Jau ni a prat labau ( daw 3 ) 14 Dec, 2018

Jau ni a prat labau    ( daw 3 )

Nawku hpung a labau lam hpe hkap madat la na ten du sai hte rau, daini na lamang hta, lai sai ten Wunpawng Bro. ni kawn ka lajang da ai, Jau ni a prat labau ngu ai gin lam hte seng nna, ngam nga ai daw hpe matut gam garan ya mayu n’ngai.

Ndai zawn shingdu labau kaw na hpaji la let awng dang mat wa ai lam hpe ga shadawn tsun ga nga yang Japan mungdan a mau mwi kadun mi hpe hkai dan mayu nngai. Japan mungdan gaw moi Langai lang ngu na Mungkan Majan rai nbyin shi ai shawng de grai matsan ai mungdan kasha sha re. Raitim shanhte American hte British mungdan ni hpa majaw dai ram sut su galu gaba ai kun? Ngu ai hpe myit dum wa ai. Dai mungdan hkan sa nna, sa hkaja ai hte shanhte Japan mungdan hpe mung Jak Rung kaba (Japan Industrial Union) ni shachyaw let grai da-ting shakut ai majaw langai ngu na mungkan majan ngut ai hpang, mungkan mungdan ting na sut masa lam lu su dik hte hpyen n-gun rawng ai mungdan (5) hta Japan shang lawm wa sai.

Dai hpang lahkawng ngu na mungkan majan hta shanhte Japan ni n-gun ja dum wa ai hte gum-rawng wa nna American a Pang Lai ntsa na Hpyen dap (a&wyf)kaba rai nga ai "Pearl Harbor" hpe akatsi sha sa htim shamyit kau ai, dai majan hta Japan ni dang ai ngu nna tsun lu tim kade nna yang American ni hku nna, Japan mungdan na sut su, galu kaba dik ai mare "Heroshima hte Nargaski" hpe 'Nuclear Bomb'  mashi lak nak hte sa kapaw bun ai majaw lahkawng ngu na mungkan majan hta Japan ni lak nak jahkrat let asum jaw kau ra ai.

Shanhte mungdan hte  mara kata na mung masha law law mung dai majan hta hten run mat wa ai, ndai zawn re Japan a shingdu labau hpe shanhte grai hpaji la ai hte grai bai shakut shaja ai majaw dai ni mungkan sut masa, awng dang dik, galu kaba dik ai nambat langai (No:1) shara hta Tokyo City mare kaba shara bai la taw ai ni hpe anhte mung mu chye lu nga ai re. Bai moi gaw Japan myu sha ni Hkum gawng grai kadun dik ai nga ma ai, anhte shada shala hkat yang pyi "Japan ngam" nga nna tsun chyai chye ma ai. Ndai zawn shanhte Myu sha ni grau nna sinna mungdan (Norhtern) masha ni zawn hkum gawng n-galu ai hpe mung dum chye wa ai hte shanhte myu sha ni mung galu kaba wa hkra gara hku galaw ra ai lam ni hpe hpaji la let shakut ai majaw dai ni anhte Myen mung masha ni hta grau galu nga sai hpe mu lu nga mali ai re.

Shingrai, Nu wa ni, Nawku hpung hpe woi awn nga ai, grau nna Jau, Ma Ma ni matut nna Jau htak, Ma Ma htak ai lam ni bai nbyin pru wa hkra gaw atsawm sha sumru, hpaji la nna shakut sa ra sai ngu nna myit lu nngai. Dai majaw Nawku hpung a ningbaw ningla ni hpe hpaji jaw ai hku wa nrai tim, ndai zawn re ningma ni hpe hkam sha lawm ai hku nna tsun ga nga yang, matut nna ndai zawn nawku hpung a sari sum ai lam hta grau nna Karai Kasang a myit ra ai lam hte nhtan shai ai lam ni nbyin pru hkra Jau tai, Ma Ma tai na Ramma ni hpe kaji ai ten kaw na, Jau prat, Ma Ma prat htum ai ten du hkra san seng ai hte amu gun hpai lu hkra gara hku sharin shaga lam madun nna, gara hku makawp maga na lam ni hpe madu mahkrawn, galu galang sumru yu, hpaji la let lama ma galaw ra na sai ngu tsun mayu nngai. Ndai hku tsun dat yang moi kaw na hpa n-galaw ai nga nga ai zawn gaw nga ai, raitim grau nna akyu pru ai, tang du ai hku nna shakut sa wa ra sai ngu nna myit lu nngai.

Nawku hpung a Ningbaw ningla ni sha n-ga Hpung masha ni hta mung Jau langai san seng ai hte prat htum hkra jaw jau ai magam bungli Jau amu hpe gun hpai lu na matu makawp maga na lit nga ai ngu nna myit lu nngai. "Ga shadawn" bai hkai ga nga yang, …. Hkang hkyi langai gaw, ngai Dusat Dumyeng ni a hkaw hkam rai nngai ngu nna shi hkrai, shi a Kawng hpe sha ngying jahkrit hkawm yang nbyin nga ai, hkang hkyi gaw dusat yawng hpe dang lu ai wa nga tim, Nrung tu ai dusat ni mahkawng nna jawm kasat yang gaw Hkang hkyi mahtang sha si ra na re, hpa majaw nga yang shi mung dusat hpan sha rai nga ai majaw re.

Jau prat mung dai zawn sha re shinggyin masha kaw na shinggyin masha sha re majaw Jau hpe anhte hpung masha ni hku nna njawm makawp maga yang, Jau prat gaw matut nna Wanglu Wanglang mungdan up hkang ai masa de lahkam sa wa nga ai ten, masha ni a bu hpun mawn sumli lam mung labau htung hkying hte shai ai brang lang prat a lai masa hku she hkawm sa taw ai re majaw Jau ni a matu shani shgu a-gung alau hpe Jau hkrai ning-hkap dang lu na matu gaw nloi nga ai. Hpung masha ni mung Jau ni, Ma Ma ni a matu kyu grai hpyi garum ya ga, nlaw la ai, manu dan la ai ndai sut gan(Jau) hpe yawng jawm makawp maga ga….! Ga shadawn, Hpakan mare na manu dan ai Ja, Lung Seng, Nhprang sut rai ni hpe Myu sha ni nmakawp maga yang, aten kadun hta htum mat na, ma mat na sha re.

Ndai zawn sha, Catholic shing wang kata hta myi man sum hpa byin ai majaw manang hpung ni a matu shatan shara mi rai yang rai sanu ga, Anhte Catholic hpung masha ni gaw nmai shatan ai, grau nna pyi kyu hpyi garum ya ra nga ga ai. San Pra ai Mohter Teresa tsun ai, "Shanhte hpe nang shatan taw nga yang, shanhte hpe garum la na ten ni nnga mat na ra ai" nga nna, San Pra ai Mohter Teresa moi India mungdan 'Khalakatta' mare, matsan mare na yak hkak ai masha ni hpe kaga lu su ngamu ngamai ai ni gaw, " Shanhte grai lagawn ai gaw, lagawn na she matsan ai, shat nlu sha ai," nga nna amyu myu tsun shatan ai ten, San Pra ai Mohter Teresa gaw lusu ai ni hpe dai zawn nanhte shatan nga ai ten matsan ai ni shat nlu sha nna kade si mat sai hpe dum wa hkra tsun dat ai ga rai nga ai.

 (Yawhan 2:19) hta, Jerusalem Nawku htingnu hpe jahten sharun kau nna (3) ya hta bai gaw gap lu ai gaw Madu Yesu sha re. Masha gaw nkaja ai hpe galaw na, jahten sharun ai bungli hpe galaw na she loi tim, kaja ai amu magam hpe galaw na, kaja ai hpe gaw gap na gaw yak la nga ai, dai majaw shani shagu sadi sahka let kaja ai magam hpe sha galaw shakut ra nga ga ai re. Shingrai, Jau prat ngu ai mung shinggyin masha kaw na shinggyin masha sha re majaw Jau ni hpe anhte hpung masha ni hku nna, galoi mung makawp maga akyu hpyi ya nga ga ngu, n gun jaw let, lamang hpe madai kaw naw jahkring sai rai.

 

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

Add new comment

10 + 0 =

Please wait while the page is loading