San Pra Ai Ambrose A Labau Lam ( 17 November, 2019 )

San Pra ai Ambrose A Labau Lam.

          Nuwa hpu nau ni, San Pra ai Ambrose gaw, Madu a shaning (340) ning hta Germany Mung Trier mare kaw shangai dai daw wa sai lam chye lu ai. San Pra ai Ambrose hpe Italy mung na Milan mare hpe laksan yu makawp maga ya ai San Pra ai masha ngu, masat da ya ai lam chye lu ai. San Pra ai Ambrose gaw, kawa si mat ai hpang Roma mare kaw hpaji sharin la nhtawm me, Milan mare na uphkang du aya shatsam ai hkrum nu ai. Dai ten hta, Ambrose gaw, hpung masha garai ntai shi ai, Raitimung, Milan mare masha ni gaw, Ambrose hpe Saradaw aya dang da na matu, myit hkrum ma ai da. Dai majaw, Ambrose gaw, Kashin Kamun hkam la nna, Jau tai hpaji ni hpe tsang hte tsang sharin hkam la nhtwam me, Jau tai aya hpe hkam la sai rai nga ai. Ambrose gaw, lu su sahti nga mu nga mai ai dum nta masha kawn shangai chying hkai wa ai re majaw, lam shagu hta myit kaji myitru tsang pu ai lam n nga ai sha kaba wa ai wa mung rai nga ai. Jau tai ngut ai hpang, kade nna yang, Milan mare na Saradaw aya hpe mung lit shatsam hkrum sai hte rau, hkap la nna, Sasana magam bungli ni hpe gunhpai shakut hpang wa sai. Ambrose gaw, saradaw tai ai hpang, shi lu da ai sutgan ni hpe matsan masha ni hpe karan gam jaw kau nna, shawa masha ni a matu, shi a hkum hpe ap tawn kau sai lam labau hta dan hkung nga mali ai nu wa ni. Saradaw Ambrose gaw, lu su sahti kasha rai tim. gumrawng gumtawng ai lam n nga ai, rai dum ai myit nrawng ai, masu magaw myit n nga ai, yawng a matu akyu jaw ai magam bungli ni hpe shakut ya na ngu ai myit sha rawng nga nu ai.

          Saradaw Ambrose gaw, ngasat ngasa lam hta mung lak lai nga mali ai. Lusu sahti kasha nga nna, reng ai hku nnga ai, yu maya hku sha nga ai hpe mu lu ai. Shi galaw ra ai bungli ni hpe man man galaw ai lam chye lu ai. Shani shagu, shi galaw ra ai magam hpe shi aten hte shi galaw sa nga nu ai. Jahpawt manap na nhtoi shingkang pru wa sai hte, akyu hpyi ai, Chyum laika hti, sumru yu ai, tara hkaw na lajang nna, shi lu ai aten ni hpe atsawm sha jai lang akyu jashawn ai rai nga ai. Dai majaw, yawng gaw, Saradaw Ambrose hpe hkungga la ra, kam hpa nga ma ai. San Pra ai Ambrose gaw, shi a shinggyim sak hkrung ten kaw na awng dang dik ai mabyin langai mi gaw, Milan mare na Nawku htingnu hta shi tara hkaw ai hpe na lu ai majaw, San Pra ai Augustine myit malai lu mat ai lam rai nga ai. Dai gaw manu shadawn nlu ai awng dang lam kaba mung rai nga mali ai nu wa ni. Dai gaw, San Pra ai Ambrose shi hkum nan gade ram tara shadik ai, san seng ai, tsawra daw jau ai lam a sak se ni nan rai nga ai. Shi a kaja ai kasi ningli hpe mu nna, ya na zawn galai shai mat ai lam rai nga ai. San Pra ai Saradaw Ambrose gaw, Yesu a myi man tau nna, ra gadawn nga ai ni hpe garum na matu, ten shagu hta jin jin rai nga ai. Shi a sak prat gaw, shi a matu nrai, Karai Kasang tsawra ai kashu kasha ni yawng a matu madung da ai wa mung rai nga ai. Dai majaw, shani shagu na sak hkrung lam hta, manang wa hpe gara hku garum madi shadaw na, n gun jaw na, makam masham hta gawng kya nga ai ni hpe teng man ai lam de woi sa lu na matu hte wenyi hkye hkrang la ai lam hpe shakut nga nu ai.

          Shing rai, San Pra ai Ambrose gaw, lani mi na nhtoi hta nmyit mada ai sha Hpung masha ni hku kaba hkrum ai aten hta Saradaw Ambrose gaw, Nawku Jawng kaw jan taw nga ai Ja gawm nkau mi hpe dut kau nhtawm me, matsan masha ni hpe lusha mari jaw rai, garum ya nga nu ai. “Ndai Ja rai ni hpe Nawku Hpung lu da ai gaw, matsan masha ni hpe garum jaw na matu she re, mahkawng zing kyem da na matu nre,” nga nna, San Pra ai Saradaw Ambrose  tsun lai wa sai lam chye lu ai. Kaja wa mung teng nga ai nu wa ni. Myen ga malai hta, (shi-yin, da-zar, ma-shi-yin, wan-tsar) nga ai hte mare, Saradaw Ambrose gaw malu masha ra Ladawn nga ai ni a matu akyu jashawn ya sai rai nga ai. Shingrai, San Pra ai Saradaw Amborse gaw, Karai Kasang hpe tinang hkum ap nawng na matu amyu shayi sha ni a, hkawnsek prat hpe hkam la ai myit jasat hpe grai n gun jaw madi shadaw ya nga nu ai. Dai majaw, Saradaw Ambrose gaw, num sha ma ni law law hpe hkawnsek prat hte sak hkrung hkawm sa nga na matu, n gun jaw nga sai. Saradaw Ambrose a yaw shada lam ndai hpe masha n kau gaw, “masha jahpan shayawm ya ai” nga nna, mara shagun nga ma ai. Raitim, shanhte hpe saradaw gaw, “shinggyim masha jahpan hpe shayawm ya, manghkang jaw ya ai gaw, hkawnsek  tai nna, tsepkawp nre, masha  shada majan gasat ai she masha jahpan shayawm ya ai re” nga nna, ja ja bai tsun mahtai jaw ya nu ai. Shingrai, Saradaw a ga hpe gadai mung ning dang nlu rai nga masai.

          Nu wa ni, San Pra ai Saradaw Ambrose gaw, ya na zawn yawng a matu Madu Karai Kasang a teng man ai lam hpe hkaw tsun gat hkai, ap nawng shakut nga ai ten, shi a sak prat (57) ning hta Madu Karai Kasang woi la hkrum sai rai nga ai. Sak prat naw kaji ai raitim, Madu shaga la ai nhtoi du magang sai re majaw, sim sa ai hte  yup pyaw ban sa mat wa  sai rai nga ai. San Pra ai Saradaw Ambrose a moi mang hpe Milan mare kaba na Nawku Htingnu  hta lup makoi da sai lam daini du hkra mu mada lu nga mali ai re. Ndai San Pra ai Saradaw Ambrose hpe makoi mayang ai shaloi, uphkang aya lu ai wa hpe makoi mayang ai hkrang hte maren, grai hkik hkam ai hku makoi mayang kau sai lam labau hta matsing da nga ma ai. Saradaw Ambrose n nga mat ai majaw, shi a Nawku Hpung masha ni, grai yawn hkyen hkrum nga ai raitim, maga mi hku bai myit lu ma ai gaw, anhte yawng a matu, kasi kaja tai let, akyu jaw ya ai, yak hkak jam jau, malu masha hpang gara nga ai ni hpe garum madi shadaw ya ai, wenyi makam masham lam hta woi tsap ai hte, shawang tsawra myit dam lada ai re majaw, kabu ga ai, nga nna, sak se hkam ai hpung masha ni mung law law rai nga sai re. Shingrai, tsawra ai nu wa hpu nau ni, San Pra ai Saradaw Amborse a kasi hpe la let, anhte nang ngai yawng mung, yawng a matu sak hkrung chye ai ni, garum shingtau chye ai hte myit masin san seng ai ni byin wa lu hkra shakut ga. San Pra ai Saradaw Ambrose kaw mung akyu hpyi la nga ga, ngu n gun jaw mayu n ngai. San Pra ai Saradaw Ambrose a poi nhtoi hpe Nawku hpung kawn nna, December Shata (7) ya shani ngu masat da ya sai rai nga ai. Dai majaw, dai nhtoi shani hta lak lai ai shaman chyeju ni hpyi la nga ga ngu, n gun jaw let, lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.