Pran Wan Ladaw Laban 22  Ya Shani Na Karai Kasang A Mungga

Chyum Laika Ni 

Sirak 3: 17-20, 28-29;

Hebre 12: 18-19, 22-24;

Luka 14:1, 7-14     

Tsawra ai nu wa hpu nau ni, hpawt ni na laban gaw pranwan ladaw hta 22 ngu na laban rai nga ai. Anhte kadai mung tinang a hkum hpe kaga masha hta grau ahkyak ai, grau byin ai, grau reng ai ngu nna myit la chye ga ai. Ndai gaw anhte hkum shagu hta makoi rawng nga ai gum rawng gum tawng myit tsaw myit dap ai myit rai nga ai. Ndai bat na kabu gara ai shiga hta, “masha langai ngai nang hpe hkungran poi de shaga yang reng grau ai shara hta hkum dung e” nga nna madu Yesu tsun ai. Ndai bat na langai ngu na ja chyum mungga rai nga ai Sirak laika tha mung “Ngai sha e, nang hte seng ai amu mahkra hpe sumnung shingdi la ai hte hkan galaw nga u, nang grau nna galu kaba wa yang grau nna shagrit shanem nga u” nga nna sharin matsun da ai lam hpe Sirak laika hta mu lu nga ga ai.  

Tinang a hkum hpe shagrit shanem chye ai wa gaw shagrau la ai hkrum na re, nga nna Madu Yesu sharin shaga ai lam hpe kabu gara ai shiga hta anhte na la lu saga ai rai nga ai. Saw shaga da ai hte maren shana shat sha na matu shi a kasa ni hte rau Hparishe langai mi a nta de Madu Yesu du nga ai rai nga ai. Saw shaga da hkrum ai manam ni mung langai hpang langai du bang wa nna reng grau ai dung shara ni hta dung lu na matu shakut nga ma ai lam ni hpe Yesu maram mu nga ai. Dai re ai majaw shi a kasa ni hpe,  “masha langai ngai nang hpe num hkung ran poi de shaga yang, reng grau ai shara hta hkum dung e, nang hta grau arawng aya lu ai wa hpe mung shi shaga na nhten, nan lahkawng hpe shaga ai wa sa nna, ndai wa hpe shara yen ya u, nga nna nang hpe tsun kau yang nang gaw gaya ai ht nhting htang de htawt lu na ndai, tinang hkum shagrau ai wa kadai mung grit mat ai hkum na ra ai, tinang hkum shagrit ai wa chyawm gaw, shagrau ai hkrum na ra ai” ngu nna tsun let shagrit shanem ai lam hte seng nna sharin shadum ai lam hpe galaw ai rai nga ai. Madu Yesu tsun nga ai shagrit shanem ai lam ngu ai hta, lahkum shara la ai hkan a matu chyu sha nrai, anhte a prat hkrun lam ting lam magup hta shagrit shanem ai myit masin myit masa hte nga pra hkawm sa chye hkra shakut nga na matu shadum sharin ai lam galaw lai wa ai rai nga ai.

Masin salum kata hta kaja wa nan shagrit shanem ai myit masin hte tinang a nhkum ntsup ai, nbyin ntai ai lam hpe yin la chye ai myit masa ni nga wa hkra shakut na matu shadum ai lam rai nga ai. Hpa majaw nga yang dai zawn re ai shagrit shanem ai myit masin anhte hta nnga ga ai rai yang Karai Kasang a mung dan de anhte shang lu na nrai nga ga ai. Myit masin hta gum rawng gum tawng ni gaw jahtum de kanawn sit kau ai hpe hkrum lu mai ai zawn, dai madu a daw sha poi de shang lawm na matu saw shaga ai jahpan hta ngam kau da ai hpe mung hkrum lu mai nga ai.

Laban shani shagu anhte shang lawm nga ai laban nawku ni hte missa hkungga ni gaw shagrit shanem ai lam hta anhte rawt jat wa lu na matu garum ya ai lam ni tai lu shangun nga ai. Dai lam ni gaw anhte gaw gawng kya ra rawng ai ni rai ga ai, shut hpyit mara lu ai ni rai ga ai ngu ai lam ni hte, Karai Kasang a matsan dum la ai lam nlawm ai rai yang, shi a mung dan de shang wa na matu gying dan ai ni anhte nrai ga ai, ngu ai lam ni hpe myit dum nga lu na matu garum ya nga ai.

Dai rai yang tsawra ai Nu wa hpu nau ni, jet ai shagrit shanem ai lam ngu ai gaw ganing re ai lam ni hpe tsun ai rai ai kun, ngu ai hpe mung atsawm chye na na ahkyak nga ai. Gum rawng gum tawng ai masha gaw kaning re ai masha re ngu ai hpe tsun madi dan na matu loi nga ai rai tim, shagrit shanem ai masha gaw ndai zawn re ai masha re ngu nna madi madun lu na matu nloi la nga ai. Gum rawng gum tawng ai masha gaw, shi a prat mabyin hpe shi shadu ai masa rai nga na re ngu nna shadu nga ai masha ni rai nga ai. Ga shadawn, shi a hkum hpe shi arawng lu ai wa langai re ngu shadu da nna, shi shadu ai zawn sha shi a hkum rai nga na hpe shi kam nga chye ai masa rai nga ai. Dai zawn re ai masa hta, shi a hkum shi a prat hpe shi myit dik dum nna, Karai langai zawn shi a hkum hpe shi nawku nga chye ai masa rai nga ai.

Bai, gum rawng gum tawng ai masha wa gaw, shi hpe tsawra ai hte daw jau nga ai Karai Kasang hpe Nawku daw jau na matu lit li chye nga ai. Dai hta grau nna, gum rawng gum tawng ai wa gaw, shi a htingbu makau grup yin ngu ai yawng hpe malap da, hpa nnawn rai da nna, shi a hkum hta lai nna shi a myit hta kaga kadai mung nrawng nga chye ai. Ndai bat na langai ngu na ja chyum mungga rai nga Sirak laika hta mung “gum rawng gum tawng ai wa a arawn alai hpe, kadai n shading ya lu ai, hpa majaw nga yang n  hkru n kaja ai myit shi hta e ru jung nga ai” nga nna sharin shaga da nga ai.

Anhte a prat hta, jet ai shagrit shanem ai myit masin hpe kaja wa gaw gap la lu na matu, shing gyim masha shada da hta anhte sharin la lu na nrai nga ga ai. Anhte hkaja kasi la ra na gaw anhte a Sara wa rai nga ai Madu Yesu hta sha rai nga ai. Shi madu a prat hkrun lam ning gam shagu gaw shagrit shanem ai lam hte seng nna anhte kasi la mai ai, anhte hpe shadum sharin ya ai lam ni hkrai rai nga ai. Madu Yesu a matu shagrit shanem ai ngu ai gaw, aten shagu Kawa Karai Kasang hte shing gyim masha ni hpe daw jau nga ai ngu ai lam rai nga ai. Dai re ai majaw shi a prat tup hpe  Karai Kasang hpe daw jau ai hta sha, jahtum lai wa ai rai nga ai. Hebre 10:9 hta “yu u nang myit ra ai hku hkan galaw na ngai du sa rin ngai” nga ai. Anhte shing gyim masha ni hpe daw jau na matu, anhte hpe hkye la lu na matu shi a shing gyim asak hpe udang ntsa hta ap nawng kau ya lai wa ai mung rai nga ai. Shi si ai kaw nna bai hkrung rawt wa ai shaloi mung shi a asak rai nga ai wenyi asak hpe shi hpe hkap la kam sham ai ni mahkra lu la na matu lajang da ya lai wa ai.

Sum sing lamu de lung mat wa ai ngu ai rai tim, anhte shing gyim masha ni hpe dau jau ai lam hpe shi matut nna galaw ding yang rai nga ai. Laban shani shagu, Missa hkungga hta,shing nrai anhte a laban Nawku hpawng hta shi madu lawm nga nna anhte hpe matut nna daw jau nga ai rai nga ai. Dai re ai majaw ndai laban nawku ni hte Missa hkungga hpe shagrit shanem ai myit hta anhte shang lawm na ra ga ai. Yawhan 13:15 hta “nanhte hpe ngai galaw ai zawn, nanhte mung hkan galaw nga myi ga, ngu nna nanhte a matu ngai kasi kamang tawn da ni dai” nga nna kasa ni a lagaw ni hpe shi kashin ya ngut ai hpang tsun ai ga hte sha, anhte hpe tsun let laban Nawku hpawng the Missa hkungga hpe shagrit shanem ai myit hte shang lawm na matu anhte hpe saw shaga nga ai.

Ndai lam ni a majaw Nawku hpang wa shagu anhte a mara ni hpe yin la nna dai mara ni a matu myit yawn myit malai nga na matu Madu Yesu a myit ning sang hta Nawku hpung anhte hpe saw shaga rai nga ai. Karai Kasang hte anhte a lapran, bai anhte shada da a lapran, shapri shanem ai lam ni bai galaw la na matu rai nga ai. Bai anhte shang lawm nga ai laban Nawku hte Missa hkungga gaw anhte shada da tsawra ai hte shagrit shanem ai hte daw jau hkat nga lu na matu garum ya ai lam ni tai ra nga ai. Dai re ai majaw dai Nawku ngut nna tinang a dum nta de anhte bai nhtang wa shagu Karai Kasang myit ra ai masa ht maren sak hkrung hkawm sa nga lu hkra shada da garum shing tau hkat nga let sak hkrung hkawm sa nga na ga ai, ngu ai myit daw dan lam ni hte tinang a dum nta de gin htang wa ai lam tai ra na rai nga ga ai. Hkrit ai myit hte daw jau ai lam gaw mayam bungli sha rai nga na rai nna, Madu Yesu a myi man hpe tau yu let dai Madu a mying ning sang hta hpu nau shada da jau hkat nga ai lam chyawm gaw jet ai myit masin a ngwi pyaw sim sa ai lam hpe jaw ya lu ai zawn htani htana asak hpe mung lu la shangun na rai nga ai.

Tsawra ai Nu wa hpu nau ni, Karai Kasang e lata san la hkrum ai masha ni a makau e shagrit shanem ai myit the shanu nga lu hkra shakut nga ga. Karai Kasang e lata san la hkrum ai ni ngu ai gaw matsan mayan ni, jahten labre ni, na nna myit kyaw ai ni rai nga ma ai. Malawng maga anhte gaw ndai masha ni hte rau gahpa shara nna shanu nga na hpe gaya chye ga ai, raitim  mung Karai kasang gaw shanhte a lapran hta shanu nga ai, dai re ai majaw gaya kau ai myit nrawng ai sha shagrit shanem ai myit hte ndai matsan mayan masha ni hte rau shanu nga lu na chyeju n gun atsam hpe Karai Kasang kaw jawm hpyi la nga ga.

Wa Jau Bernard Dashi Tang Ji (Manila, Philippines)