Pranwan Ladaw Laban ( 19 ) Shaning A, 2023

KARAI KASANG A MUNGGA

Hkristu hta tsawra ai Nu wa hpu nau ni e ndai laban gaw Pranwan Ladaw hta laban 19 ngu laban de du shang nga sai rai nga ai.  na la lu na karai kasang a jachyum mungga ni gaw, daw langai Hkawhkam laika langai, 19:9,11-13 hta  "Karai Kasang gaw Elia hpe Nang nang e hpa galaw nga n ta? ngu nna san u ai. Bai karai Kasang gaw, Pru u, dai bum ntsa e Karai Kasang a man e tsap nga u ngu u ai." ndai lam ni hpe na la lu na re...

Myithoi Elia gaw Hebrew masha rai nga ai. Elia ngu ai lachyum gaw "Nye a Karai Kasang" ngu ai hku na lachyum shaleng da nga ai. Elia a magam bungli gaw karai kasang a amyu masha ni hpe myit malai lu shangun na lam hte karai kasang hpang de bai gayin wa lu hkra  hkaw tsun ai magam lit rai nga ai.

Grau nna e, Israela amyu ni gaw ( Baal) ngu ai maigan nat hpara ni hpe nawku daw jau wa ai majaw, Karai kasang gaw Elia hpe myihtoi htoi shangun  nna shi a myu masha ni myit malai wa lu na matu lam bai lajang ya lai wa ai. 

Karai Kasang gaw jachyum mungga hta  Elia e nang hpa galaw nga nta ngu nna san ai hte maren daini karai kasang gaw anhte hpe mung san nga ai. Anhte ni yawng gaw karai Kasang a kashu kasha ni tai nga sai hte maren, Karai kasang a ga hpe madat mara let anhte a prat hpe gaw gap sa wa ra nga ai. Karai kasang a man e tsap nga na hpe daini na chyum mungga hku nna anhte yawng hpe n-gun jaw nga ai. Karai kasang a man e tsap ai lam ngu ai gaw Kanu Kawa, kahpu kanau ni hte nta masha yawng hte rau teng man ai lam hta hkawm sa nga ai. dai zawn Kun dinghku kata hta e simsa ai hte hkawm sa lu yang she makrau grupyin ni hpe simsa lam jaw ya lu na rai nga ai. bai Kashu kasha ni hpe karai a mungga hte pawnba let hkawmsa  wa ra ai dai zawn hkawmnsa wa yang she, kashu kasha ni mung karai a man hta e myiman pa let sak hkrung hkawm sa wa na rai nga ai.

Chyum mungga daw lahkawng San Pawlu Roma ni kaw shagun dat ai laika 9:1-5 hta" Hkristu hta e teng man ai ga ngai tsun nngai, ngai n masu  nngai. Ji wa ni gaw shanhte a Ji wa ni rai nga ma ai rai nna, masha labau hku gawn yang, Hkristu gaw shanhte kaw na rai nga ai, shi gaw yawng mayawng a ntsa e htani htana a nga nga ai Karai Kasang rai nga ai."

 Madu yesu gaw gashaka dingsa prat hta e kawa karai kasang hte rau mungga hku nna nga nga ai. Dai mungga gaw masha tai wa sai rai nna, shi gaw htani htana karai kasang rai nga ai lam hpe san paulu gaw sakse hkam ai lam hpe na la lu na rai nga ai.

Kabu gara shiga, Mahte a laika 14:22-33 hta Madu yesu gaw bum ntsa de akyu hpyi na matu shi hkai sha bum de lung mat wa ai. Yesu gaw nawng ntsa e, hkawm let shanhte hpang de hkan nang sa wa ai. Dai nawng ntsa e shi hkawm sa wa ai hpe, sape ni mu mu yang, shanghte kajawng nna, dai gaw minla rai nga ai, nga nna hkrit gari ai hte marawn ma ai. Madu e nang rai n-yang gaw hka ntsa hku nna nang kaw sa wa lu na matu ngai hpe shaga la rit nga nna petru gaw madu hpe tsun wu ai. shaloi jang madu gaw sa rit ngu nna bai htan ai hte Petru mung hkawm sa wa wu ai. Raitim petru gaw hkalen kaba sa wa ai hpe mu ai shaloi, hkrit ai myit a majaw hka hta e lup wa nu ai. Bai madu e ngai hpe naw hkyela rit nga nna ta kadawn let madu hpe bai hpyi nyem jahtau wu ai. ngu ai ndai lam ni  hpe na la lu na re.

na la lu na mungga ni hpe myit sumru yu ai shaloi, anhte hta byin chye ai mabyin lam ni hte law law bung nga ai hpe mu lu ai. Petru a prat hkrun lam hpe yu dat ai shaloi mung, petru gaw nga hkwi sha ai wa rai nga ai. sape ni yawng hta na asak kaba dik mung rai nga ai. bai shi gaw Myit grai lawan ai wa re ai hpe mung chye lu ai, shawng hpang nau nmyit ai sha magam bungli hpe galaw chye ai wa mung rai nga ai. raitim Madu yesu hte rau grai ni htep ai hku nna hkawm sa ai, teng man ai lam hpe nhkrit nkang hte tsun gwi ai, magam bungli ni hpe lawan ladan daw dan galaw chye ai wa mung rai nga ai.

kabu gara shiga hta na la lu ai mabyin hta Madu Yesu gaw hka ntsa hku nna hkawm sa wa ai hpe kasa ni mu ai shaloi, minla shadu nna hkrit kajawng nga ma ai re shaloi Madu yesu gaw hkum hkrit myit, ngai she re myit a pyaw sha nga mu ngu nna n-gun jaw ga tsun dat ai hte shaloi jang Petru gaw Madu e nang rai n- yang gaw hka ntsa hku nang kaw sa du lu na ngai hpe shaga la e ngu nna htan wu ai. Kaja wa sha Petru hkum nan mung hka ntsa hku hkawm let madu yesu hpang de hkawm sa wa ai. Rai tim, Nbung laru hpe mu dat ai shaloi shi hta hkrit myit rawng wa nna hka hta e lup bang wa ai.

Ndai mabyin lam hpe bai myit sumru yu ai shaloi daini anhte hta e dum shai ra ai lam gaw, Madu yesu gaw anhte yawng hpe shaga nga ai, rai tim madu a mungga hte maren hkawm sa wa lu na matu anhte hta e agung alau ni law law lai di ra nga ai ngu ai lam rai nga ai.  Anhte marai hkum shagu hta mung ndai zawn re ai mahkrum madup lam ni law law hkrum sha ga na re. ga shadawn Nawku jawng sa ai mai kaja ai magam galaw maw yang she marang kaba htu ai zawn re ai lam ni, shing nrai cycle hten ai zawn re ai ni byin chye nga ai. Tsun mayu ai lam gaw, shing gyim masha langai rai nga ai majaw gawn kya ai lam ni law law anhte marai hkum shagu hta nga nga ai re. Raitim mung ti nang a gawn kya ai lam hta prat hpe n jahtum kau ai sha Petru zawn madu hpe bai ta la dawn let  garum hpyi jahtau lu hkra shakut ra nga ai. Madu e ngai hpe matsan dum la rit lo ngu nna bai rawt hkawm sa lu na matu n-gun atsam ni hpe galoi mung hpyi la ra nga ai. Petru shi hkum nan mung karai kasang a magam lam ni hpe nchye na ai shaloi tsun shut shaga shut ai lam ni law law byin lai wa sai lam ni mung mu lu ai rai nga ai.

Madu yesu hkum nan mung, Petru hpe tsadan e hpang de sit u ngu nna mung tsun lai wa sai lam hpe mung jachyum mungga hta mu chye lu ai. Petru gaw galoi mung shi a hkrat sum ai lam, Madu hte rau tsan gang wa ai lam ni law law byin pru wa ai shaloi, aten dep myit malai lu nna madu e, shut hpyit ai wa ngai hpe matsan dum la rit nga nna bai rawt hkawm sa chye ai wa rai nga ai. Ndai zawn hkawm sa wa ai a majaw mung madu Yesu gaw, shi a nawku hpung hpe Yu reng up hkang na matu Petru hpe lata lai wa sai mung rai nga ai.

daini Anhte mung Petru a kasi ningli ni hpe yu la nna karai kasang a mungga hte hkawm sa lu hkra shakut shaja ra nga ai. Karai kasang a mungga hte maren hkawm sa wa ai ten hta e nat tsadan a gunglau ai lam ni law law hkrum wa na rai tim anhte a karai kasang gaw anhte yawng a ntsa e dai zawn re ai a gung alau ni hpe lai di dang kau lu na matu shaman chyeju n-gun atsam hpe jaw da nga ai.

lahkawng Corinhtu ni kaw shagun dat ai laika, 12:9 hta e Nye a chyeju gaw na a matu ram la nga ai. Dai majaw karai kasang a chyeju gaw anhte yawng a ntsa e jaw da sai rai nga ai dai chyeju hte hkawm sa wa nna masha yawng hpe nhtoi jaw ya lu hkra shakut nga ga.

Story

Mare kahtawng langai hta e Hkai sun galaw sha ai dingla langai nga ai da. shi gaw shaning shagu shi a sun hta na grai mu grai sau ai baw n-gawng si ni a majaw shaning shagu  no langai kumhpa hpe lu ai da. shiga san ai numkasha langai myi shi kaw sa nna gasan sa san ai da. Grai mu sau ai baw n-gawng si kaba ni hpe gara hku nna hkai ai rai kun ngu nna sa san ai da?  " shaloi hkai sun galaw ai dingla wa bai htai ya ai gaw, ngai na sun makau kaw na hkai sun galaw nga ai ni yawng hpe ngai na nli tum kaja hpe garan jaw ai ngu nna tsun dan ai. hpa majaw nli tum kaja ni hpe garan ya a ta? ngu bai san ai shaloi,  n-gawng si ni pru wa ai ten hta e, nbung bung nna n-gawng hta lawm ai nli kaja ni hpe shara shagu de nbung rau pyen nna hkai sun ni yawng kaw du mat chye ai majaw re ngu nna myit galu kalang hte tsun dan ai. Shing nrai "nli nkaja ai rai yang mung nli kaja hkai da ai hkai sun ni kaw e, nbung bung ai kaw lawm ai nli nkaja ai ni gaw ngai na hkai sun de du mat yang, ngai na hkai sun mung awngdang ai hkai sun nmai byin ai majaw nli kaja hpe manang ni hpe shaning shagu karan ya ai re" ngu nna htai ya ai da. Ngai na sun awng dang ai lam gaw, manang ni hpe ngai na nli tum kaja hpe gam garan ya ai majaw re ngu nna shiga san ai wa hpe dai hku nna e tsun dan lai wa ai.

San Petru shi hkum nan mung Karai kasang a matsan dum ai hte hka hta lup wa ai kaw na shaw la hkrum sai hte maren, karai kasang a hkye hkrang la ai magam hta hkawm sa nna masha law law hpe nhtoi jaw ya sai rai nga ai. Machyi ai ni hpe shamai shatsai ya ai, si ai ni hpe bai jahkrung sharawt la ai, dai hku nna kaja ai magam bungli law law hpe galaw lai wa sai rai nga ai. Ndai lam ni yawng gaw karai kasang a matsan dum ai hpe shi hkum nan hkam la lu ai majaw masha law law hpe shi hkum nan bai daw jau ai lam mung rai nga ai. 

Dai majaw karai kasang a mungga hte hkawm sa wa ai shaloi, gawng kya ai lam ni byin pru wa tim Petru zawn myit malai nna madu yesu a lata hpe bai tek jum lu hkra shakut ra nga ai. Lahkawng hta e hkam la lu sai chyeju ni hpe masha yawng a matu akyu rawng ai hku nna hkawm sa let bai daw jau ra nga ai. Dai shaloi anhte ni yawng gaw madu a shaga ai hte maren hkawm sa wa lu na rai nga ai.

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n-gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta shijahku ngu na laban

 rai nga ai. hti ang ai ja chyum mungga ni gaw chyum mungga daw langai .Hkawhkam laika langai, 19:9,11-13chyum mungga daw lahkawng San Pawlu Roma ni kaw shagun dat ai laika 9:1-5 kabu gara shiga  Mahte a laika 14:22-33

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law