara hpe zingri nga ai ten, nmyit mada ai sha, akajawng sha Lamu Kasa ni Brabara  hpang de yu sa wa nna, Brabara a wenyi hpe woi la kau manu ai.  Shingrai, San Pra ai Brabara gaw, hpyen la ni a zingri zingrat ai a majaw, nsa htum mat sai rai nga ai. Barbara nsa htum mat ai hte, nhkru nkaja ai kawa hta hkrit hpa kaba ni byin pru wa ai sha n ga, hpang jahtum kawa hpe mu achye dat ai majaw, si mat sai rai nga ai. Nu wa ni, nkaja ai hku sak hkrung hkawm sa jang, nkaja ai hku sha si wa na gaw, teng sha rai na re. Kaja ai lam hta sak hkrung hkawm sa ai wa gadai mung, kaja ai hku si wa na re. Madu Karai Kasang a shangun ma, Lamu kasa ni woi la ai hpe hkrum na teng sha rai nga ai.  Nu wa ni, anhte nang ngai yawng, mungkan ntsa sa pra ai ten gaw, jahkring mi sha rai nga ai. Jaw teng ai hte, njaw nteng ai hpe garan jinghka chye lu na grai nhkyak nga mali ai re. Shingrai, lahta de anhte la na lu sai San Pra ai Barbara a prat labau lam hpe na la lu sai hte maren, teng man ai makam masham hta sak hkrung hkawm sa let, sak prat hpe Madu Karai Kasang wa kaw ap nawng let, san seng ai myit masin hte sak hkrung hkawm sa chye lu hkra shakut ga ngu, n gun jaw mayu n ngai. Teng sha lak lai ai shaman chyeju ni hpe hkam la lu na re. Shingrai, Chyoi Pra ai Kahtawlik Nawku hpung kawn nna, San Pra ai Barbara a poi nhtoi hpe, December Shata Praw (4) ya shani ngu masat da ya sai rai nga ai. Dai nhtoi du shagu, San Pra ai Brabara kaw san seng ai myit masin hpe madu lu na matu akyu ara hpyi la nga ga law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

Add new comment

10 + 5 =

Please wait while the page is loading

San Pra ai Barbara a labau lam ( 09 July, 2019 ) | Radio Veritas Asia

Error

The website encountered an unexpected error. Please try again later.