April, 23 ya shani Cardinal Charles Bo ndau shabra lam galaw da ai hta “daining 2021 shaning na May shata Rosary hti ai yaw shada lam hpe Myanmar mungdan simsa rapra lam lu na matu rai u ga”, ngu Nawku Hpung masha ni hpe ndau shabra da nga ai.
N hkring n sa akyu hpyi ai “The May marathon of Prayer” ngu Wa Sarabyin Francis shamying masat da ai.
May (3), bat langai ya shani, Cardinal ni a sawk sagawn madi shadaw lawm ai a marang e Wa Sarabyin Francis kawn San Pra masha marai sanit (7) bai tang na matu hkyen lajang nga sai lam chye lu ai.
Lai wa sai laban bat kru ya, May 1 hta San Yawsep a poi nhtoi, magam bungli galaw sha ai ni a poi nhtoi rai nga ai.
Dai Shani San Yawsep hpe hkungga shakawn akyu hpyi htinglu htinglai ai Litany akyu hpyi ga ningnan sanit (7) hpe Wa Sarabyin Francis kawn shagrin da ya ai sai the, The Vatican Congregation for Divine Worship hte The Discipline of the Sacraments on Saturday kawn shachyen ndau dat ya ma ai.
2020 December 8 ya kawn 2021 December 8 ya laman hpe San Yawsep shaning ngu Wa Sarabyin Francis kawn masat shagrin ndau da ya lai wa sai.
Anhte yak hkak ai aten hte ra kadawn ra ahkyak ai aten hta anhte a kanu ni kaw n htang wa ga ai. Ndai shata hta Myanmar Mungdan simsa lam lu nna, prinem htingram lam hta hkawm sa wa lu na atsam hkam la lu mu ga yaw shada let anhte a sumsing kanu kaw akyu hpyi htinglu htinglai ya nga ga,
Tinang a mare buga kaw,tinang hte ni htep ai shara hkan nawku hpung hpe,wuhpung wuhpawng hpe akyu pru ai shayi shadang sha ni rai u ga.
Manmaw Sasan, Manmaw Jau Aseng Deng (2) Aung Tha Sara Ninghtawn kata na Jing Hpaw Laika hte Tara Laika sharin ai Ginhtawng Jawng Ma ni a Jawng yu ai hpawng lamang galaw ai lam hpe 9:00 am ten Deng (2) Aung Tha San Bridgit Ginra nta kaw galaw lai wa sai.
Hpyen yen ni bai wa nga ai shara, Myitkyina- Manmaw Lam, Nam San Yang Jau Ginwang hpe matut yu na matu JPC Coordinator rai nga ai Wa Jau Vincent Zinwa Shan Lum hpe lit shatsam da sai lam chye lu ai.
Wa Jau Shan Lum hpe tara shang Ginwang Up Jau magam lit ap ya ai lamang hpe May shata 2, 2021 ya Laban shani Nam San Yang St.Paul Nawku Jawng hta galaw lai wa ai.
Nawku hpung hta jau ginwang garan wa ai ngu ai gaw Karai Kasang a hpung shingkang grau nna dan hkung na matu rai nga ai.
Nawku hpung rawt jat galu kaba lam a matu Myitkyina Saradaw Ginwang hta P.L.N Jau Ginwang ningnan hpe (1.5.2021 ) ya shani kabu gara hpaw la lu sai.
Wa Jau Noel Jumhpawk Naw Lat hpe P.L.N ginwang up Jau lit magam ap ya sai rai nna P.L.N Jau Ginwang ningnan gaw Shatapru Jau Ginwang kawn garan hpaw dat ai rai nga ai.
P.L.N jau ginwang hta Shwezet, Kawa Hka,P.L.N, Mile (8), Mile ( 10 ), Lamyeng, Rosana, Nawng Nang Sara Gaiwang ni lawm nga ai.
1.5.2021
St.Joseph Nawku Jawng Wang,P.L.N
Myitkyina.
Sign up to our newsletter and get latest news and updates straight to your inbox!
