San Pra ai Agnes A Lam. ( 06 Nov 2018 )

San Pra Ai Agnes

          Hkungga tsawra ai shiga madat nu wa hpu nau ni, daini, nawku hpung a labau hkap madat la na ten bai du wa magang nga sai. Ndai lamang hta, San Pra ai Agnes a lam hte seng nna, loi li hkai dan mayu n’ngai.

          Nu wa hpu nau ni, San pra ai Agnes gaw, Madu a shaning (293) ning hta, Roma mungdan kaw dai daw ai shayi sha rai nga ai. Gawng shingyan myi man n sam grai tsawm ai  sha n ga, sumnung shingdi ai re majaw, yu manawn ai, n’kaja ai ni a lata hta asak sum mat ai shayi sha mung rai nga ai. Moi kaji ten kaw nna, Madu Yesu hpe grai tsawra ai re majaw, shi hkum hpe Madu karai kasang kaw up da ai jan mung rai nga ai. Dai majaw, Madu Yesu hta lai nna gadai hpe mung, tsawra myit n’jan ai jan rai nga ai. Shi hpe hkungran na matu ga shadap ai ni hpe mung, ningdang kau ai jan re.

San pra ai Agnes gaw shi a tsawm htap ai mahkawn prat hpe, Sumsing Mungdan na hkawhkam wa hpe ap jaw da sai re majaw, sumtsaw sumra sa tsun ai ni hpe mung nmai byin ai lam hpe sha mahtai jaw ai jan rai nga ai. Yawng gaw shi hpe grai tsawra ai hkrai rai nga ai. Dai majaw, Agnes ( Sagu kasha ) ngu nna shamying ma ai. Shi hpe grai tsawra ai shadang sha ni gaw, shanhte lu mayu ai mahtai hpe n’lu ai re majaw, Agnes Hkristan makam masham hpe nawku ai lam tsun n dau shana, jahpoi asawng, galaw ma ai. Roma munggyi wa a kasha mung Agnes hpe tsawra ai majaw, sa hpyi ai shaloi, Agnes gaw, ngai hpe mahtan da ai wa nga sai, ngai hpe hkum gung lai, ngu dat nu ai. Munggyi wa a kasha gaw, Agnes hpe n’lu la nna, myit n’pyaw ai majaw, hkawhkam wa gaw, Agnes a lam gawn yu ai shaloi, Hkristan re ai hpe chye kau ai re majaw, Agnes hpe rim la n htawm me, shanhte nawku ai nat hpara ni hpe nawku shangun nu ai. Rai tim, Agnes gaw, shi a makam masham hpe nyet kau ai n’rai.

          Tara agyi ni hpang de woi sa n’htawm me, atsawm sha asawng, abawp let, shi a makam masham hpe nyet kau na matu bai kahtap tsun manu ai. Dai shaloi mung, Agnes gaw, nyet ai lam nnga, ngai tsawra ai gaw, Madu Yesu sha re lam bai gahtap tsun nu ai. Tara agyi ni, matut nna, Agnes hpe hkawhkam wa nawku ai makam masham hpe nawku kam sham na matu, matut tsun ai shaloi,  dai hpara a shawng kaw, Agnes gaw, u dang masat galaw nna, myit kraw kata hta, “ Wa karai kasang e, ngai kasha a daw dan da sai myit hpe hkum galai shai kau ya e, prat htum du hkra nang Madu hpe sha tsawra na n’ngai, ngai hpe mahtan da ai wa kaw nna n’jahka lu na garum la rit ” ngu nna, a’zim sha kyu hpyi sai rai nga ai. Tara agyi ni, dai daram myit ja ai num sha gaw, nga nna, wan hte zingri ai hta lang ai arai ni hpe madun let, jahkrit shama ai raitim, Agnes gaw, kam sham ai myit, gwi ai myit masin, hkam sharang jin ai n gum  atsam ni hte ningdang kau dingyang rai nga ai.

Dai majaw, hpang jahtum, Agnes hpe, kayet zingri n htawm me, nse nsa galaw ai nta nhku de woi shang wa ma ai. Dai shaloi, dai chyinghka lam kaw, lamu kasa ni tsap nga ai hpe Agnes mu dat nu ai. Dai majaw, Agnes hpe aroi arip di na maw ai la ni shi hpe hpa n galaw gwi masai hta n’ga, mada pyi nwawm mada mat ma ai lam nawku hpung a labau hta ka da ai hpe daini du hkra mu mada lu nga ga ai re. Bai, Agnes hpe sa hkra roi rip hkyen ai la langai mi gaw, dai kaw jang myi nmu mat ai rai nga ai. Agnes hpe la na shabrang wa gaw, Agnes kaw htim shang wa ai hte akajawng sha kadang si mat wa sai rai nga ai. Agnes gaw, shi hpe roi rip na matu, htim shang wa ai raitim, ya na zawn kadang si mat ai shabrang ma hpe akyu hpyi ya nu ai.

Shaloi jang dai shabrang wa bai hkrung rawt wa ai hpe Munggyi wa mu nna, ndai num sha ma kam sham ai hpung gaw, tengman ai makam masham hpung rai nga ai ngu, tsun let, Agnes hpe sat na hpung hta dai hkawhkam wa nlawm hkraw sai rai nga ai. Shaloi Munggyi wa a lawu tsang na Du kaba ni gaw Agnes hpe sat na hku daw dan kau masai hte maren, Madu a shaning (304), asak (12) ning hta makam masham a majaw, du htau sat kau hkrum sai rai nga ai. San pra ai Agnes a moi mang hpe No-man-thar-na lammaw ngu ai lam a ga kata lup wa hta lup makoi da sai rai nga ai. Dai shara hta, San Pra ai Agnes hpe myit dum let, shaning (350) ning hta Nawku jawng langai mi gaw gap da sai rai nga ai.

          San pra ai Agnes tsun ai hta, “ngai a sai nanhte a nhtu hta madi hkra mat ai raitim, Madu Yesu hpe ap nawng jaw da ai ngai a san seng ai myit salum hte, tsawra myit gaw nanhte lu na n’re” nga nna, tsun da lai wa sai rai nga ai. Hpang jahtum  Agnes hpe Catholic nawku hpung ginjaw kawn nna, San pra ai Agnes ngu amying shing teng jaw let, poi nhtoi masat, kam hpa kyu hpyi nga saga ai rai nga ai. Shi a poi nhtoi gaw, January shata (21) ya shani rai nga ai. San pra ai Agnes hpe, nawku hpung kawn nna, sanseng san pra ai prat hpe makawp maga ai share ninghkring hku nna, shakawn shagrau da sai rai nga ai. Dai majaw, San pra ai Agnes a poi nhtoi shani rai nga ai January shata 21 ya shani du shagu, Sagu lahkawng sat nna, shakawn shagrau poi galaw ma ai. Dai Sagu lahkawng a mun hpe sasana shagu na sagurem ni rai nga ai wa saradaw ni a du gali sumpan hta chywi shakap jai lang ai rai nga ai.

Bai, June shata (29) ya shani poi ang ai, San Pawlu hte San Peter a poi du na shawng shana hta, Roma mungdan, San Peter Nawku jawng a nawku tawn hta mara tawn da n’htawm me, kyu hpyi poi ni galaw ai rai nga ai. Ndai Sagu mun hte chywi shakap da ai saradaw ni a du gali hpe, Nawku hpung a ningbaw ningla rai nga ai saradaw ni hpe sha ap jaw ai rai nga ai. Nu wa hpu nau ni, Lahta de na la lu dai san pra ai Agnes a prat hpe bai yu ai shaloi, Mungkan n’tsa shinggyim masha langai a prat hku (12) ning sha nga u ai raitim, kaji ten kawn nna, san seng ai prat hpe ra sharawng ai, shagrit shanem ai myit hte, Madu Yesu hpe nawku kamsham ai, sumnung shigdi ai myit hte sak hkrung hkawm sa lai wa sai rai nga ai. Tengman ai lam hta gwi ai myit hpe sak se madun lai wa sai hpe adan sha mu lu nga ga ai re. Dai majaw, anhte yawng mung, San Pra ai Agnes a katsi hpe la let, tengman ai makam masham lam hta hkawm sa lu hkra shakut nga ga law.

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

Add new comment

9 + 4 =

Please wait while the page is loading