Paska Ladaw Laban 5, 2020 : Nawku Hpung Hta Myit Hkrum Myit Ra Lam

Paska Ladaw Laban 5, Shaning A, 2020

Paska Ladaw Laban 5, Shaning A, 2020

10 May 2020

Nawku hpung hta myit hkrum myit ra lam

Hkristu hta tsawra ai kanu kawa hpunau ni e, lai wa sai paska laban ni hta bai hkrungrawt sai Madu gaw kasa zawn anhte hpe hkaw matsun da nga ai. “Karai Kasang a ja mungdan hte seng ai lam ni hpe tsun let” kasa 1:3.

Yesu Madu gaw anhte ni a sak prat hta Madu hpe kam shamyat lam gaw ganing re lachyum rawng ai hpe sang lang da ai. Madu gaw anhte a matu mahkra hkum zup ai wa rai nga ai hpe dum chye let tinang a tsawra myit the madung da ai lam hpe gara hku bai htang ra ai hpe tsun dan da ai. Bai hkungrawt sai Madu gaw anhte langai hpra hpe sagu langai a mying hpe shaga let anhte kun dinghku wuhpung wuhpawng hpe hkye la na matu myit ra nga ai. Dai rai nna, anhte ni tinggyen nawku ai lam n galaw ai sha, shara mi kaw sha hpawng de ai sagu hpung zawn arau nawku daw jau ra ga ai. Bai hkungrawt ai Madu gaw anhte ni hpe buga kaw nga ai Hkristan masha ni the rau Karai Kasang a dinghku masha zawn rau hpawng de na matu shaga la nna, shi a sagu hpung shatai da ya ai. Anhte langai hpra hpe hkum hkrang langai sha hta ngu ai Kanu nawku hpung hpe gaw de da ya ai. Hkristan kun dinghku ngu ai gaw Mungkan ting hta nga ai hkristan masha ni jawm hpawng de ai Hkristan mungkan nawku hpung ngu ai rai nga ai.

Daini na ja chyum mungga hta Madu Yesu gaw ahkyak ai ga san lahkawng hpe htai lu na matu anhte hpe garum ya nga ai. Ga san langai gaw; nawku hpung ngu ai gaw hpa rai ta? Ga san lahkawng gaw; nawku hpung hta anhte ni gaw kadai ni ta? ngu ai rai nga ai. Ga san langai hpe htai lu na matu ji woi Hkristan kun dinghku ni a lam shawng hka ja ra ga ai.

Nawku hpung kata myit garan ai lam bying hpang ai lam. Kasa laika hpe hti yu ai shaloi Yerusalem hta shawng na hkristan masha ni hta mung anhte mare buga ni hta nga ai mang hkang ni zawn shanht hta nga lai wa ai hpe mu lu nga ai. Dai manghkang ni hta na mabying langai hpe daini na chyum mungga daw langai hta tsun da nga ai. Gara hku byin ai kun? Yuda masha law malawng gaw Palestine kaw n nga mai ai sha, Roma mungdan na mare kaba ni the mare buga ni hta chyam bra nga pra ma ai. Shanhte hpe (jews of the Diaspora) chyam bra hkawm ai Yuda masha ni ngu shaga ma ai. Kaga masha ni a mungdan hta shaning law law sa nga pra ngut ai hpang, dai Yuda masha nkau ni shanhte a kanu mungdan de bai nhtang du wa ma ai. Shanhte a prat jan shang ten du wa mahka hta Yerusalem htingnu the ni ai shara hta machyu nga mayu ma ai. Raitim, dai zawn bai nhtang wa ai ni gaw maigan mungdan hta shangai daidaw ma ai rai nna, Palestine mungdan kaw jai lang ai Aramat ga nchye ma ai sha, Greek ga hpe sha chye ma ai. Greek ga gaw dai ten Roma mungdan hta masha law law jai lang ai ga rai nga ai. Dai majaw shanhte a matu laksan tara jawng ni nga ai rai nna, chyum laika hpe Greek ga hku bai gale da ai laika hta na she hti ma ai. Palestine kaw nga ai Yuda masha ni gaw Aramat ga hpe jai lang ma ai. Shanhte a tara jawng ni hta gaw woi jiwoi ni lang ai Hebrew ga the ka da ai laika chyum laika hpe hti ma ai da.

Pentecost (Chyoi Pra ai Wenyi yu hkrat ai poi) ngut ai hpang she Kasa ni a hkaw tsun ai lam ni hpe na la ai ten kaw na dai wuhpung lahkawng yan kaw na masha ni gaw Kanu nawku hpung de shang wa ma ai rai nna, Hkristan masha ni a makam the tsawra myit gaw shanhte yawng hpe langai sha hta jawm pawng wa ma ai re da. Wenyi a lam madun ai hpe hkam la ai rai nna, nawku hpung gaw matsan mayan ni hpe madung da yu lakawn ma ai; grau nna, madu wa si mat ai asak kaba gaida ni hte jinghku jingyu nnga mat ai num sha ni hpe yu lakawn ai lam galaw ma ai. Yu lakawn hkrum ai dai masha ni gaw Greek ga shaga ai hkristan ni malawng rai na masa hta nga ai. Dai majaw manghkang bying ai rai na re. Maigan mung kaw na wa ai dai num sha ni gaw ningrum ningtau ni si mat jang simlam nga ai Yerusalem de bai wa mayu ma ai rai na re. Buga kaw machyu nga ai gaida num ni gaw Yerusalem kaw na jinghku jingyu ni hpe kam hpa mai nga ai majaw malu masha na matu nawku hpung kaw machyu nga nra ai ngu myit la mai nga ai. Dai zawn bying ai lam hta garum shingtau, garum ningtum jaw lit ang ai ni gaw Aramat ga shaga ai wuhpung kaw na ni mai bying ai. Greek ga shaga ai ni gaw garum ningtum nlu ai lam,  gaida num sha ni hpe ahkyak nla ya ai lam kasa ni kaw shawk sawn ma ai. Dai mang hkang garum ningtum ra gadawn nga ai num sha ni kaw na hpang ai teng na re.

Garum ningtum jaw jang manghkang ngu nga wa chye ai lam gadai mung chye na re. Ga shadawn, lama wa nawku hpung hku, garum ningtum hpung hku, shing nrai kaga lam yan hku garum ningtum galaw jang, hkam la na ni hta tara rapra lam n nga ai ngu sawk shawn na, manghkang tam ni gaw nga na sha rai nga ai. Kade daram mi masan sa ai hku sadi maja na garan jaw garan ya tim mara hta na masha gaw nga taw chye nga ai.

Dai zawn re ai masa hta kasa ni manghkang hparan nga ra ma ai re. Shanhte gaw areng sadang nga hparat rawng ai  nna, wenyi hte hpring masha marai (7) hpe lata san da ma ai. Dai masha ni gaw myit san seng myit dingman ai masha ni rai ra ai. Kasa ni gaw dai zawn magam hpe akyu hpyi ai the kabu gara shiga hkaw tsun ai ten n galaw nmai nan rai nga ai. (kasa 6:4) Hpung masha ni mung anhte zawn sha shada dang rang hkat nga na malai zai the hparat rawng ai kaja dik ai masha (7) hpe Greek ga shaga ai wuhpung kata na sha lata san da ma ai. Lata la hkrum ai dai marai (7) kaw na langai mi gaw Antioch kaw na rai nga ai; shi gaw lai wa sai aten ni hta hpara sumla naw ai tara maigan masha rai nga nna, Yuda makam hpe kam la ai hpang jahtum hkristan tai wa ai the, nawku hpung masha tai wa ai wa rai nga ai. Kasa laika hta dai marai (7) kaw na rai nga ai, shawng nnan sat hkrum sai Stephen the tara hkaw sara tai wa sai Phillip yan a lam hpe dam lada ai hku tsun da nga ai. (kasa 6,7,8) Bai kasa laika 21:8 hta San Paulu masum lang ngu na sasana hkrun lam ngut ai hpang Yerusalem de sa ai hkrun lam hta Phillip nta kaw manam ai lam ka da nga ai.

Shawng na nawku hpung hta dan dawng ai hte chye lu ai katsi la hpa kaba nga nga ai. Dai gaw masha shagu, kasa ni, sape ni, Greek ga shaga ai hte Aramat ga shaga ai wuhpung lahkwng, shanhte lata san da ai magam gun marai (7) hte hte  kaga masha ni yawng a langai sha re ai myit jasat gaw hkristan kun dinghku kaba ngu ai masha shagu a mai kaja ai akyu ara a matu sha galaw ai lam rai nga ai. Shanhte yawng gaw tinggyen myit jasat nnga ai sha, wenyi a lam madun shadut ai hta hkawm sa shamu shamawt nga ma ai. Yerusalem hta bying wa ai myit garan ginhka ai manghkang hpe myit hkrum mang rum ai hte mahtai tam tsi tsi la ma ai hpe chye la lu saga ai hpang, shawng daw de san da ai “nawku hpung ngu ai gaw hpa rai ta?” ngu ai ga san hte “nawku hpung hta anhte ni gaw kadai ni ta?”  ngu ai ga san lahkawng hpe bai htai yu ga.

Mahtai amyu myu jaw mai na re. Raitim hkum tsup ai mahtai gaw nga na n re. Karai Kasang a magam gaw mau hpa kaba re majaw, shinggyim ga hte hkrak tup tsun shapraw dan lu na n re. Dai majaw Hkristu a marang e, hkye hkrang la hkum sai anhte ni a matu sha n ga, nawku hpung a matu mung teng man ai lam rai nga ai.

Madu Yesu gaw nawku hpung hta kadai rai ta ngu ai the anhte langai hpra mung nawku hpung hta kadai rai gring a ta ngu ai hpe San Petru anhte hpe sanglang da nga ai. Dai ni na chyum mungga daw lahkawng hta nawku hpung hpe gaw gap da ai nta the shabung da nga ai. Dai nta hta Madu Yesu gaw ning jut jahtum na n lung rai nga ai. Hkristan masha shagu gaw asak rawng ai nlung ni rai nna, gaw gap da nawku hpung nta hta akyu rawng ai ni tai ra nga ai. Hkristu the anhte ni hta nbung ai lam langai nga nga ai. Yesu Madu gaw Chyoi Pra san seng wa; yawng a daju rai nna, bai gram shatsawm nra ai wa rai nga ai. Anhte gaw shi gaw gap hpang da ai nta hta akyu rawng ai nlung tai hkra shatsawm jahtut la ra ga ai. Si ten du hkra anhte hkum hpe shatsawm nga ra na ga ai. Nawku hpung hta hkristan masha ni gaw sak hkrung ai nlung ni rai nna, nawku hpung hpe gaw gap ai hta aten tup bungle law ai nta gap masha ni zawn rai nga ra ga  ai. Dai majaw hkristan masha langai hta bungli lahkawng nga nga ai. Langai gaw, nlung rai nga ai ngai gaw nawku hpung masha hte bung pre lu na matu nawku hpung sharing shaga ai hpe shani shagu atsam dat hka ja taw ra ai. Lahkawng hta, nawku hpung hpe gaw gap ai shaloi nlung ni n nan ni hpe matut bang na matu nga taw sai nlung ni hte htuk ram hkra shachyaw ya ra ai. Hkristan shagu gaw hkingjawng ni re ngu petru tsun ai hta kasa ni zawn hkungga nawng jau ai hking jawng ni nrai tim, dai hkingjawng ni Karai Kasang hkungga nawng ai hta, grau nna Misa hkungga nawng jau ai hta shanhte ni mung shang lawm nga ai hpe tsun ai rai nga ai. Hkristan masha ni tinang a prat hpe shani shagu naung jau ai rai yang laklai reng dik grau ai hkungga tai nga ai. San petru gaw hkristan masha ni nawku hpung hta sang lawm apnawng ai hta kade daram akyu pru akyu lu ai hpe chye shangun na matu myit sharawng ai lam hpe mu lu nga ai. Anhte ni Yesu Madu a shaga la hkrum ai hta kade daram akyu pru akyu lu ai hpe chye jang tinggyen myit jasat hpe kau da; myit garan ginhka ai lam hpe galai sai nna, Yerusalem na hkristan ni zawn nawku hpung hta ahkyak ai lam yan ni hpe jahtut shatsawm ai hku wenyi sak prat hta kung hpan wa na  matu atsam dat shakut ra ga ai.

Nawku hpung gaw Kawa karai Kasang a marang e hkawm sa taw nga ai hkrun lam hkawm ni rai nga ai hpe Madu Yesu tsun da nga ai. Nawku hpung hpe hkrang shapraw dan ai hta Yesu Madu zawn hkum tsup ai hku dan dan leng leng shapraw dan lu na gadai nga ai. Hpawng jahtum daw sha poi hta Madu Yesu shi a kasa ni hpe si mani ai hku n gun jaw shalan shabran ya ai ga tsun ai hta myit gahpra na zawn rai nga ai. Madu Yesu gaw kasa ni hpe sumsing mungdan hta sumsing sutgan hpe Kawa Karai Kasang the rau hkam sa lu nga hpe ga sadi jaw da ai. Madu Yesu gaw shanhte a shawng e wa magang nna, yawng tseptsi lajang shachyip da na ngu tsun da ai. Masha shagu Madu a hpang hkan na matu the lam ndam na matu shi gaw sumsing mungdan de lung wa nna, bai du sa ai gaw galang n ga, gahtap gahtap nna rai nga ai. Kasa karai kasang hpang de sa woi ai ningbaw gaw Madu Yesu hkum nan rai nga ai.

Mawshe gaw Isreaela myu sha ni hpe zaibru jang/pa hku lai woi nna, ga sadi tawn da ai lamu ga de woi sa lai wa sai. Yesu Madu gaw shi ga sadi tawn da ai nawku hpung hpe mungkan ga ngu ai hkrunlam pa hpe lai di nna, sumsing mungdan de woi hkawm sa nga ai. Anhte ni a ningbaw wa lam dam na, n awngdang na matu tsang shara nnga ai ningbaw rai nga ai. Madu Yesu gaw lam chye ai wa re; shi hkum nan lam rai nga ai. Anhte gaw Madu Yesu a marang e sha sumsing mungdan du lu na. (Yawhan 14:6) Madu gaw asak hkrung nga ai sha n ga, shi hkum nan asak madu rai nga ai; mungga mung rai nga ai. Madu karai kasang hta lai nna, kaga masha ni gaw nteng nman ai ni sha rai ma ai.

 

Wajau Gawmaw Hkawng Re

(RVA Kachin Lithkam)


Hkristu hta tsawra ai tarahkaw sara/saranum ni e, hpawt ni gaw Paska ladaw hta (5) ngu na laban rai nga ai. Hpawt ni hti ang ai ja chyum mungga ni gaw

Chyum mungga daw langai   Kasa6:1-7

Chyum mungga daw lahkawng 1Petru 2:4-9

Kabu gara shiga Yawhan 14:1-12

Ndai ja chyum mungga ni hpe hti nna, hpawtni na nawku daw jau lamang ni hpe woi awn nga ga!

 

Add new comment

4 + 1 =