Pranwan Ladaw Laban ( 16 ) A, 2023

Pran wan ladaw hta Laban (16)

Introduction

Mtt 13:30 hta dai lahkawng yan tu kaba wa mu ga nmut ta du jang tsing hpe shawng dan mahkawng nna nhtan nhtawm wan hta nat kau mu dai mam hpe chyawm gaw nye a dum hta e mahkawng da mu ngu nna mam dan ai ni hpe ngai tsun na mawe ai ngu nna tsun da nga ai.

Hkristu hta tsawra hkungga ai Nu, Wa, hpu nau, nawku hpung masha ni e, ndai laban gaw pran wan ladaw hta (16) ngu na laban rai nga ai.

Chyum mungga daw langai ngu na hpaji byeng ya laika dai hta e Karai kasang gaw ding hpring ai lam a npawt rai nga ai hte Karai Kasang gaw yawng ma yawng a ntsa e up nga ai lam hpe anhte ni na la lu sai rai nga ai​.

Anhte ni na la lu sai Ja chyum mungga hte maren Karai Kasang gaw ding hpring ai lam a npawt rai nga ai. Ding hpring lam ngu ai, “Ga si hte maren, Jaw ai lam, teng man ai lam, san seng chyoi pra ai” lam ni hpe anhte hkan sa ra nga ai ngu ai hpe tsun mayu ai mung rai nga ai Hpa majaw nga yang anhte gaw Karai Kasang a hkrang bung sumla ni rai nga ai hte maren shi a kashu kasha ni anhte rai nga ga ai.

Wa Sarabyin  Francis a Hpung masha ni hpe Matsun madun ai laika (Gaudete Et Exsultate) hta anhte ni mu la mai ai lam gaw, (San seng chyoi pra ai prat ngu ai gaw nawku jawng kaw chyu sha a ten tup akyu hpyi nna sha shama kau ai lam nre ai sha, hkawm sa nga ai a hkyin aten ni hta mung shada da tsawra let daw jau nna hkristan hpung masha langai a kyang lailen ni hte maren sak se hkam nna, anhte a prat hpe gaw gap ra ai nga nna n-gun jaw da nga ai.) Anhte a Karai Kasang gaw dinghpring lam a npawt re ai zawn tsawra myit a npawt daju mung rai nga ai.

Daw lahkawng ngu na roma laika hta Kraw lawang hpe sawk yu chye ai wa gaw, wenyi a myit hpa re ai hpe chye ya nga ai. Karai kasang ra sharawng ai hte maren, chyoi pra ai ni a matu shi hpyi htinglu htinglai ya nga ai lam hpe anhte ni na la lu na rai nga ai.

roma hpung masha ni hpang de san paulu shagun dat ai laika hku nna daini anhte hpe sharin ya nga ai lam gaw chyoi pra ai wenyi a lam rai nga ai. shingyin masha yawng hte gaw chyoi pra wenyi  a n-gun a tsam hpe ra kadawn nga ga ai. Kaja ai hte n kaja ai lam hpe garan  ging hka chye nna kaja ai lam hkan galaw lu na matu Chyoi pra ai wenyi a n-gun atsam hpe kaja wa ra gadawn nga ga ai re. Karai Kasang ra sharawng ai hte maren wenyi gaw anhte a matu galoi mung htinglu htinglai akyu hpyi ya nga ai. Ndai lam ni hpe myit sawn sumru yu nna anhte hpe shadut ya nga ai Chyoi pra ai Wenyi karai kasang a nsen hpe madat la nna  anhte a prat hpe Jaw ai hku, kaja ai lam hku nga sa nna gaw gap sa wa ra nga ai.

ga shadawn maumawi langai mi hpe tsun ga nga yang

Lani mi na nhtoi e Mare Kahtawng langai mi hta , Ma Kasha ni gaw lam nmaw e Gawdin ginsup nga yang, Asak Kaba sai Dingla langai myi Ma ni ginsup nga ai lam de hkawm sa wa nga ai. Shaloi shi a Lahpa, lapai lahkra lahkawng maga hta e Woi lahkawng hpe mung hpai tawn da nna hkawm sa wa ai hpe Ma ni mu hkrup ma ai. Ma ni gaw Woi hpe Mu ai majaw, Ginsup ai hpe Jahkring nna Achyum dingla kaw sa nna ga sa shaga nga ma ai. Dingla wa mung Ma ni hte ga shaga  let hking sa nga ai. Shi a lahpa ntsa e Hpai da nga ai Woi lahkawng gaw, hkyen ai nsam kap ai Woi kaba hte, Chyang ai nsam kap ai Woi kaba yan rai nga ai. Ma kasha langai myi gaw, dingla wa hpe ga san langai san u ai. Woi kaba lahkawng gawa hkat yang gara wa dang na rai ta ngu nna san u ai? Shaloi dingla wa bai tsun dat ai mahtai gaw, "ngai shat grau jaw sha ai Woi wa dang na re" ngu nna bai htan ya dat ai da. ndai maumwi a mabyin lam gaw

Dai ni anhte a hkawm sa nga ai prat hkrun lam hpe mung bai myit sumru la lu shangun nga ai. Nang, ngai gaw Karai Kasang a lam hta grau nna ngun dat let hkawm sa nga ai kun? shing nrai Mungkan a pyaw hpa lam ni hta hkawm sa nga ai kun?, myit sawn sumru la mai nga ga ai.

Chyum mungga daw masum, Mahte a Kabu gara laika hta na la sai rai nga ai. Karai Kasang a mung dan lam hpe ga shadawn hte Madu Yesu sharin ya ai lam rai nga ai.  “Sumsing lamu a mungdan, hkauna hta nli kaja gat ai wa hte bung nga ai. Nli nkaja ai tsing ni hpe chyawm gaw dan nna wan hta nat kau na ra ai. Kaja ai mam ni hpe chyawm gaw dum hta mahkawng da na lam hpe anhte ni na lu na rai nga ai.”

Dai ni anhte na la lu ai Gabu gara shi ga lam gaw, sumsing lamu a mung dan lam hpe Madu yesu gaw, ga shadawn hte shi a myu masha ni hpe sharin ya ai lam rai nga ai. Sumsing lamu a mungdan, hkauna hta nli kaja gat ai wa hte bung nga ai ngu nna yesu tsun ai de a lachyum gaw Anhte mungkan ga hta hkawm sa nga ai aten ladaw hta e tinang a kan bau bungli bungsi a matu a mu bungli a myu myu hpe galaw chye nga ga ai. Ndai zawn galaw nga ai ahkying ladaw ni hta e Ja gumhpraw hpe madung tawn nna hkawm sa chye nga ga ai. Shing rai hkawm sa wa ai shaloi, myitru myit tsang ai lam ni law law hkrum sha chye nga ga ai. Ja gumhpraw grai lu tim myitru ai, myit npyaw ai lam ni anhte hta e byin chye nga ga ai. Dai ni na anhte a mungkan hta e Ja gumhpraw sut su ai ni law law nga ai zawn, lu na sha na nlu nna Jamjau hkrum nga ai ni mung law law rai nga ai. Ja gumhpraw lu nna myitpyaw lam, myitsim sa ai lam nlu ai majaw tinang hkum hpe sat si nna prat hpe jahtum kau ai ni mung anhte a makau grup yin ni hta law law rai nga ai. Dai majaw anhte a prat hta e Ja gumhpraw ahkayat nga ai zawn, grau nna tinang a wenyi lam yan a matu hkye hkrang la ai lam hpe galaw shakut na matu mung grai ahkyak nga ai.  Karai kasang a mungdan lam hpe mung ndai mungkan ga e sak hkrung nga ai ten atsawm sha hkyen lajang ra nga ai. Dai ni anhte na la lu ai Jachyum mungga gaw, karai kasang a mungdan lam hpe lu la na matu ndai mungkan ga hta hkyen lajang ra ai lam hpe shadum ya nga ai. Anhte a prat hta e Ja gumhpraw hpe madung tawn ai kun, Karai Kasang hpe madung tawn ai kun myit yu mai nga ai. tsun lai wa sai mawng mui kaw lawm ai Woi lahkawn hta na shat grau jaw sha ai wa gaw dang mat ai zawn anhte a prat hta e mung, Mungkan lam hte Karai Kasang a lam, lahkawng hta na gara wa hpe grau madung tawn nga ai hpe anhte ni jawm myit sumru la na aten ladaw rai nga ai. Ja htum e gaw nang, ngai grau nna Karai Kasang a mungdan lam hpe madung tawn ai rai yang, anhte ni yawng gaw Hkye hkrang la ai lam hkrum na hpe dai ni na Jachyum mungga hku nna asan sha tsun da nga ai. Karai kasang a mungdan lam gaw masha ni hpe tsawra myit hte daw jau ai, kaja lam hpe sakse hkam ai, matsan mayan ni hpe garum shingtau ai hte masha ni yawng a matu nhtoi tai ya ai lam ni rai nga ai. Nat tsadan a mungdan lam chyawm gaw masha hpe diplu dipsha mawlu mawsha, njaw ai lam ni hpe sakse hkam, nkaja ai kyang lailen ni hte masha ni hpe jahten sharun ai lam ni rai nga ai.

Conclusion

 na la lu na jachyum mungga masum hpe ginchyum dat ai shaloi n-gun la mai lam gaw, Karai Kasang gaw dinghpring lam a npawt rai nga ai, San seng chyoi pra ai hte tsawra myit a npawt mung rai nga ai. Anhte mung shi a kashu kasha hte Karai Kasang a hkrang bung sumla ni rai nga ga ai hpe myitdum let ndai prat hta e Karai Kasang a mungdan lam hpe tsawra myit kaba hte gawgap sa wa ga ngu nna n-gun jaw dat lu nngai. Yawng hpe karai kasang bau sin ya nga u ga.  

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta ( 16 )  ngu na lanban rai nga ai hti ang ai ja chyum mungga ni gaw chyum mungga daw langai - Hpaji Byeng ya laika 12: 13.16-19 chyum mungga daw lahkawng - Roma hpung masha ni hpang san paulu shagun dat ai laika 8:26-27 kabu gara shiga - Mahte 13:24-43

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law