Nyau-Lay-Byin Nu Maria a Labau Lam ( daw 13 ) 05 May, 2020

Nyau-Lay-Byin Nu Maria a Labau Lam   ( daw 13 )

     Nu wa hpu nau ni, lai sai lamang hta, France mungdan na mama ni marai (7) hpe Myanmar mungdan de shaga la nu ai. Shingrai, dai mama ni marai (7) gaw, dai shaning na May Shata (14) ya shani France mungdan kawn rawt wa sai. June shata (8) ya shani Yangon mare de du shang wa sai lam na la lu sai rai nga ai. Ningtau Jau rai nga ai Wa Jau Sin-Ga-li gaw, dai mama ni marai (7) hpe Kaja ai Sagurem mama wuhpung na mama nkau mi hte jawng ma ni a kanu kawa nkau mi hte sang hpaw daru de sa tau la shangun sai. Dai shana Mama ni hpe atsawm sha hkalum la nna, hkyik hkam ai jawng hpe ap ya sai rai nga ai. Ndai se hkam mama ni gaw, Pa-gu mare kaw nga nna, Yangon mare kaw nga ai mama jawng hkan, nawku jawng hkan, ding gai dingla ni nga ai shara, mang gang gap ai ni nga ai shara hkan, lang hte lang rai sa gawan wan rai nga ai. Shingrai, ndai mama ni gaw, anhte Myanmar mungdan hta ya na zawn kaba dik hkyik hkam ai nta hte, Nawku hpung masha ni ndai ram law nga na nshadu ai, nga nna, mau hpa tsun taw nga masai da. Shanhte gaw, Yangon kaw lani mi nga nna, Buga na Karen Jau ni, Mama ni hte Karen mungdaw na sasana hpe mu mayu ai hte sasana shang mayu ai myit ni grai rawng ai hpe saradaw hkum nan chye taw ai re majaw, shanhte hpe ahkang jaw nu ai. Shingrai, dai mama ni, Shanhte du shang wa ai shaning June shata (15) ya shani kawn, Nyau Lay Byin ginwang up Jau hte rau, Karen myusha ni nga ai Nyau Lay Byin mare de rawt sa wa masai.

          Dai shana de hkying (5:30) pm ten ram hta Nyau Lay Byin mare de du shang wa sai. Dai kaw magam gun nga ai Mama ni hte bawda jawng ma ni yawng Karen myusha hpun palawng hte bu hpun mawn sumli let, wan leng daru de sa tau la ma ai lam labau shang rai nga ai. Ningtau Jau rai nga ai Wa Jau Louies hte hpung masha ni mung, mawdaw hte sa tau la ma ai da. France mungdan na mama ni gaw, jawng wang de du shang wa ai hte, Karai Kasang hpe chyeju dum mayu ai re majaw, Ginwang up Jau hkum nan Chyoi Pra hkum gawan, akyu hpyi let, chyeju dum lamang gadun hpe galaw ya sai rai nga ai. Dai hpang, Jau gaw, du sa wa ai Mama ni hpe France myusha ga hte hkap tau hkalum la let, chyeju dum ai lam tsun nu ai. Mama ni hpe hkalum la ngut ai hpang, nawku jawng kawn pru wa nna, mama ni hkring sa na shara de wa sa da masai. Hpang shani, June shata (16) ya shani shana de hkying (7)pm  ten hta Nyau Lay Byin mama jawng kaw bawda nga ai Jawng ma ni a ka hkrang hte France Mungdan kawn du sa ai mama ni hpe ka manawt, mahkawn mangoi hte shapyaw la masai.

          Ya na zawn Jawngma ni a ka manawt, mahkawn mangoi dan ai hpe mama ni grai yu ra sharawng masai, Shingrai, shanhte mung ma ni hte rau ka manawt kabu pyaw nga masai lam labau hta matsing da ai hpe mu lu nga mali ai nu wa ni. Ndai zawn du sa wa sai Mama ni gaw, mai byin ai made mi ndai sasana hta shakut shaja ra sai hpe myit hta bang da let, Nu Maria Lung pu nga ai de sa nna shanhte hkum hpe ap da manu ai. Shanhte mu lu ai Karen myusha ni hte, buga na Jau ni, Mama ni yawng hpe mu kabu ai hte, ya na zawn ndai mare buga hta makam masham ndai ram nga na nshadu ma ai lam tsun dan sai.  Bai nna, Nawku Jawng, Mama Jawng, Jau a nta hte bawda jawng ni mung hkrik hkam ai hpe mu nna, mau nga masai. Shingrai, Ndai France Mama ni gaw, ndai buga hta grau grau nna shakut ra sai hpe myit dum masai lam hpaw tsun let shakawn nma rai nga masai. Dai shaning na June shata (17) ya shani hta, Mama ni gaw, Jawng dung Jau hte ningtau Jau yen hte rau, Nyau Lay byin kawn Pa-gu mare de wan leng hte wa wa masai. Shanhte nga na, Pa-gu de du ai shaloi, Nawku hpung masha ni, shanhte hpe mawdaw hte sa tau ma ai lam chye lu ai. Dai hta n da, wan leng daru up hkum nan, shanhte hpe manap shat hte hkalum la sai lam labau shang rai nga ai.

          Mama ni gaw, Pa-gu kaw du ai hte, tara shadik nna nga ra sai re majaw, shing gan de nsa ai sha, jawng wang kata kaw nga let, yawng a matu akyu hpyi shaja, ap nawng nga sai rai nga ai. Mama ni nnan du shang wa ai ten hta, Nawku Jawng hte mama ni nga nta atsawm n ngut shi ai re majaw, Lamu ga alu jaw da sai Slg. Jan a htap lahkawng nta kaw shawng nga ma ai. Dai nta gaw, ya daini, Pa-gu mare na Jawng tai Jawng de shang wa ai lam lahkra maga na Asuya magam gun ni nga ai nta, labau shang tu nga ai hpun kaba nga ai shara nan rai nga ai. Mama ni a jawng gaw gap ngut ai hte Karai kasang kaw ap nawng akyu hpyi shaman let, htawt nga masai. Bai, Nawku Jawng shakum kaw mung, shangut shakre, shanman la lu sai nhtoi hpe ( 1936 ning August Shata (12) ya shani ), Wa Jau Mee Nyo kawn atsawm shakap masat da sai lam labau shang rai nga sai nu wa ni. Dai nhtoi shani hta, magam mi de kabu hpa rai tim, maga mi de gaw yawn hkyen hte hkrum ra masai. Dai gaw hpa ta nga jang, dai sehkam mama wuhpung na Mama Marie A.me Yangon Chyi-Min-Tai, Saradaw Begandet a, Tsi rung kaw Madu hta yup pyaw mat wa sai lam rai nga ai. Mama gaw, aten galu machyi kaba hpe hkam sha nna si wa sai re lam chye lu ai. Gade machyi kaba hkrum tim, aput  angun ai lam n nga, yawng a matu ap nawng let Madu Karai Kasang kaw apyaw sha si mat wa sai lam gam garan ya let, ngam nga ai daw hpe du na lamang hta bai hkap madat la nga ga.