PRANWAN LADAW LABAN 21, A, 2023

21^st Ordinary Sunday (Reflection)

INTRODUCTION

Hkristu hta tsawra hkungga ai nu wa hpu nau nawku hpung masha ni ndai laban gaw Pran Wan Ladaw hta 21 ngu Laban rai nga ai.

 na la lu na Chyum mungga daw (1) hta myi htoi Isaiah hte Mahte a kabu gara shi ga gaw grai bungpre nga ai hpe mu lu ai.Ndai jachyum mungga Lahkawng hpe hti dat ai shaloi “ahkaw ahkang(Power and authority)” a masat kumla rai nga ai “zawsi” a lam )hpe mu lu ga ai.

1^st Reading (Is 22: 19-23)

Chyum mungga daw langai hta myi htoi Isaiah gaw hkawhkam wa hpe phaji jaw ai wa “Shebna” ngu ai hpe “Karai Kasang gaw shi a shara hpe la kau ya nna, shi a shara hta Eliakim ngu ai Karai Kasang myit ra ai hku asak hkum hkawm sa ai shi a mayam hpe tawn da na rai nga ai” ngu nna hkaw tsun lai wa sai rai nga ai. Eliakim gaw Dawi a nta hpe uphkang na ahkaw ahkang hpe mung Madu Karai Kasang jaw sai rai nga ai hpe “palawng galu shi hpe jahpun ai, shingkyit kyit ya ai, Dawi nta na sumzaw hpe shi a lahpa ntsa e mara da na” ngu nna asan sha tsun da sai rai nga ai.

2^nd Reading (Roma 11: 33-36)

Chyum mungga daw lahkawng hta San Paulu Roma hpung masha ni hpe shagun ai laika hta  Karai Kasang a shadawn n-lu ai mau hpa makawp maga ai bungli hpe (acknowledge) galaw nga ai lam rai nga ai. Karai Kasang a mau hpa, mai kaja ai lam, hpaji byeng-ya, hte machye machyang ni hpe mu ai majaw San Paulu gaw anhte ni yawng hpe Karai Kasang a hpung shingkang hpe shakawn na matu saw shaga ai rai nga ai. Shi gaw Roma hpung masha ni hpe arai yawng mayawng gaw Karai Kasang kaw na sa wa ai hte dai arai ni gaw Karai Kasang a hpung shingkang a matu rai nga ai ngu nna sharin ya ai lam rai nga ai.

Gospel Reading (Mt 16: 13-20)

na la lu na Kabu Gara shiga hpe anhte gaw daw masum hku nna myit yu mai nga ai..

No (1) “Dai Masha Kasha hpe masha ni kadai wa rai nga ai, nga nga ma ta”

 ngu nna shi a sape ni san ai ga san rai nga ai.

Anhte ni asak hkrung nga ai ndai mungkan ga hta anhte hpe masha ni gara hku mu nga ai ngu ai lam hpe chye mayu ai ni hkrai rai nga ai bai anhte gaw dai Masha ni hpe  anhte a myit ra ai hte maren sha anhte hpe mu shagun mayu ai ni mung rai nga ga ai. Anhte myit ra ai hte maren anhte  hpe masha ni anhte hpe mu ya ai nga yang grai kabu chye nga ai.

Madu Yesu mung shi hpe masha ni gara hku mu a ta, ngu ai ndai ga san hpe san dat ai shaloi shi a sape ni gaw shi a lam hpe tengman ai hku mu shagun mayu ai hpe myit la lu nga ai. Shi a sape ni tsun ai ga hpe yu ai shaloi, Madu Yesu hpe masha ni gaw “John the Baptist, Elijah, Jeremiah, myi htoi langai ngai” hku nna mu ma ai lam hpe asan sha chye la lu ai. Masha ni mu ai John the Baptist, Elijah, Jeremiah ni mung kaja wa mying gumhkawng ai masha ni rai nga ai.

John the Baptist gaw Hkyela Madu du sa wa na lam hpe shading sharai ya ai wa, zaibu jang mali hta tara shadik ai wa, masha ni hpe “myit malai ai chyeju kumla rai nga ai Kashin kamun lam hpe jaw ai ya wa, hte tengman lam a matu asak jaw kau ai wa rai nga ai”.

 Dai hte maren sha, prophet Elijah mung Ahab hkawhkam wa uphkang ai prat hta myi htoi htoi ai wa rai nga ai. Shi gaw Baal nat jaw jaw ai lam hpe ninghkap nna, Israela amyu sha ni nawku ai Karai Kasang gaw tengman ai Karai Kasang rai nga ai lam”  hkaw tsun lai wa ai myi htoi rai nga ai.

myi htoi Jeremiah gaw Jerusalem mung hta Solamoon hkawhkam gaw gap da ai Nawku Htingnu hpe garai n-jahten hkrum shi ai aten hta myi htoi htoi ya ai wa rai nga ai. Shi gaw “Israela amyu sha ni hpe nhkru nshawp ai amu lam ni, Karai Kasang hpe nre ai sha laga hpe nawku kam hpa ai lam ni hpe tawn kau nna myit malai lu na matu, bai Karai Kasang a ga shaka hpe kam hpa nna prat hpe gaw gap u ngu nna” hkaw tsun lai wa sai rai nga ai. Dai zawn rai lam ni tsun nna mying gumhkawng ai ni  gaw “Madu Yesu a lam hpe madi madun ai ni, Madu Yesu du sa wa na lam hpe hkaw tsun ai ni, hte Masha ni hpe Karai Kasang a tengman lam hpe sakse hkam ai ni” rai nga ai.

Madu Yesu shi a sape ni hpe san ai shaloi masha ni Madu Yesu hpe gara hku mu ai lam hpe sape ni a n-gup(mouth) aga hku nna tsun dan ai rai nga ai. Dai hpe yu yang, masha ni gaw Madu Yesu hpe hkrak n-chye ai majaw Madu Yesu hpe shanhte mu chye na yu sai ni hte shabung ai lam mung rai nga ai.

Madu Yesu gaw shi a sape ni hpe “dai ga san hpe bai san ai shaloi, Petru hta lai nna, kaga sape ni hpa mung ntsun ai sha zim nga ai” hpe Mahte laika hta ka da nga ai. Dai hpe yu ai shaloi, shi a hpang hkan nang nga ai sape ni hkum nan mung Madu Yesu hpe atsawm n-chye ai hpe madun dan taw nga ai. Ya Madu Yesu hpe hkap la kam sham nna Kawa, Kasha, Chyoi Pra Ai Wenyi a mying sang hta Kashin Kamun hkam la sai anhte ni hta mung, dai sape ni zawn Madu Yesu hpe atsawm sha n-chye ai ni naw nga taw nga ai hpe daini na Chyum munga hku nna myit yu shangun taw nga ai rai nga ai.

No (2) “Nang gaw Hkristu ngu ai ahkrung nga ai Karai Kasang a Kasha rai nga ai” lam rai nga ai.

Madu Yesu shi a sape ni hpe san ai shaloi, Simon Petru gaw “nang gaw Hkristu ngu ai ahkrung nga ai Karai Kasang a Kasha rai nga ai” ngu nna bai htan ya ai. Simon Petru gaw dai mahtai hpe shi a atsam hte nre, Kawa Karai Kasang shi hpe shadut madun dan ai a majaw sha, shi dai lam hpe tsun lu ai rai nga ai.

Nang ngai, anhte ni mung Madu Yesu hpe hkap la kam sham ai gaw anhte a atsam hte sha rai nga ai kun? bai myit yu mai nga ai. Anhte hta grau nna Madu Yesu hpe chye ai ni grai nga ma ai. Rai timung dai chye ai masha shagu gaw Madu Yesu hpe shanhte a matu Hkye la Madu ngu nna nlu hkap la ma ai re. Dai majaw, CCC-(153) hta “mahkam masham ngu ai gaw Karai Kasang jaw ai shaman chyeju rai nga ai” ngu nna sharin shaga da ai rai nga ai. Mahkam masham hpe lu la sai anhte ni mung, Karai Kasang jaw ai shaman chyeju rai nga ai makam masham ndai hpe manu shadan ra ai.

Dai majaw Madu Yesu hpe hkrak chye lu na matu gaw, (1) shi hte rau nga ra ai, (2) shi a ga matsun ni hpe madat ra ai, (3) shi a nga sat nga sa lam ni hpe kasi la ra ai. Shi hte rau nga lu na matu Chyoi Pra Hkum Sacramentu hpe sha byin da ya sai rai nga ai. Shi a ga hpe madat na matu shi a mungga hpe mung jaw da ya sai rai nga ai. Shi a nga sat nga sa lam hpe kasi la na matu shi a prat hte nan anhte hpe madun ya sai rai nga ai hpe dai ni na mungga gaw anhte hpe myit dum shangun nga ai rai nga ai.

Madu Yesu hpe hkrak chye na matu, Karai Kasang a shaman chyeju hpe anhte ni hpyi la ra ai. Dai rai yang she, anhte ni mung Simon Petru zawn “Madu e, Nang gaw Hkristu ngu ai ahkrung nga ai Karai Kasang a Kasha rai nga ai” ngu nna anhte ni tsun lu na rai nga ai.

(3) “Nang Petru rai nga ndai hte, ndai lunghkrung ntsa e nye a hpung hpe ngai de da na we ai”

Chyum mungga daw langai hte maren sha, Kabu Gara shiga hta mung Madu Yesu gaw Simon Petru hpe mungkan ga hte sumsing mungdan a ahkaw ahkang hpe jaw ya sai lam rai nga ai. Simon Petru gaw Nawku Hpung a ningpawt lung hkrung rai nga ai hte Nawku Hpung a shawng woi awn ai wa mung rai nga ai.

Madu Yesu gaw Simon Petru hpe nawku hpung ap da ai ten hta “Nang na nawku hpung rai ndai ” nga nna n-tsun ai , “Nye a Nawku Hpung” hpe gaw de da na ngu nna tsun ai rai nga ai, dai majaw“Nawku Hpung a madu gaw Madu Yesu hkristu nan rai nga ai hte Nawku Hpung hpe gaw de ai wa mung shi madu hkum nan rai nga ai” hpe asan sha tsun da nga ai lam hpe mu lu nga ai. “Nawku Hpung” hpe Simon Petru hte, kasa ni, Wa Sarabyin, Saradaw ni, jau ni, mama ni, hte hpung masha ni madu ai nrai nga ai. Nang ngai yawng gaw Madu Yesu a Nawku Hpung hta shang lawm ai ni hkrai sha rai nga ai.

 Madu Yesu gaw Simon Petru hpe zawsi jaw ai lam gaw Nawku Hpung a ningbaw ngu ai ahkaw ahkang hpe jaw ai lam sha rai nga ai. Petru hpe dai zawn jaw da ai gaw Nawku Hpung hpe diplu dipsha na matu ahkaw ahkrang jaw da ai n-rai nga ai. Karai Kasang a Sumsing Mungdan hpe mungkan ga ntsa e gaw gap sa wa na matu hte Karai Kasang a hkye hkrang la ai lam hte seng ai amu magam lam hpe galaw sa wa na matu rai nga ai hpe myit dum shagun ai rai nga ai. Ahkaw ahkang jaw da sai hte maren, Petru gaw shi a lata hta ap tawn da sai Nawku Hpung hpe makawp maga ra ai, tengman ai mungga hkaw tsun ra ai, wenyi lam yan ni hta woi awn sa wa ra ai rai nga ai. “Anhte ni yawng mung Madu Yesu a Nawku Hpung hta shang lawm sai ni re ai majaw Nawku hpung hpe jahtan sharun ai lam ni kaw na makawp maga ra ai, Nawku Hpung kata kaw nga n-na lam dam taw nga ai hpung masha ni hpe makawp maga shadum sharin shaga na lit anhte ni hta nga ai, Nawku Hpung hku nna sharin shaga matsun ai lam ni hpe madat nna kaja wa, Christian asak aprat hpe gaw gap sa wa ra ai, bai nna mung Nawku Hpung sasana lam ni hta tinang, dang di dang dep ai hku shang lawm gun hpai ra nga ai” ndai lam ni hpe daini na kabu gara shiga hku nna anhte ni hpe saw shaga taw nga ai rai nga ai.

STORY

Wa Sarabyin Yawhan XXIII Sarabyin nnan tai wa ai shaning 1960s aten hta, Nawku Hpung kata hta e mang hkang ni grai law taw nga ai aten mung rai  nga ai. Nawku Hpung kata hta Karai magam gun ni a mang hkang ni, gum hpraw mang hkang ni, hkungran mang hkang ni, makam masham ning ra wa ai mang hkang ni hpe shani shana, hparan ra ai aten rai nga ai. Shi gaw dai mang hkang ni hpe hparan na matu shani shagu rung dung nga ai. Lani mi na shana hta grai ba ai hte rung kaw na yu wa shaloi, “Holy Hour” galaw na matu akyu hpyi gawk de shang wa ai. Grai ba ai majaw, akyu hpyi nawku ai lam hpe myit maju jung ai hte nlu galaw ai. Akyu hpyi ga ni tsun let kyu hpyi ngut ai hte Madu Yesu a Wudang hpe yu nna, “Madu e ndai Nawku Hpung gaw nang madu a rai nga ai. Ya gaw na a lata hta ngai naw up da na nngai” ngu nna tsun ai let yup gawk de shang nna wa yup hkring sa la ai ..

dai hte maren daini nang ngai anhte ni gaw Nawku Hpung ngu nna gaw gap da sai hta shang lawm nga ai nlung  ni rai nga ai. “Anhte ni yawng gaw Madu Yesu gaw de da ai Karai Kasang a Nawku Hpung a lunghkrung ni mung rai nga ai” hpe  dai ni a Kabu gara shiga hku nna anhte hpe ngun jaw taw nga ai ngu myit dum sumru la mai nga ai. yawng a ntsa karai kasang shaman ya u ga..

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. .....shimali........... ngu na lanban rai nga ai hti ang ai ja chyum mungga ni gaw chyum mungga daw langai myi htoi Esaia a laika22:19-23..daw lahkawng Roma hpung masha ni hpang de san paulu shagun dat ai laika  11:33-36 kabu gara shiga Mahte 16:13-20

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law