Nyau-Lay-Byin Nu Maria a Labau Lam ( Daw 16 ) 26 May, 2020

my photo

Nyau-Lay-Byin Nu Maria a Labau Lam    ( daw 16 )

          Nawku hpung a labau lam hpe hkap madat la na ten bai du wa magang nga sai hte rau daini na lamang hta, Ya ten Singapore mundan kaw magam bungli galaw shakut nga ai Julia Labang Tawm Num hpyi shawn da ai, Yangon Sasana, Nyau-lay -byin mare na, Lourdes Nu Maria Lung pu byin pru wa ai  lam hte seng nna, Wa Jau Simon Thin Mg ka lajang da ai hta na, yawng a matu akyu tai u ga yaw shada let, matut gam garan ya mayu n ngai.

          Nu wa hpu nau ni, lai sai lamang hta, Nyau Lay Byin na Nu Maria kaw sa du akyu hpyi ai ni yawng gaw, hkum hkrang mai hkam kaja na matu madung da akyu la ma ai lam the akyu hpyi sa masha ni gaw, laning the laning grau grau nna law jat wa ai lam na la lu saga ai rai nga ai. Akyu hpyi sa masha ni gaw, shaning shagu dai aten du jang nsa nna, n nga ngut ai zawn she rai nga ai. Shingrai, aten ladaw ni gaw, ya du du, akyu hpyi sa masha ni mung kabu nma rai nga ai. Nu Maria kaw du ai the, shanhte a rai ni hpe manam jarawp hta tawn da nna, Nu Maria hpe shawng sa shakram ma ai. Bai, mara raw hkam la rai, Wenyi the hkum hkrang mai hkam kaja na matu sharawng shara akyu hpyi la ma ai lam labau hta matsing da nga mali ai. Lai sai ten shaning law law hta, France Mungdan hta Nu Maria Bernedette hpe dan pru dan ai ten, mare masha ni sa du akyu hpyi ai zawn, ya mung Nyau Lay Byin mare hta Nu Maria kaw sa du akyu hpyi la nga ma ai. Grau nna, shut hpyit mara kap ai ni yawng mara kawn lawt lu na matu the Nu Maria a bau sin makawp maga ai hpe hkam la lu na matu akyu hpyi la nga masai.

Nu Maria dan pru dan ai shaloi, Shi Nu hkum nan ra sharawng ai akyu ara ni hpe hpyi na matu, akyu hpyi sa masha ni yawng gaw, Nu Maria ra sharawng ai hpe jahpring jatsup ai lam gaw dan dawng nga mali ai re. Nu wa ni, Nyau Lay Byin mare na Nu Maria kaw sa du akyu hpyi ai ten mau hpa langai gaw, ya na zawn anhte Nawku Hpung masha ni yawng, Nu Maria hpe hpai shing grup, Rosary hti akyu hpyi ai shaloi, makam masham n bung ai, hpu nau ni mung tinang a nta shawng kaw, wan shingnan ni hpe shachyi nna, Nu Maria hpe hkungga jaw ai lam rai nga ai. Sa du akyu hpyi sa masha ni hpe yu dat ai ai shaloi mung, nkung nkang, machyi makaw hkam sha nga ni malawng maga sa ai hpe mu lu ai. Shanhte a hkam sha lam hpe san yu ai shaloi, shaning shagu Nu Maria nga ai ndai Nyau Lay Byin poi de nlu sa jang, myit hta npyaw ai, dai majaw, Poi aten du shagu Nu Maria kaw du hkra sa ai, nga nna, hpaw tsun da ai hpe chye lu ai. Bai nna, Mare buga masha ni hpaw tsun da ai hta, “sa du akyu hpyi ai ni a Nu Maria hpe shakawn ai mahkawn mangoi ni gaw, katsi pyaw, simsa ai, myit dik hpa, chyeju hpring ai, buga ginra zawn hkam sha lu ga ai, nga nna, hpaw tsun da nga mali ai nu wa ni.

Lai sai shaning law law ten hta, Nu Maria poi du shagu, ndai poi nnan hpang ai kawn ngut kre ai du hkra, buga masha ni hte, makam masham wuphung shagu de na, myit su kanu kawa, du gyi salang ni lit la galaw ai lam chye lu ai. Wan leng hte du sa ai masha ni hte, poi laman ra ahkyak ai hkan jai lang na matu htaw sa htaw wa hte, maw daw hpe mawn sumli na matu, Waw wan leng daru na, wan leng daru up slg. J. Su Say lit la ap nawng ya sai rai nga ai. Bai, Akyu hpyi poi sa masha ni yawng lu sha na matu, n gu hpe, Daik- Oo mare na, KIH n gu jak madu rai nga ai, slg. Ba-O kawn alu jaw bang ya sai rai nga ai. Nawku daw jau lamang ni hta lit ang ai Jau ni a nga shara, hkawm sa hkawm wa, malu masha ni a matu, Yangon mare kaba na, BISN Coy madu, slg J David kawn lit la lajang ya sai lam labau shang rai nga mali ai re. Ya na zawn lit la ya sai alu madu ni hpe Nawku hpung kawn chyeju dum masat masa hte labau shang matsing da ai gaw daini du hkra rai nga mali ai re. Matut nna, Japan prat, mungdan kata dinghku majan prat the Nyau Lay Byin Nu Maria nga ai Jawng wang a lam bai madat yu ga.

Madu a shaning (1942) ning gaw, English Asuya ni, Myanmar mungdan kawn pru mat wa nna, japan ni shang wa ai aten rai nga ai. Nbung lam n gun rawng ai Japan ni, dum nta , laika sharin jawng, tsi rung, ginra nta ni, Asuya rung ni, jak rung ni hte lam, mahkrai ni hpe bawm kapaw jahten shaza kau ya ai majaw, Myanmar mungdan na wan leng jak gram rung, wan len lam ni hten za mat ai majaw, hkawm sa hkawm wa grai yak mat ai sha n ga, tsep kawp jahkring kau ra ai madang de rai mat sai. Nyau Lay Byin  sasana na tsawp htap ai, Chyoi Pra ai Nu Maria nga ai jawng wang na Nawku Jawng hpe mung, bawm hte kapaw jahten kau ya hkrum sai rai nga ai. Nawku Jawng yawng agrawp mat ai sha n ga, di si noi da ai shara mung, daw mi hkrat mat sai. Nyau Lay Byin sasana hta shang lawm ai Pa-gu mare na, San Clay mama ni nga ai jawng mung, bawm a majaw hten za mat sai. Dai mama ni a jawng hpe Wudang masat hkrang hku nna gaw gap da ai lam chye lu ai. Bawm a majaw, ntsa daw htap lahkawng ting hten za mat sai rai nga ai. Shingrai, mama ni a matu grai hkrit tsang ra ai re majaw, Saradaw kaba a matsun hte maren, mama ni a ginjaw, India mungdan de jahkring mi wa mat sai lam gam garan ya let ngam nga ai daw hpe du na lamang hta bai hkap madat la nga ga.

 

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

Add new comment

3 + 2 =