Japan Majan ngut ai hpang Columban Jau ni, Sasana Magam lam ( Daw 2 ) 10 September, 2019

Japan Majan ngut ai hpang Columban Jau ni, Sasana Magam lam hta shachyen shaja sa wa ai lam   ( daw 2 )

             Nu wa hpu nau ni, lai wa sai lamang hta, Columban Jau Saradaw ni, Sagu hpung masha ni a matu, hkum hkrang hkamja lam hte seng nna, Manmaw Sasana Na-Hlaing mare kaw tsi rung hpe hpaw ninghtan lai wa sai lam hpe na la lu saga ai rai nga ai. Shingrai, daini na lamang hta gaw, Columban Sasana Jau langai rai nga ai, Wa Jau Obrai a wenyi makam masham hta gade ram rung jung let, buga masha ni hpe woi awn lai wa sai lam hpe mung madat yu ga. Lai sai lamang hta, Wa Jau Obrai a hpung masha, La Bau ngu ai wa a lam hte seng nna, kau kyen hpe na la lu saga ai rai nga ai. Jau gaw, La Bau a wun ma nloi ai hpe chye ai majaw, tsi rung de lawan ai hku sa lu na matu, mawdaw tam kahkrang hkawm mat wa sai. Rai tim, ndai lam maw daw taw ai shara re hpe Jau chye ai re majaw, San Pra ai Yoseph kaw, akoi anoi akyuhpyi  let, maw daw ala nga yang, marai (4) sha jawn ai, maw daw langai mi gale pru wa ai majaw, kabu gara hte La Bau a nta de gagat wa nna, tsun nu ai. Shaloi, La Bau a madu jan gaw, htingbu htingbyen ni a tsun jahkrit ai ga a majaw, La Bau a lagaw hpe zet daw kau na tsang ai majaw, tsi rung nsa na lam, ningdang nga nu ai. Shingrai, Jau gaw, ba ai sha jan sai, nga nna, myit la nga yang, shana de maga du jang, La Bau grau grau machyi wa ai majaw, hpang jahpawt tsi rung sa na lam, bai daw dan lu ma ai. Shingrai, Tsi rung kaw La Bau a lagaw hpe Sara wun ni, shading sharai, lajang ya ai majaw, ndaw kau ra ai sha kaja mat ai lam, daini du hkra labau hta ka matsing da ai hpe chye lu ai.

            Matut nna, Wa Jau Way, Tanghpre aseng up naw galaw nga aten hta na mahkrum madup mabyin masa ni hpe mung, ning nga ka da nga ai. Mazup yang ngu ai mare kaw, Ma ni marai (4) a kanu gai da jan rai nga ai, Jing man Jan, yi hkyen nga  ai kaw sharaw kawa dun sha kau sai lam, dai mare hta shata mi laman hta sha, marai (5) du sai majaw, mare masha ni hkrit gajawng nga ma ai lam hpe, Wa Jau Way na la nu ai. Shingrai, ndai shara de Wa Jau Way sa nna, Missa Hkungga nawng jau ya na matu, myit daw dan sai hte maren, mare masha ni mung Jau a shim lam hpe lit la nna, sa wa nu ai. Sharaw dun sha hkrum ai Slg Shamyen La a kahtawng du ai shaloi, hkrit kajawng nga ai mare masha ni, Jau hpe kabu gara hkap tau la ma ai. Sharaw nau ju ai majaw, makau mayang na mare masha ni,  gadai mung nsa du gwi ai aten, Jau hte manang ni du sa wa ai majaw, hkrit jakawng nga ai mare masha ni ndang tsun hkra, kabu shajang nga ma ai. Jau mung Newyork mare hte Chicaco mare sumla ni hpe madun ya jang mare masha ni a myit ni hpe jahkoi kau ya lu na re ngu, myit lu nu ai. Dai majaw, Chicaco mare kaba na, mawdaw kaba (8) lang ta lai hkawm lu ai lam kaba hpe madun ya nna, ndai lam kaba ni hta laban bat mi laman, mawdaw adawt si ai masha ni gaw, sharaw kawa sat kau ai masha ni hta pi, grau law ai hpe nanhte chye ai i? ngu, san nu ai. Dai zawn masha ni gade si ti mung, masha ni maw daw naw jawn na hpe nhkrit ma ai, nga nna, bai matut tsun dan nu ai. Shaloi, grai teng nga ai, lam kaw mawdaw galau na chye ai raitim, anhte tang hpre kaw nna, Myitkyina de mawdaw jawn hkrat wa na, nhkrit ga ai, Sharaw gaw, ganang mung nga chye ai, nga nna, tara hkaw sara wa bai tsun jat dat nu ai.

            Ndai zawn lam amyu myu hte hpaji daw nna, hkrit tsang nga ai mare masha ni a myit masin ni hpe jahkoi kau ya lu sai rai nga ai. Nu wa ni, lahta de na mabyin lam ni hte maren, Columban Sasana magam gun, Saradaw Jau ni gaw, buga masha ni a matu, wenyi makam masham lam hpe sha nrai, hkum hkrang hkam kaja lam, myit ngwi simsa lam ni hpe mung dang lu ai made n gun jaw ya lai wa sai lam ni  gaw, ya daini na ten, grai chyeju dum hpa rai nga mali ai re. Shingrai, Nu wa hpu nau  ni, Columban Jau hpung ni Jinghpaw mung hta, hpaw ninghtan lai wa sai, Laika hpaji sharin jawng ni a lam hte seng nna, chye da lu ai lam ni hta, Wa Saradaw John Howe gaw, jinghpaw myusha ni galu kaba wa na matu, laika hpaji sharin ya ra ai lam hpe dum chye nga nu ai. Shingrai, Japan majan wai wa mahka kaw nna, makam masham nlata, Jinghpaw ma ni hpe India mung de laika hpaji sharin la lu na lam, tam lajang ya lai wa sai rai nga ai. Dai Jawngma hpung ni hta lawm ai, Jawng ma ni gaw, daini laika hpaji chye nna, masha kaba tai nga ai ni hpe anhte law law mu lu na ga ai. (1946) ning hta, Tanghpre mare kaw hpung masha ni langai mi mung, garai n nga ai aten kaw nna, buga masha ni laika hpaji chye wa na hpe yaw shada let, hpaji jawng hpaw ninghtan lai wa sai. (1949) ning  April shata (20) ya shani, jinghpaw mungdaw a shawng na saradaw rai nga ai, Wa Saradaw Patrick Usha a Jau tai ai (25) ning hpring chyeju dum gumhpraw Jubali poi hpe galaw lai wa sai rai nga ai. Ndai Wa Saradaw Usha a Jubali Mungga hta, Columban Sasasna Jau ni, hpaji lam hpe madung da nna, Magam bungli shachyen sa wa nga ai lam, shawng nnan lawu tsang jawng hpang nna, dai hpang lapran tsang jawng ni hte, lahta tsang jawng ni hpaw mat wa na re lam tsun shana lai wa sai. Tsan la ai mare bumga hkan nga ai, Jawngma ni, jawngwa jawng sa yak hkrak ai lam ni a majaw, gara hku mung hpaji nlu sharin la lu na re hpe, mu chye ai majaw, bawda law law hpaw ra ai lam, dai kaw sa nga nna, hpaji shawng chye la sai ni gaw, hpang de na ni hpe matut nna, garum la lu na re lam ni hpe galu galang sang lang dan ai hte, kaja wa lata tut shakut mat wa sai lam ni hpe daini na hkying aten hta, anhte Jinghpaw buga, Sasana shagu hkan e, akyu hkam sha nga ai gaw, Columban Sasana Jau Saradaw ni hte Karai Kasang hpe lak san chyeju dum ra ai mabyin ni rai nga mali ai law.

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

Add new comment

7 + 10 =

Please wait while the page is loading

Japan Majan ngut ai hpang Columban Jau ni, Sasana Magam lam ( Daw 2 ) 10 September, 2019 | Radio Veritas Asia

Error

The website encountered an unexpected error. Please try again later.