Jau Ni A Prat Labau (Daw 1) 13 Nov, 2018

Church History

Jau ni a prat labau  (daw 1)

Nawku hpung a labau lam hpe hkap madat la na ten du sai hte rau, daini na lamang hta, lai sai ten Wunpawng Bro. ni kawn ka lajang da ai, Jau ni a prat labau ngu ai gin lam hte seng nna, machye machyang tai u ga, gam garan ya mayu n’ngai.

Jau ngu ai gaw kadai ni rai ta? Moi naw kaji nga ai ten na yu ai, chye la lu ai hku na tsun ga nga yang "Mungdan hpe up hkang ai Du salang ni gaw masha hpe sha up hkang lu ai. Raitim Jau ngu ai ni gaw karai kasang lak san lata san da nna, shaman sau chya da sai, ga sadi hkam da sai re majaw,  Wenyi hte Hkum Hkrang hpe gin-hpawn da ai masha a hkum hkrang hpe mung, Wenyi hpe mung lahkawng yen hpe up hkang lu ai ni re" nga ai hpe kaji ten kaw na matsing lu ga ai re. matut nna,  Jau ngu ai ni gaw kadai ni wa rai ta???myit yu ga.  kaja wa, Jau ngu ai kadai ni re hpe Nang kaja wa chye sai kun? Ngai kaja wa chye sai kun? Jau ngu ai ni gaw Karai Kasang a lak san shaga la hkrum ai ni, lata la hkrum ai ni, Karai Kasang a shaman chyeju lak san hkam la lu ai ni rai nga ai.

Chye na loi dik ai hku tsun ga nga yang Madu Yesu Shi nan gaw de da sai, Shi a nni nhkri lam, Shi a hkye hkrang la ai lam, Missa hkungga nawng jau ai lam ni, Madu Yesu Shi nan jaw da ai ahkaw ahkang hte Shi a malai mungkan htum hkra amu magam gun hpai na matu, Kasa ni a prat kaw na, prat hte prat rai nna shatsam da hkrum ai ni, lak san lata la hkrum ai ni rai nga ai. Jau ni gaw, Madu Yesu Hkristu zawn, san seng san pra ai prat hpe gaw de ai ni rai nga ai. Shi Madu a amu a’gam ni hpe gun hpai na matu lak san ap nawng da ai prat rai nga ai.

Dai majaw,  shinggyin masha hte Karai Kasang a lapran e nga nna shinggyin masha ni a ra kadawn ai ni hpe Karai Kasang kaw hpyi garum ya nna, Karai Kasang kaw nna mung shinggyin masha ni hpe shadum sharin shaga mayu ai lam ni yawng hpe lapran e nga nna galoi mung hting-let ya nga ai Karai Kasang a datkasa zawn, shinggyin masha ni a datkasa mung rai nga ai. Nawku hpung kaw nna Jau ni hpe (Anohter Christ) lahkawng ngu na Yesu nga nna mung tsun shaga nga mali ai re. Madu Yesu gaw de da sai, Catholic Nawku hpung a Sakramentu ni hpe jaw na a’hkaw a’hkang hpe mung jau ni hpe jaw da sai rai nga ai.

Ga shaka dingsa Chyum laika hta mung Karai Kasang hte shinggyin masha ni a lapran hta datkasa galaw ya ai masha hpan lahkawng hpe mung mu lu nga ai. Langai, Karai Kasang a yaw shada ai lam, Karai Kasang shinggyin masha hpe tsun shadum mayu ai lam ni hpe htawn tsun shana ya ai Myi Htoi (Prophet) ni rai nna, Lahkawng, shinggyin masha a ra kadawn ai lam ni hte shut hpyit ai mara ni hpe mung hpyi nyem, hpyi htinglu htinglai ya na matu Hkyin Jawng aya lu ai, Jau ni rai nga ai. Hpang jahtum na datksa kaba mung rai, Myi Htoi kaba mung re ai wa gaw, (John The Baptize) ngu ai Yawhan re. Shi gaw du sa wa na Yesu Hkristu Karai Kasang a lam, shinggyin masha hpe shawng shachyen ya ai, sharai lajang da ra ai lam ni hpe mung dakasa tai nna lam madun hkaw tsun ya ai wa rai nga ai. Jau ngu ai ni mung Karai Kasang hte shinggyin masha ni a lapran e datkasa tai let hting-let ya nga ai ni re hpe asan sha mu chye lu ga ai re.

Dai majaw Jau langai mi byin tai lu na matu, n’loi la nga ai re. Daizawn, Jau langai mi byin wa na matu, myit lawm ai hte sha mung nbyin lu ai, shingdu de na Kanu Kawa (shing nrai) Kaba ai ni marai langai ngai a shadut ya ai hte sha mung prat tup a matu Jau nbyin lu nga ai. San seng san pra ai Jau langai byin wa na matu Karai Kasang kaw na lak san chyeju nan hkam la ra nga ai. Karai Kasang lak san lata la nna, Shi a chyeju nga ai wa sha Jau aya hpe hkam la lu nga ai. Dai Karai Kasang kaw na chyeju nga nga lu na matu gaw, Jau aya hpe hkam la na wa hta Hkum Shan a san seng ai, Myit Masin a san seng ai,  Wenyi makam masham hta ru jung  ai lam ni nga ra nga ai, dai nre sha, hkum shan hpe awu asin shut shai yang, myit masin gum-rawng gum-tawng ai, Wenyi makam masham  hta san seng ai lam, shakut ai lam  n’nga yang, Karai Kasang jaw ya sai Jau prat hpe jaw ya ai lak lai ai chyeju, Karai Kasang nan ndawm la ai raitim hkamla sai Jau hkum nan dai chyeju hte tsan gang mat wa chye ai, dai chyeju hpe shamat kau chye nga ai.

Raitim, Ja Chyum Laika shakawn kungdawn laika 110: 4 " hta Nang gaw hkin jawng Melchizedek a aru arat rai nga nna, htani htana a Jau mung rai nga ai" nga nna tsun da nga ai. Dai re majaw Jau prat kaw na htak mat wa ai mi raitim shi gaw Karai Kasang a nam-man chya ya hkrum ai htani htana a Jau sha rai nga ai hpe mung anhte ni dum chye ra nga ga ai. Jau langai mi hku nna, ngang ngang tsap nga ai raitim, shinggyim masha re ai majaw, kalang lang a’gung a’lau ni hkrum sha ai ten ni mung nga chye nga ai re. Dai hpe anhte nawku hpung masha ni grai chye na let, a’kyu hpyi garum na mung n’mai malap nga ai re. Dai ni mungkan shadang hta, daizawn a’gung a’lau hkrum sha nga ai Jau ni n’nga na re ngu n’lu tsun ai. Yet htawm hpang de n’nga na, grau law na ngu ai hpe mung gadai n’lu tsun ga ai.

Dai majaw, anhte yawng a mara hpe htinglu htinglai, raw  dat hkam sa na matu, Sakaramentu ni hpe jaw ya mai ai Jau ni hpe makawp maga, kyu hpyi ya nga ga. Lama na, a’gung a’lau hta hkrum hkra nga wa ai ten hta mung, n’gun jaw garum madi shadaw ya ra nga ai re. Nang ngai anhte nawku hpung masha ni yawng, Jau ni hpe malap mali rai jang gaw, manu dan ai sut gan (Jau) langai hpe aloi sha jahten kau ai, shamat kau ai hte  mung bung nga ai. Dai majaw, nawku hpung a kahpu kawa, wenyi n’gun jaw ya ai, makam masham lam hta lam wai ningshawng nga ai Jau ni hpe myit dum kyu hpyi ya nga na n’mai malap ai ngu gam garan ya let ngam nga ai daw hpe du na lamang hta bai hkap madat la nga ga.

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

Add new comment

7 + 11 =